ایران‌دا درمانلارین قیمتی ۵ قات آتیریب
ایرانین اساس درمان تداروکچولریندن بیری اولان زهراوی اجزاچیلیق شرکتی، قیدا و درمان تشکیلاتی طرفیندن وئریلن ایجازه ایله اورونلری‌نین ساتیش قیمتینی ۵ قات، یعنی یوزده ۴۱۵ آرتیریب.
امک و سوسیال ریفاه ناظرلیگینه باغلی سوسیال ریفاه تشکیلاتینا مخصوص یاری حؤکومت زهراوی اجزاچیلیق شرکتی ۱۱ دی گونو قیدا و درمان تشکیلاتیندان آلدیغی ایجازه ایله ۱۶ اورونونون قیمتینی یوزده ۱۲-دن یوزده ۴۱۵ قدر آرتیریب.
تخمیناً بیر آی اؤنجه ساغلیق ناظری محمدرضا ظفرقندی درمان اوچون وئریلن دؤویزین لغو ائدیلدیگینی اعلان ائده‌رک، درمانلارین نیمایی دؤویز ایله گتیریله‌جه‌یینی بیلدیریب.
اونون سؤزلرینه گؤره، طبی آوادانلیقلارین ترجیحی دؤویز ایله گتیریلمه‌سی ده آرادان قالدیریلاجاق.
ظفرقندی عینی زاماندا سؤز وئریب کی، بو دؤویزلرین وئریلمه‌مه‌سی خسته‌لره تضییق ائدیلمه‌سینه نه‌دن اولمایاجاق.
آبان آییندا ۱۴۰۴ سایلی بودجه قانون لاییحه‌‌سینده بللی اولدو کی، مسعود پزشکیان حؤکومتی اساس ماللارین ایدخالی اوچون دؤویزی ۱۲ میلیارد یورویا قدر آزالتماغی پلانلاشدیریر کی، بو دا ایندیکی حالیندان یوزده ۲۰ آزدیر.
باشقا طرفدن، بو دؤویز واحیدی‌نین مظنه‌‌‌سی ۱۰ مین تومن آرتاراق ۲۸ مین ۵۰۰ تومندن ۳۸ مین ۵۰۰ تومنه یوکسله‌جک.
زهراواری‌نین اورونلری‌نین قیمتینی آرتیردیغی ایجازه‌ده درمانین ترجیحی دؤویزینه و اونون قیمتی‌نین آرتدیغینا گؤره بیلگی وئریلمه‌ییب.
ایران‌دا اقتصادی شرایطی موشاهیده ائدنلرین فیکرینجه، درمان ایدخالی اوچون دؤویزین تورو و قیمتینده‌کی ديیشیکلیکلرین ائتکیسی داها سونرا اورتایا چیخاجاق.
