ایرانداکی کرونا؛ کرونانین یاراتدیغی قیرمیزی وضعیتینده بئله اربعین مراسیمی تعطیل اولمایاجاقدیر
ایراندا کروناسیز یئگانه یاشیل بؤلگه «ابو موسی آداسی»نی اولدوغونو سؤیله‌ین صحیه ناظرلیگی‌نین سؤزچوسو، اؤلکه‌دکی قیرمیزی و خبردارلیق وضعيتینده اولان ایالتلرین گئچمیش گونله عینی اولدوغونو بیلدیردی.
بئله‌لیکله، ایرانین 27 ایالتی قیرمیزی و خبردارلیق وضعيتینده اولسا دا، ایسلام تبلیغات تشکیلاتی «ایمام حسین» روضه‌لری‌نین باغلانامایاجاغی و شیعه تقلید مرجع‌سی آیت الله «وحید خوراسانی»ده محرّم ماتمی‌نین باغلانمامالی اولدوغونو بیلدیردی.
دونن کرونا ایله موباریزه اوزره قورولان میلی قرارگاه، ایسلام تبلیغات تشکیلاتی کیمی قوروملاردان محرّم آیی مراسیمی‌نین نئجه کئچیریلمه‌سی باره‌ده گؤروشلرینی ایسته‌میشدی. آنجاق ایسلام تبلیغات تشکیلاتی کرونانین ایراندا یاییلماسی و محرّم مراسیمی‌نین کئچیریلمه‌سی ایله باغلی ناراحاتلیقلارا توخوناراق، ایمام حسین روضه‌لری‌نین باغلانماسی‌نین ایمکانسیز اولدوغونو و بو مراسیملرین هوندور تاوانلاری اولان آچیق و یا قاپالی مکانلاردا هوسله کئچیریله بیله‌جه‌یینی دئدی.
شیعه تقلید مرجع‌سی اولان آیت الله «وحید خوراسانی»ده اربعین مراسیمی‌نین کرونا شرایطینده کئچیریلمه‌سی ایله باغلی بیر سؤالا وئردیگی جاوابیندا یازدی: «اهل بِیت آیینلری و خوصوصیله حضرت سیدالشهدانین یاس مراسیمی باغلانمامالی، لاکین ساغلیق جهتلره و موتخصیصلرین تؤوصیه ائتدیکلرینه اویغون اولمالیدیر.»
اربعین یوروش یوللاریندان بیری اولان خوزستان ایالتی ایکی آیدان چوخدور کی، کرونا باخیمیندان قیرمیزی وضعيتینده‌دیر. گؤروندویو کیمی، حاکیميت بو ایالتده اینسانلارین ساغلاملیغی و گونده‌لیک اؤلوملریندن داها چوخ 1400 ایل اؤنجه اؤلنلر اوچون یاس مراسیملرینی نئجه کئچیریلمه‌سینی دوشونور. بو سببدن، خوزستان والیسی اربعین اوچون حاضرلیق ایشلری ایله علاقه دار گؤرولن تدبیرلره توخوناراق، زوارلاری قارشیلاماغا حاضر اولدوقلاری اعلان ائتدی و کرونا ایله موباریزه اوزره قورولان میلی قرارگاها و اربعین میلی قرارگاهی‌نین بو مراسیمین کئچیریلمه‌سی اوچون لازیم گؤردویو قرارلاری قبول ائده‌جه‌یینی سؤیله‌دی.
اهوازداکی «رازی» خسته‌خاناسی‌نین رئیسی «فرهنگ کره‌بندی»، خسته‌خانادا چوخ سایدا بوش یاتاغین اولدوغونو سؤیله‌یه‌رک، آی‌سی‌یو یاتاقلاری‌نین توتومونون هله ده دولو اولدوغونو سؤیله‌دی، آنجاق عومومیلیکده خسته‌لرین خسته‌خانایا قبولو آزالدیقجا اؤلوم نیسبتی ده آزالیر دئدی.
