ایراندا اوچ داعش عضوو اوچون ۱۸ ایل حبس وئریلدی
تهران ایالتی‌نین بیرینجی جینایت محکمه‌‌سی « اینتیحار عملیاتلاری آپارماق» اوچون ایرانا داخیل اولان داعش قروپونون اوچ عضوونون حؤکملرینی آچیقلادی.
بو موتهیملر ایکی عراقلی و بیر ایرانلی گنجدیر کی اوچ ایل اؤنجه ۲۱ نفرلیک بیر تیم اولاراق ایرانا گیرمیشدیلر و سرحد کندلریندن بیرینده توتوقلاندیلار.
قروپون بئش عضوو ایران قوه‌لری ایله سلاحلی قارشیدورمادا اؤلدورولدو، ۱۶ نفری ده توتوقلاندیلار.
بو عملیاتدا اوچ ایران عسکری ده اؤلدو.
بو قروپون عضولری تهرانا کؤچورولدوکدن سونرا اینقیلاب محکمه‌‌سینده محاربه اتهامی ایله موحاکیمه اولوندو و ۱۸ یاشیندان کیچیک اوچ موتهیمین پرونده‌سی تهران ایالتی‌نین جینایت محکمه‌‌سینه گؤندریلدی.
پرونده‌لری‌نین ایلک دوروشماسی بو ایل ۲۱ مرداد تاریخینده جزا محکمه‌‌سی‌نین ۵ سایلی شؤبه‌سینده کئچیریلدی و بو موتهیملر محکمه‌‌دن سونرا حؤکم گؤزله‌ییردیلر، لاکین حؤکملری دونن چیخدی.
بو پرونده‌ده توتوقلانان ۱۴ و ۱۷ یاشلاریندا اولان ایکی عراقلی موتهیم، هر بیری محاربه اتهامی ایله 5 ایل حبس جزاسی آلدی، آیریجا سلاح داشیدیقلارینا گؤره بیر ایل حبس جزاسینا و ایراندان ایخراج ائدیله‌رک عراق اطلاعات قوه‌لرینه تسلیم ائدیلمکله محکوم ائدیلدیلر.
حبس اولونارکن ۱۶ یاشیندا اولان ایرانلی موتهیم محاربه اتهامی ایله ۵ ایل حبس، آیریجا سلاح داشیدیغینا گؤره بیر ایل حبس جزاسینا محکوم ائدیلدی و یاشادیغی یئری ترک ائتمه‌سینه ایکی ایل قاداغا قویولدو کی، بو موتهیم ایکی هفته‌ده بیر یاشادیغی یئرده‌کی پولیسه معلومات وئرمه‌لیدیر.
ایران قزئتی یازیب «هر اوچ موتهیمه محاربه اتهامی ایره‌لی سورولسه ده، حبس ائدیلدیکلری زامان ۱۸ یاشیندان کیچیک اولدوقلاری اوچون اؤلوم جزاسینا محکوم ائدیلمه‌دیلر.»
