ایران ۲۰۲۰-جی ایلده قلوبال جینسيت برابرلیگی تابلوسونون ان آلتیندا یئر آلدی
دونیا اقتصادی فورومونون (داووس) ۲۰۲۰–جی ایلده جینسیت برابرلیگینه دایر راپورونا گؤره، دونیانین ۱۵۶ اؤلکه‌سی آراسیندا ایران ۱۵۰–جی سیرادا یئر آلدی.
دونیا اقتصادی فورومو طرفیندن هر ایل جینسيت برابرلیگینه دایر یاییملانان راپوروندا “اقتصادی ایشتیراک و فورصت برابرلیگی“، “ائیتیمه گیریش“، “ساغلاملیق و حیاتدا قالماق” و “سیاسی تأثیر” و اؤلکلرین قادینلارین بؤیومه‌سی اوچون مانعه‌لرین آرادان قالدیریلماسی کیمی مسئله‌‌لر آراشدیریلدی.
راپوردا ایرانین مؤوقئییندن بحث ائتمه‌دن ایرنا دونیا اقتصادی فورومونون قوروجوسو کلاوس شوآبا دایاناراق حاضرکی ديَیشیکلیک سرعتینده ارککلر ایله قادینلارین برابرلیگه قوووشماسی اوچون بیر عصر واخت لازیم اولدوغونو سؤیله‌دی.
ایرنا، ایسلند، فنلاند، نروژ، نیوزلند و سوئدین ۱۲ ایل اؤنجه‌دن بو یانا “جینسيت برابرسیزلیگی‌نین ان یوکسک اولدوغو اؤلکلر” لیستینه باشچیلیق ائتدیگینی ده بیلدیردی. آنجاق تقدیم اولونان ایستاتیستیکایا گؤره، ایسلند، سون ایللرده اولدوغو کیمی، “ارکک و قادین برابرلیگی ساحه‌‌‌سینده ان یاخشی اؤلکه” اولاراق سیرالانیر.
فنلاند، نروژ، نیوزیلند و سوئدده ان یاخشی جینسيت برابرلیگینه صاحب باشقا اؤلکلر آراسیندا ایکینجی-بئشینجی سیرادا یئر آلیر.
لیتوانی، صربستان، توگو و بیرلشمیش عرب امیرلیکلری ده سون بیر ایلده جینسيت برابرلیگی ساحه‌‌‌سینده ان چوخ ایره‌لیله‌مه‌یه ایمضا آتدیلار، نامیبیا و رواندا دا ایلک اون اؤلکه آراسینا داخیل اولدولار.
۲۰۲۰-جی ایلده ارکک و قادین برابرلیگی تابلوسونا گؤره، ۱۵۰–جی سیرادا یئر آلان ایراندان سونرا سیراسییلا کنگو، سوریه، پاکستان، عراق، یمن و افغانستان اؤلکلری گلیر.
iranwire