کرونا خسته‌لیگی اولان و مرخصی احتیاجی اولان سیاسی محبوسلار بو حوقوقدان محروم قالیر و هر گون داها چوخ اینسان حبس اولونور. اؤلکه‌نین حبس‌خانالار و تعلیم تشکیلاتی‌نین رئیسی، محبوسلارا کرونا شرایطینده مرخصی وئریلمه‌سی‌نین داوام ائتدیگینی سؤیله‌دی. «مهدی حاج‌محمدی»نین معلوماتینا گؤره، کروناویروسون یئنی دالغاسیندا و 18 تیردن بو گونه قدر 36 میندن چوخ محکوم بو مرخصیدن یارارلانیب و یا اوّلکی مرخصی مدتلری اوزادیلمیشدیر و بو پروسه داوام ائدیر.
یئنی تدریس ایلینده قیرمیزی بؤلگه‌لرده آنلاین و ساری بؤلگه‌لرده اوز اوزه و آنلاین تحصیلین بیر‌لشدیریله‌جیی سؤیلنسه ده، تحصیل ناظری ادعا ائتدی. اینتِرنِتدن ایستیفاده ائده بیلمه‌ینلره درسه کئچمک اوچون مکتبلر باشقا یوللارلا تدریسه باشلایاجاقلار.
حاجی‌میرزایی حؤکومتین مکتبلره پول اؤده‌یه بیلمه‌دیکلری زامان و مکتبلرین جاری خرجلرینی اؤده‌یه بیلمه‌دیگی زامان بو قونودا نه ائده بیله‌جکلرینی آچیقلاماییب. حاجی میرزایی، همچینین «سامانه شاد»داکی تحصیل فعالیتلری‌نین اینتِرنِت خرجلری‌نین پولسوز اولدوغونو قئید ائتدی و بو ایل ده اونو پولسوز ائتمک نيتینده اولدوقلارینی سؤیله‌دی.
قئید ائدک کی، شاد سیستمی اوچون اینتِرنِتین کئچن ایل پولسوز اولدوغو دوغرو دئییلدی و ایلتیشیم و تکنولوژی ناظری «محمدجواد آذری جهرمی»نین وعده‌سینه اساساً بو سیستمین یئگانه اینتِرنِت ديَری 25 اردیبهشت‌دن خردادین سونونا قدر پولسوز ایدی. بونا گؤره یئنی ایلده پولسوز اولماسی ادعاسی‌نین نه درجه‌‌‌ده اعتبارلی اولدوغونو گؤرمک اولار.
صحیه ناظرلیگی‌نین معاونی «قاسم جان‌بابایی»، مازانداران، رضوی خوراسان و فارس ایالتلرینده کرونانین آرتان سئیرینه توخوناراق دئدی: مؤوجود گئدیشات داوام ائتدیکجه، ویروسون یاییلاجاغینی تخمین ائتمک مومکون دئییل و بو ایالتلرده ویروس یاییلماسی‌نین پیک نؤقطه‌‌‌سی‌نین نه واخت بیته‌جیی معلوم دئییل. جان‌بابایی‌نین سؤزلرینه گؤره، اوشاقلاردا کروناویروس حاللاری کئچن ایلین ایسفند آیینا گؤره آرتمیشدیر.
تبریز طبّ علملری بیلیم‌یوردونون معاونی «روزبه رجایی»، 29 تیر تاریخینه قدر ایالتین خسته‌خانالاریندا 870 نفردن چوخ اینسانین خسته‌خانایا قالدیریلدیغینا دقت چکرک دئدی؛ بونلاردان 200 نفری رئانیماسییا شؤبه‌سینده، 113 نفری‌نین ایسه مکانیکی بیر تنفوس جیهازینا قوشولدوغونو سؤیله‌دی. او علاوه ائدیب کی، سون هفته‌لرده کروناویروسون یاییلماسی آرتماقدادیر.
تخمیناً بیر هفته‌دیر کی، قیرمیزی وضعيتینده اولان البرز ایالتینده، سون 24 ساعت عرضینده البرز ایالت خسته‌خانالاریندا 115 نفرین خسته‌خانایا یئر‌لشدیریلمه‌سینه توخونان ایالت طبّ علملری بیلیم‌یوردونون رئیسی، حاضردا 651 کرونا خسته‌سی‌نین خسته‌خانایا یئر‌لشدیریلدیگینی سؤیله‌دی.
