ایران دا قاشقایی تورکجه سی ایله بیرینجی رومان چاپ اولدو
▪️ قاشقایی یازار و شاعیر داوود حسن آقایی نین گوجلو قلمیندن سوزولن «حیاسلطان» رومانی چاپدان چیخدی.
▪️ایران جوغرافیاسیندا قاشقایی لهجه‌سی ایله یازیلمیش اولان بیرینجی اوزون رومان «حیاسلطان» تهراندا «۱۱۴» (یوز اون دؤرد) انتشاراتی واسطه‌سی ایله ۷۳۶ صایفادا یایینلاندی.
▪️بو اثر، یازارین ایکینجی رومانی‌دیر. داوود حسن آقایی کشکولی‌نین فارسجا یازدیغی بیرینجی رومانی «ظلمت»ده قاشقایی حیاتی‌نین بیر بوجاغینی گؤزلر اؤنونه سرمیشدیر.
▪️آنجاق ایکینجی رومانی قاشقایی ائلی‌نین دبلریندن باشقا لایه‌لری گؤز اؤنونه گتیرمکدن علاوه، قاشقایی تورکلری‌نین اؤز لهجه‌سینده یازیلمیشدیر.
▪️اونون یاراتدیغی بدیعی صحنه‌لر و قاشقایی‌نین یاشاییشی‌نین سیرلاری، رمزلری و طبعیتله یولداشلیغی انسانی درین فیکره جومدورور.
▪️«حیاسلطان»، قاشقایی تورکلری‌نین یاخین گئچمیشیندن بیر عشق روایتی دیر.
▪️بو رومان قاشقایی‌لر ایچینده بیر زامانلار آشاغی طبقه حساب اولونان سلمانی‌لیک (بربرلیک) ایشنده و طایفاسیندا اولان بیر اوغلانین (ایلدیرم) بیر یوخاری طبقه‌دن اولان قیزا (حیاسلطان) علاقه‌سی‌نین داستانی‌دیر.
▪️بونلارین اورتاسیندا تیکان اولوب آیریلیق سالان یانلیش عقیده‌لرین نماینده‌سی قیز طایفاسی‌نین آغ ساققالی و عینی زاماندا قیزین آناسی‌نین داییسی اولان قیلیجعلی‌دیر.
▪️قیلیجعلی‌نین وئردیگی اویاریلارا عمل ائتمه‌دیکدن سونرا اؤزو عمله گئچمه‌لی اولور و گؤزداغی آلماق اوچون اوغلانی توتوب دؤیه دؤیه گتیریر اؤز یوردوندا زندانی ائله‌ییر.
▪️قاباقکی ظولملرینه علاوه اولان بو یئرسیز ظولم سبب اولور یاخشی اخلاقلی اممی اوغولوسو زالی بگ فرصتی مناسب بیله و آغ سقللیک و کدخودالیک اونون الیندن آلماق اوچون بونون شکایتینی کلانترین یانینا آپارا.
▪️کلانترین خانیمی زالی بگدن سؤز آلیر کی اونلاری بیربیرینه چاتدیرماق اوچون الیندن گلنی اسیرگه‌مه‌سین. زالی بگ سؤز وئریر آنجاق ….
