ایران-چین آنلاشما سندی‌نین آیرینتیلاری؛ ایران 25 ایل چنین موستملکسی اولاجاق
ایران خاریجی ایشلر ناظرلیگی طرفیندن حاضیرلانان ایران – چین آراسیندا 18 صحیفه‌‌‌لیک قاپساملی 25 ایللیک آنلاشما پروقرامی‌نینین سندی ایران‌وایرین الینه چاتیب. سندده اساساً، بو اطرافلی آنلاشما پروقرامی‌نین مقصدی تیجارت و ایران، چین آراسیندا استراتژیک ایشبیرلیگینی تشویق ائتمک، تهلوکه‌‌‌سیزلیک ساحه‌‌‌سینده ایشبیرلیگینی گوجلندیرمک، او جوملهدن ترروریسم ایله موباریزه، توریسم، بین‌الخالق تشکیلاتلارداکی و حربی ساحه‌‌‌ده بیربیری‌نین مؤوقئلرینی دستک‌له‌مکدیر.
سندین آیرینتیلاری گؤستریر کی بو سندین تصدیقلنه‌جیی تقدیرده، ایران ایسلام جمهورییتی‌نین خاریجی بیر اؤلکه‌یه وئردیگی ایمتیازلار ایسلام جمهورییتی‌نین 41 ایللیک تاریخینده میثلی گؤرونمه‌میشدیر. سندین لاییحه‌‌سی چینه محمدجواد ظریف طرفیندن وئریلیب و چینلی مقاملار علاوه شرحدن سونرا اونو ایران ایسلام جمهورییتینه قایتاریبلار. سندین اساس یاپیسی تاماملانسا دا، بعضی آیرینتیلار هله دقیقلشمه‌ییب و ایکی اؤلکه آراسیندا دانیشیقلار آپاریلیر.
سندده ایکی اؤلکه آراسیندا آیری-آیری سئکتورداکی اؤنملی مسئله‌‌لر، او جوملهدن نفت تداروکو، پترو-کیمیا محصوللاری، دؤنوشولن انرژی و نظامی ایستیفاده‌سی اولمایان اتم انررژیسی، یول تیکینتیسی، دمیر و دنیز یوللاری باغلانتیسی، ایکی اؤلکه‌نین میلّی پوللاری ایله بانک ایشبیرلیگی و چیرکلی پوللارین یویولماسینا، تررورچولوغون ماليّه‌لشدیریلمه‌سینه و متشکیل جینایتکارلیغا قارشی موباریزه ایران و چین حؤکومتی آراسیندا اولان ایشبیرلیگی‌نین اؤن سیرالاریندا اولاجاق.
سندین بیر بندینده ایکی حؤکومتین اوچونجو بیر اؤلکه‌نین تضییقلری قارشیسیندا بو سندین ایجراسینی قوروماق آچیق شکیلده بیلدیریلیر و بو دا دولایی شکیلده آمِریکانین تحریملرینه قارشی دورمایی ایشاره ائدیر.
سند لاییحه‌‌سی ایکی اؤلکه آراسیندا اولان آنلاشمادا گئنیش نظامی ایشبیرلیگینی و مانورالاری نظرده توتور، مودافیه احتیاجلاری و مودافیه صنایع‌سینین گلیشمه‌سینی اؤن گؤرور. بوندان اؤنجه، امنییت شوراسیندا ایرانین سلاح تحریملری‌نین بیتمه‌سیندن سونرا ایران و چینین سلاح تیجارتی ائتمه‌یه حاضر اولدوقلاری باره‌ده تصدیقلنمه‌میش معلوماتلار واردی. آنجاق بو سند ایکی اؤلکه‌نین بو باره‌ده 25 ایللیک پلانلاری‌نین مؤوجود اولدوغونو گؤستریر.
ایران 25 ایل چینه هئچ بیر شی قارشیلیغیندا نفت ساتمایی تعهد ائدیر
25 ایللیک ایران-چین ایشبیرلیگی سندی‌نین اساس هدفی ایرانین ایلک اولاراق چینین احتیاج دویدوغو انرژینی تامین ائتمکدیر. سندده چین حؤکومتی‌نین «ایران نفتی‌نین دایمی آلیجیسی» اولاجاغی و «ایراندا نفت سئکتورونا چینلی شرکتلرین یاتیریمجیلاری‌نین قایتاریلماسی ایله باغلی چینین قایغیلارینا قولاق آساجاغینا اومید ائدیلیر» و «چین ایسه ایراندان ساتین آلدیغی نفت قارشیسیندا مالی مسئله‌‌لرده ایرانین سورونلارینی نظرده آلاجاغینا دیققت ائده‌جک.»