اونون سؤزلرینه گؤره، ایالتده حاضیردا 143 آغیر خسته وار. دکتر حسن کریمین سؤزلرینده اولان قریبه شئی اوندان عبارت ایدی کی، بو ایالتده کرونا خسته‌لیگی باشلاناندان بری، 8،464 نفرین خسته‌خانایا یئر‌لشدیریلدیگینی و عینی واختدا 10 مین دؤرد نفرین بو خسته‌لیکدن قورتولدوغونو و خسته‌خانادان بوراخیلدیغینی ادعا ائدیر. یعنی خسته‌خانادان چیخانلارین سایی خسته‌خانایا یئر‌لشدیرمه ساییندان چوخدور، بو دا مومکون دئییل؛ بو سؤزلری یا بیر معجزه‌‌نی گؤستریر یا دا بو صؤحبتلرین آنلاتیمیندا بیر صحو اولوب!
فارس ایالتی بیر نئچه گوندور قیرمیزی وضعيتده‌دیر. شیراز طبّ علملری بیلیم‌یوردونون معاونی، بو ایالتده کرونا سببییله آرتان اؤلوم حاللاری‌نین چوخ ناراحاتلیق دوغوردوغونو ایفاده ائده‌رک، فارس ایالتینده سون 48 ساعت عرضینده 31 نفرین داها اؤلدویونو آچیقلادی. ایندی 1.228 شوبهه‌لی و کرونا علامتلی خسته ایالتین موختلیف خسته‌خانالارینا یئر‌لشدیریلمیشدیر.
قوزئی خوراسان ایالتی‌نین طبّ علملری بیلیم‌یوردونون مودورو «سیداحمد هاشمی» قئید ائتدی کی، اؤنجه‌لر تستلرین یالنیز 15 فایزی موثبت اولوردو آنجاق، حال حاضیردا کروناویروسلو اینسانلارا تشخیص قویماق اوچون آپاریلان تستلرین 70 فایزی موثبتدیر.
دکتر هاشمی، ایالتده کرونا خسته‌لیگی و اؤلوم حاللاری‌نین آرتدیغینی و ایالت خسته‌خانالاریندا خسته‌خانایا یئر‌لشدیریلمه‌لرین سایی‌نین اوچ قات آرتدیغینی خبردار ائده‌رک علاوه ائتدی کی، بو وضعيت داوام ائتدیکجه ایالتین خسته‌خانا یاتاقلاری‌نین توتومو مردادین سونونادک کیفایت ائتمه‌یه‌جکدیر.
سون گونلرده کرونانین قیرمیزی مرحله‌‌‌سینه قدم قویان کرمان ایالتینده، کرمان طبّ علملری بیلیم‌یوردونون سؤزچوسو «مهدی شفیعی»، بو ایالتده سون 24 ساعت عرضینده کرونا سببییله 15 نفرین اؤلدویونو آچیقلایاراق دئدی کی، بو مدت عرضینده کرمان ایالتی‌نین خسته‌خانالارینا 92 خسته قبول ائدیلدی و ایالته قبول اولونان قطعی خسته‌لرین سایی 364 نفره چاتدی.
ایلامدا طبّ علملری بیلیم‌یوردونون رئیسی، کرونا خسته‌لری‌نین سایی‌نین 4.972 نفره یوکسلدیگینی آچیقلادی. او بیلدیریب کی، دونن گئجه ایالتده 103 یئنی کرونا خسته‌لیگی آشکارلانیب و خسته‌لیک نتیجه‌سینده 3 نفر حیاتینی ایتیریب.
اونون سؤزلرینه گؤره، ایالتده کرونا اؤلوم نیسبتی خرداد آییندان بری بئش قات آرتمیشدیر و بیر آیا یاخین بیر مدت عرضینده مینه یاخین طبّ آلانیندا چالیشان کرونایا یولوخموشدور.
کرونانین ایکینجی دالغاسی‌نین دا بیرینجی دالغا کیمی آغیر اولدوغو مازانداراندا والی، حؤکومت ایشچیلری‌نین اوچده بیری‌نین آرتیق اوزاقدان ایشله‌دیگینی و یوکسک ریسکلی اینسانلارین اوفیسلره گئتمه‌سی‌نین لازیم اولمادیغینی قئید ائتدی. او، ایالتده‌کی 13 شهرین قیرمیزی وضعيتده اولدوغونو سؤیله‌دی.
