ایرانین مین شهرینده سینما یوخدور
کولتور و اینجه‌صعنت گلیشمه انستیتوسونون مودورو ایراندا مینلرله شهرده سینمانین اولمادیغینی و 120 شهرده اجتماعی کیتاب‌خانالارین اولمادیغینی آچیقلادی.
امین عارف‌نیا علاوه ائتدی کی، ایراندا آدام‌باشینا یاشیل ساحه 11 متر مربع، آدام‌باشینا دوشن تحصیل ساحه‌‌‌سی بئش متر مربع، آدام‌باشینا دوشن ایدمان ساحه‌‌‌سی بیر متر مربع، آدام‌باشینا دوشن کولتور ساحه‌‌‌سی 20 سانتیمتردیر.
1395-جی ایلین ایستاتیستیکاسی گؤستریر کی، هرمزگان‌دا هر 4 مین 712 نفره بیر سینما اوتوراجاغی و زنگان‌دا هر 4 مین 598 نفره اوچون بیر سینما اوتوراجاغی واردیر و بو ایالتلر اؤلکه‌ده اهالییه دوشن ان آز سینما اوتوراجاقلارینا صاحبدیرلر.
سیستان و بلوچیستان‌دا هر 3 مین 828 نفره بیر، ایلام هر 2 مین 736 نفره بیر و قزوین هر 1550 نفره بیر سینما اوتوراجاغی ایله سونراکی سیرالاردا یئر آلیرلار.
آیریجا، سیمنان هر 310 نفره بیر اوتوراجاق، تهران هر 312 نفره بیر اوتوراجاق، یزد هر 346 نفره بیر اوتوراجاق، بوشهر هر 380 نفره بیر اوتوراجاق و گونئی خوراسان هر 435 نفر اوچون بیر اوتوراجاقلا اؤلکه‌نین ایالتلری آراسیندا آدام‌باشینا ان چوخ سینما اوتوراجاقلاری اولان شهرلر آراسیندا یئر آلیرلار.