ایران و چین حؤکومتلری آراسینداکی 25 ایللیک آنلاشما سندی‌نین بو بندی‌نین معناسی اودور کی، ایران خام نفتین چینه ایخراج ائدیلمه‌سینه صادق قالاجاق، لاکین چین نفت پوللاریندان، ایرانین «اوپتیمال ایستیفاده ائتمه‌سینه» دقت ائده‌جکدیر. آنجاق ایراندان آلینان نفتین ماليّه‌لشدیریلمه‌سی و یا ایرانین ایسته‌دیگی شکیلده خرجلنمه‌سی موقابیلینده «تعهد» دگیل، «دقت» گؤستره‌جکدیر.
باشقا سؤزله، چینین خام نفتینی تداروک ائتمه قونوسوندا ایرانین حرکتلری »تعهد»، حال‌بوکی چینین ایرانین بورجونو قایتارماق اوچون بیر تعهدو یوخدور.
آمِریکانین ایران ایسلام جمهورییتی حؤکومتینه قارشی سرت تحریملرینی نظره آلاراق، موقاویله‌نین بو بندینده‌کی ان یاخشی سناریو، سند تطبیق ائدیلدیکدن سونرا 25 ایل عرضینده ایران چینین احتیاج دویدوغو قدر خام نفت تداروک ائده‌جک و چین ایسه موخالیف اولمادغی یئرلرده ایرانا نفتی‌نین پولونون خرجلنمه‌سینه ایجازه وئره‌جکدیر. آنجاق ان پیس وضعيتده، ایران چینه خام نفت ایخراجینی 25 ایل داوام ائتمه‌لی اولاجاق و چین ایرانین نفت ایخراجاتیندان فایدالانا بیلمه‌سی اوچون «دقت ائده‌جک».
بو «دقت» و «تعهد» بونو گؤستریر کی، چین هر هانسی بیر سببدن ایرانین ایخراج اولونان نفت پوللارینی گئری قایتارماغین مومکون اولمادیغینی ادعا ائدرسه، ایراندا اقتداردا اولان حؤکومت چین ایله بو باره‌ده موذاکیره آپارمالیدیر. ایرانا اولان بو بورجون قایتاریلماسی، ماللارین و یا خیدمتلرین ایرانا ایخراجی، واملارین اؤده‌نیلمه‌سی و یا هر ایکی طرفین او واخت راضیلاشدیغی دیگر اوصوللار شکلینده اولا بیلر.
گؤیدن دنیزه؛ ایراندا اقتصادی فعالیت اوچون چینه گئنیش یئتکی وئریلیب
25 ایللیک ایران-چین ایشبیرلیگی سندی‌نین لاییحه‌‌سی چینه ایرانین اینشاات سئکتورلاریندا فعالیت گؤسترمک اوچون گئنیش یئتکی وئریر. باشقا بیر پروژه‌ده حال حاضیردا دوزگون بیر شکیلده علاقه‌‌‌سی اولمایان ایرانین باتی-دوغو میلی دمیریولو شبکه‌سی‌نین اینشاسیدیر. بو آنلاشما چینه بو ایجازه‌نی وئریر کی پاکیستانی، ایران توپراقلاریندان عراق و سوریه‌یه باغلایاجاق بیر «زیارتی» دمیر یولو اینشا ائتسین. بو پروژه ایله باغلی دانیشیقلار چین ایله موذاکیره ائدیله‌جک.
بو سندده چین ایرانین دمیر یوللاری و اوتو یوللاری پروژه‌لرینده ایشتیراک ائتمه‌یه تشویق اولونور.
بونون یانیندا چین ایرانین نفت و گاز صنایع‌سینه سرمایه یاتیرمایا دا تشویق ائدیلمیشدیر. اؤنجه‌کی ایللرده چین ایرانین بعضی نفت ساحهلرینین گلیشمه پروژه‌لرینی اؤز اوزرینه گؤتورموشدو، لاکین عینی زاماندا تحریملره گؤره پروژه‌لری ترک ائتمیش و یا ایرانی آنلاشمادان گئری چکیلمه‌یه مجبور ائتمیشدی. 25 ایللیک سندده چینین بو ساحه‌‌‌یه گیرمک اوچون بیر تعهدو یوخدور، آنجاق ایستسه ایرانین نفت و گاز صنایع‌سینه گیره بیلر.
سندین بو حیصّه‌‌‌سی، چینین ایراندا انرژی ساحه‌‌‌سینده سرمایه یاتیرماق ایسته‌دیگی تقدیرده اؤنجه‌لیکده اولدوغونو و ایران ایسلام جمهورییتی حؤکومتی‌نین بو اؤلکه اوچون خوصوصی بیر ایمتیاز نظره آلمالی اولدوغونو ایفاده ائدیر. سند، عینی زاماندا، ایران هاوا لیمانلاری‌نین و هاواجیلیق تکنولوژیسی‌نین و هاواجیلیق صنایع‌سی ایله علاقه‌‌‌لی دیگر طلبلری ایشبیرلیگی موقاویله‌لری شکلینده چینه حواله ائدیلمه‌سینی تعهد ائدیر.