مازانداران بیلیم‌یوردونون رئیسی «سیدعباس موسوی»، دونن گئجه ایالتده کرونا شوبهه‌لی اولان 339 خسته‌نین خسته‌خانایا یئر‌لشدیریلدیگینه توخوناراق، مازاندارانداکی خسته‌خانالارا یئر‌لشدیریلنلرین سایی‌نین 1659 نفره چاتدیغینی بیلدیردی.
مازانداردان داها یاخشی وضعيتده اولسا دا گیلاندا خسته‌لیگین وضعيتی ده ناراحات ائدیجیدیر. گیلان طبّ علملری بیلیم‌یوردونون رئیسی دونن گئجه 78 یئنی کرونا شوبهه‌لی‌نین خسته‌خانایا گتیریلدیگینی و خسته‌لیگین ایالتده آرتماقدا اولدوغونو بیلدیره‌رک دئدی کی، حاضیردا 319 نفر کرونا خسته‌سی گیلانداکی اؤزل و دؤولت خسته‌خانالارینا یئر‌لشدیریلمیشدیر و خسته‌لرین سایی اؤتن آیا نیسبتاً ایکی قات آرتیبدیر.
کرمانشاه ایالتی‌نین طبّ علملری بیلیم‌یوردونون رئیسی، بو ایالتده تیر آییندا کئچن ایل اسفند آیینا گؤره کرونا سببیندن اؤلنلرین سایی‌نین 10 قات آرتماسینا توخوناراق دئدی؛ بو گونه قدر ایالتده کرونادان اؤلنلرین سایی 400نفردن چوخدور و ایالتده کرونا خسته‌لیگینه یولوخما سون گونلرده بیر قدر آزالسا دا، قیرمیزی شرایطدن کئچمک زامان آپارار و ایالت هله ده قیرمیزی وضعیتده‌دیر.
صحیه ناظرلیگی‌نین سؤزچوسو «سیما سادات سالاری»، بو گون وئردیگی راپوردا، ایراندا کروناسیز یئگانه یاشیل بؤلگه‌نین «ابو موسی آداسی»نی اولدوغونو سؤیله‌دی. او اؤلکه‌دکی قیرمیزی و خبردارلیق وضعيتینده اولان ایالتلرین گئچمیش گونله عینی اولدوغونو بیلدیردی. آنجاق سؤزچو دونن وئردیگی راپورا خبردارلیق وضعیتینده اولان ایالتلرین آدینی چکمه‌دیگینی اونوتموشدو. بئله‌لیکله دئمک اولار کی، دوغو آذربایجان، ایلام، بوشهر، رضوی خوراسان، خوزستان، زنگان، گلستان، مازانداران، کرمان و فارس ایالتلری قیرمیزی وضعیتده‌دیر.
صحیه ناظرلیگی‌نین و بیلیم‌یوردلاری‌نین یایدیغی معلومات و استانداردلارا اساساً، تهران، البرز، گونئی خوراسان، سیستان و بلوچیستان و کرمانشاه ایالتلری حاضیردا قیرمیزی وضعیتده و باتی آذربایجان، هرمزگان، کوردستان، قوم، اردبیل، اصفهان، کهگیلویه‌وبویراحمد، لرستان، همدان، یزد و قوزئی خوراسان دا خبردارلیق وضعیتده‌دیر.
سون اولاراق قئید ائتمک لازیمدیر کی، صحیه ناظرلیگی‌نین سؤزچوسو «سیما سادات‌لاری»، هر گون اولدوغو کیمی اوزرینده اوینانمیش ایستاتیستیکایی آچیقلادی او بو مدتده 2414 نفره کرونا تشخیصی قویولدوغونو، اونلاردان 1641 نفری‌نین خسته‌خانایا یئر‌لشدیریلدیگینی و توپلام اولاراق دا 276 مین 202 نفرین یولوخدوغونو سؤیله‌دی. عینی زاماندا دیگر 217 خسته اؤلدو و ایراندا کرونادان قایناقلانان اؤلوم ساییسی‌نین توپلامی 14 مین 405 نفره چاتدی.
