ایراندا داها ۶ محبوسون اعدام ائدیلمه‌سی؛ سون بیر آیدا هر ایکی گونده ۵ نفر آسیلیب
چارشنبه گونو، ۱۰ آبان کرجین قزلحصار و یاسوج حبس‌خانالاریندا ۶ محبوسون اعدام حؤکمو ایجرا ائدیلیب. یاسوج حبس خاناسیندا اعدام ائدیلنلردن بیری قادین ایدی.
هنگاو حوقوق ساوونما تشکیلاتی‌نین راپورونا گؤره، سون بیر آیدا ایراندا اورتالاما هر ایکی گونده بئش محبوس اعدام ائدیلیب.
ایرانداکی حوقوق ساوونوجولاری قروپونون خبر اورقانی اولان هرانا خبر آژانسی‌نین بیلگیلرینه گؤره، اؤنجه‌لر قتل تؤرتمکده تقصیرلی بیلینن دهدشت وطنداشی مریم فروغ منش‌ین حؤکمو چارشنبه گونو سحر ساعتلاریندا یاسوج حبس‌خاناسیندا ایجرا ائدیلیب.
هرانا داها اؤنجه ایراندا ۲۰۲۳-جو ایلده ان آزی ۱۷ قادین محبوسون اعدام ائدیلدیگینی بیلدیرمیشدی.
آیریجا چارشنبه گونو کرجده‌کی قزلحصار حبس‌خاناسیندا داها اؤنجه‌دن “نارکوتیک جینایتلری ایله باغلی اتهاملار”، “قصداً آدام اؤلدورمه” و “زورلاما” اتهاملاری ایله اعدام جزاسینا محکوم ائدیلمیش ۶ محبوس اعدام ائدیلیب.
اعدام ائدیلنلر آراسیندا احسان حداد، عباس انارکی و سوی آدی بللی اولمایان بهروز آدلی شخص، افقانیستان وطنداشی صادق تاجیک و لورستان ایالتی‌نین کوهدشت شهریندن اولان یدالله فروخی، ده وار.
مهر آیینین ۲۶-سی سحری بو حبس‌خانادا ۱۰ نفر آسیلمیشدی.