چین فارس کؤرفزی‌نین سولارینا ال چاتیر
ایراندا یئگانه اقیانوس لیمانینا صاحب اولان عمان دنیزی‌نین ساحللرینده‌کی سیستان و بلوچیستان ایالتینده‌کی مکران ساحللری‌نین گلیشیمی چینه حواله ائدیلمیشدیر. ایسلام جمهورییتی‌نین لیدری آیت الله علی خامنه‌ای اوزون مدتدیر رژیمین واسطه‌‌‌چیلریندن بو ساحللرین گلیشمه‌سینی ایسته‌میشدی.
ایران و چین آراسیندا 25 ایللیک ایشبیرلیگی سندینه اساساً، جاسک ساحلینی گلیشدیرمه‌سی، بیر صنایع شهرکینین اینشاسی، پترو کیمیا، پولاد و آلومینیوم ایله علاقه‌‌‌لی صنایع ساحهلرینین اینشاسیندا، مکران بؤلگه‌سینده توریسم مرکزلری، صنایع مرکزلری و لیمانلارین اینشاسیندا چین ایشتیراک ائده‌جکدیر.
ایران اینترنتی چینی اولور
ایران-چینین آیرینتیلی ایشبیرلیگی سندینده ایران بئشینجی نسیل موبایل تلفونلارین (5G) گلیشمه‌سینده، هابئله آختاریش موتورلاری‌نین گلیشتیریلمه‌سی، اینترنت مئساژلاشما آراجلاری، ایمیل، آنتی‌ویروس، اینترنت یؤنلندیریجیلری و جی‌پی‌اس، موبایل، تبلت و لپ‌تاپ کیمی اساس آلت یاپی‌لاری چینه وئریر .
بیر چوخ گلیشمیش اؤلکلر چین حؤکومتی‌نین تئلئکوم و اینترنته موداخیله‌سیندن و چین حؤکومتی‌نین وطنداشلارین دانیشیقلاری‌نین دینلنمه‌سیندن سوایستیفاده ائتمه‌سی قورخوسوندان چینین خوصوصی شرکتلرینی او جوملهدن «هواوی» نی بو پروژه‌لردن چیخارمیشلار. ایران ایسلام جمهورییتی حؤکومتی ایسه ایرانین تئلئکوم و اینترنت صنایع‌سینین بؤیوک حیصّه‌‌‌سینی چینه تحویل وئریر.
نه ایراندا، نه ده چینده اینترنته گیریشین گووه‌نیرلیگی یوخدور یوخدور و هر ایکی اؤلکه‌ده حؤکومتین کونترولو ایچین ایزین وئرمه‌ین سوسیال شبکه‌لر و اینترنت مئساژلاشما آراجلاری حؤکومت طرفیندن فیلتر ائدیلمیش. ایندی بو سند، چین اوسلوبوندا ایرانین تئلئکوم و اینترنت شبکسی‌نین گلیشمه‌سینده چینه صلاحییت وئریر.
سندده آچیق شکیلده بیلدیریلیر کی، ایران و چین حؤکومتلری بیر-بیری ایله و بین‌الخالق تشکیلاتلارلا «سیبئر اوزایدا حؤکومت اگه‌منلیگی » ساحه‌‌‌سینده ایشبیرلیگی ائده‌جکلر.
بو سندده ایرانین آوانتاژلاری نه‌لردیر؟
25 ایللیک ایشبیرلیگی سندده چوخلوقلا چینین ماليّه و اقتصادی قازانجلاری واردیر و ایرانین خام نفت تداروکو و پترو-کیمیا محصوللاری‌نین ایخراجینی آرتیرماق کیمی بؤیوک تعهدلاری واردیر. ایران ایسلام جمهورییتی‌نین بو سندده‌کی اؤزونه مخصوص اوستونلوکلری چین بیلیم‌یوردلاریندا فارس دیلی‌نین تدریسی‌نین گلیشمه‌سی، ایران بانکلاری‌نین چینین سربست تیجارت بؤلگه‌لرینده شعبه و یا نمایندگی آچماسینا ایجازه وئرمه‌سی و مشترک بانکین قورلولماسیدیر.
ایران و چین آراسینداکی 25 ایللیک ایشبیرلیگی سندی ایران ایسلام جمهورییتی‌نین بیر خاریجی اؤلکه‌یه وئردیگی ایمکانلار و ایمتیازلار باخیمیندان میثیل‌سیزدیر. بو ایشبیرلیگی آنلاشیلماسی چین خالق جمهورییتی‌نین جمهور باشقانی «شی جین پینگین» ایسلام جمهورییتی لیدری آیت الله علی خامنه‌ای ایله 1394-جی ایلین بهمن آیی گؤروشونده وورغولانمیشدیر.
ایسلام جمهورییتی‌نین آنایاساسینا گؤره ایران مجلیسی‌نین ایرانین سنده قوشولماسینا دایر قرار وئرمه‌سی لازیمدیر، آنجاق آیت الله خامنه‌ای 5 ایل اؤنجه بو سندی «دوزگون و بیلگه» آدلاندیردی، یعنی مجلیسین اونو تصدیق‌له‌مکدن باشقا چاره‌سی یوخدور.
