ایرانلیلار بؤیرک ساتماق اوچون عراقا گئدیرلر
کیرمانشاه بؤیرک خسته‌لرینه دستک درنگی‌نین رئیسی “پیس اقتصادی دوروم” سببیندن بؤیرک ساتیشی اوچون باشورانلارین سایی‌نین آرتدیغینی آچیقلاییب و بعضی اینسانلارین بؤیرکلرینی ساتماق اوچون عراقا گئتدیگینی بیلدیریب.
حسین بیگلری خبر آنلاین سایتینا دئییب: چوخ آدامدان ائشیتمیشم کی، داها چوخ پول قازانماق اوچون عراقدا بؤیرکلرینی ساتاجاقلار.
او آرتیردی: “بیز گومان ائدیریک کی، عراقلیلار ایرانا گلیب بؤیرکلرینی ساتماق ایسته‌ین بیرینی تاپیرلار، لاکین ایراندا خاریجی اؤلکه وطنداشلارینا عضو نقلی قاداغان اولوندوغو اوچون اونلار همین شخصی عراقا دعوت ائدیر، اورادا دا دلار وئریرلر و عضو نقلی ائدیرلر.”
بیگلری ایراندا بؤیرک ساتیشیندان دا دانیشیب و دئییب، تهراندا بؤیرگین ساتیش قیمتی داها یوکسکدیر، اورادا دلالار وار و بؤیرکلرین قیمتینی اونلار بللی ائدیر، بونا گؤره ده بؤیرک باغیشلایانلار چوخ واخت تهرانا گلیرلر.
او، آرتیریب کی، قانونا گؤره، تهراندا بؤیرکلرین باغیشی بو شهرین ساکینلری ایله محدودلاشدیغیندان، باشقا ساتیجیلار منزیل املاکلاری ایله رسمی اولمایان آنلاشما باغلایاراق، اؤزلرینی بو شهرین ساکینلری کیمی تقدیم ائدیرلر. تهراندا بؤیرگین قیمتی بعضاً ۳۰۰ میلیون تومنه چاتیر.
ایراندا هر ایالتده یاشایان بؤیرک باغیشلایان اینسانلار بؤیرک خسته‌لرینه دستک درنکلری طرفیندن حاضرلانیر و باشورانلار ساغلیق ناظرلیگینه تقدیم ائدیلیر و عادتاً باغیشلایانا بیر مبلغ هدیه اولاراق وئریلیر.
بو مبلغین میقداری ان چوخ ۸۰ میلیون تومن بللی ائدیلیب، آنجاق بعضاً طرفلر آراسیندا درنکدن کنار داها یوکسک قیمتلرله آنلاشما باغلانیر کی، بو دا رسمی اولاراق قانونی دئییل.
عراقین و سلیمانیه‌سینده بوتون ایران وطنداشلاری‌نین ساتیشی آرتیق مانشئتلره چئوریلمیشدی. آرمان ملی قزئتی ۱۳۹۵-جی ایلده یازیب کی، بؤیرک دلاللاری بعضی اینسانلاری بؤیرکلرینی ساتماق و ۱۴۰ میلیون تومن آلماق اوچون عراقین سلیمانیه‌سینه گئتمه‌یه تشویق ائدیر.
بوندان اؤنجه بؤیرک خسته‌لری درنگی‌نین ایداره هئیتی‌نین رئیسی مصطفی قاسمی دئمیشدی کی، بعضی شخصلرین کوردوستان ایالتی واسطه‌‌‌سیله بؤیرکلرینی ساتماق اوچون خاریجه گؤندریلدیگی باره‌ده درنه‌گه خبرلر گلیب.
