ایران حبس‌خانالاریندا اعدام دالغاسی؛ داها ۶ محبوس اعدام ائدیلدی
ایرانین محکمه سیستمی طرفیندن گئنیش یاییلمیش اعدام دالغاسی‌نین داوامی اولاراق، کرج و مشهد حبس‌خانالاریندا داها ۶ محبوس آسیلیب.
حال وش حوقوق مودافیه تشکیلاتی‌نین راپورونا گؤره، ۱۹ مرداد جوما آخشامی سحر مشهدین وکیل آباد حبس‌خاناسیندا ایکی بلوج محبوسون اعدام حؤکمو گیزلی شکیلده و عائله‌‌‌لری‌نین خبری اولمادان حیاتا کئچیریلیب.
کیملیکلری ۴۵ یاشلی حمید براهویی (بریچی) و ۴۴ یاشلی احمد نارویی اولدوغو تصدیقلنن بو ایکی محبوس “نارکوتیک” اتهامی ایله بیرگه آچیلان جینایت پرونده‌سینده اعدام جزاسینا محکوم ائدیلیبلر.
هنگاو حوقوق مودافیه تشکیلاتی دا سون بیر هفته ایچینده کرج شهری‌نین مرکزی حبس‌خاناسیندا ان آزی دؤرد محبوسون گیزلی اعدام ائدیلمه‌سی باره‌ده بیلگی یاییب.
هنگاوین خبرینه گؤره، امیر جهانگیری، جواد بازگری، سجاد نظری و محسن شرفی،آدلی بو دؤرد محبوسون اعدام حؤکمو ۱۵ مرداد ۱۴۰۲-جی ایل بازار گونو کرج مرکزی حبس‌خاناسیندا ایجرا ائدیلیب.
بو دؤرد محبوس نارکوتیکله باغلی جینایتلره گؤره آیری-آیری پرونده‌لرده حبس ائدیلمیش و ایران ایسلام جمهورییتی‌نین محکمه سیستمی طرفیندن اعدام جزاسینا محکوم ائدیلمیشدیر.
ایسلام جمهورییتی‌نین محکمه سیستمی طرفیندن اعدام حؤکملری‌نین ایجراسی سون آیلاردا گؤرونمه‌میش درجه‌‌‌ده سرت اولوب و تکجه بو ایل ۹ و ۱۰ مرداد دا ایراندا ان آزی ۱۱ بلوج محبوس و بیر افقان محبوس آسیلیب.
ایران اینسان حاقلاری تشکیلاتی‌نین راپورونا گؤره، ۲۰۲۳-جو ایلین باشیندان ایراندا ۱۰ نفری قادین اولماقلا آزی ۴۴۹ نفر اعدام ائدیلیب.
