ایراندا تویوغون رسمی قیمتینده ۴۵۰۰ تومن آرتیم اولدو
“ایران تویوق اورقانیزه قرارگاهی” یئنی قراریندا تویوق قیمتینی یوزده ۲۲ آرتیردی. بونا گؤره، تصدیقلنمیش تویوق قیمتی هر کیلو اوچون ۲۰ مین ۴۰۰ تومندن ۲۴ مین ۹۰۰ تومنه یوکسلدی.
ایرانداکی مئدیانین وئردیگی بیلگیلره گؤره، بو قرار ۱۲ فروردین ۱۴۰۰-جو ایلده ایراندا تویوق اورقانیزه قرارگاهی طرفیندن قبول ائدیلدی.
۱۳۹۹-جو ایل آبان آیینین باشلاریندا “بازار تنظیمله‌مه قرارگاهی” بیر کیلو تویوق اوچون ۲۰ مین ۴۰۰ تومن قیمتینی تصدیقله‌میشدی.
ایندی تویوق اورقانیزه قرارگاهی اکینچیلیک ناظری نظارتی آلتیندا قورولدو و تویوق قیمتینی دؤرد مین بئش یوز تومن آرتیردی.
سون آیلاردا اؤلکه‌ده تویوق چاتیشمازلیغی آچیق بازاردا هر کیلو تویوق قیمتی‌نین ۴۰ مین تومندن چوخ چاتماسینا سبب اولدو و بوندان اؤتورو ساتیجیلار تویوغو پارچالارا بؤلوب ساتیردیلار.
آیریجا، ایراندا سون آیلاردا تویوق، یومورتا و یاغین باها اولماسی سببیندن ماغازالارین گیریشلرینده اوزون نؤوبه‌‌لر یارانمیشدی.
iranwire
