ایرانداکی کرونا؛ مینو محرز: بیلیم‌یوردونا گیریش ایمتاهانی گئجیکمه‌لیدیر، یوخسا هرکس یولوخور
6 مرداد (27 ژوئیه)
مجلیسین صحیه کمیسیونونو رئیسی حسن روحانی‌یه یازدیغی مکتوبدا بیلیم‌یوردلارینا گیریش ایمتاهانینی تاخیره سالماغی خواهش ائتدیکدن سونرا، کرونا میلی قرارگاهین علمی کومیته‌سی‌نین عضوو «مینو محرز»،ده گیریش ایمتاهانی‌نین تاخیره سالینماسینی ایسته‌دی. «ایرج حریرچی»، صحیه ناظرلیگی‌نین معاونی دئدی کی، بیلیم‌یوردونا گیریش ایمتاهانی‌نین هارادا و نئجه کئچیریله‌جیی ایله باغلی قرار وئریجی مرجع میلی کرونا قرارگاهیدیر، لاکین هئچ کیم گیریش ایمتاهانی اوچون شهرینی ترک ائتمه‌یه‌جکدیر.
حؤکومت سؤزچوسو اوفیسی‌نین رسمی آچیقلاماسیندا، حؤکومتین سؤزچوسو «علی ربیعی»ده، کئچن هفته‌نین سونلاریندا شوبهه‌لی کرونا علامتلری گؤروندوکدن سونرا ائوده دینجلدیگینی و ایلکین کرونا تشخیصی موثبت اولدوقدان سونرا علاوه قایغی اوچون خسته‌خانایا قالدیریلدیغینی سؤیله‌دی. سون بیر نئچه آیدا ایسلام جمهورییتی‌نین بیر سیرا مقاملاری کرونا خسته‌لیگینه یولوخموش و اونلاردان بیر نئچه‌سیده بو خسته‌لیکده اؤلموشدور.
حسن روحانی، اوستو اؤرتولو بیر شکیلده ایراندا بیر سورو توخونولمازلیغی سیاستی‌نین آپاریلیدیغینی تایید ائتمیشدیر و ثبوتلار دا بئله بیر سیاستین آپاریلدیغینی گؤستریر. میلی کرونا قرارگاهی‌نین اوزمان عضوولریندن بیریده بو سیاستین یاراداجاغی پروبلملر باره‌ده خبردارلیق ائتمیشدی. صحیه ناظری‌نین معاونی ایرج حریرچی، سون بیر هفته‌ده حسن روحانی‌نین چیخیشلاری‌نین تأثیرینی آزالتماق اوچون بو سیاستین پراکتیک اولمادیغینی سؤیله‌دی.
صحیه ناظری‌نین معاونی، اینسانلارین قورخوسو و خرداد آییندا یاس، توی و ییغیناجاقلار کئچیرمه‌سی سببیندن تیر آییندا کرونا اؤلوملری‌نین ساییندا آرتیمین موشاهیده اولوندوغونو دقته چاتدیردی و دئدی کی، نؤوبتی 365 گونده هر گون 200 اؤلوم اولاجاق و بودا اؤلکمیزه یاراشان بیر شئی دئییل، آما 15 تیردن اعتباراً مجبوری ماسکه‌لرله بو تأثیرلی تدبیرین نتیجه‌سینی مردادین اورتالاریندا و یا شهریور آیلاریندا گؤره بیلریک، چونکی ماسکه تاخماق تخمیناً 20فایزدن 60 ایله 70فایزه آرتمیشدیر.
ایرج حریرچی علاوه ائتدی کی، بیلیم‌یوردلارینا گیریش ایمتاهانین هارادا و نئجه کئچیریله‌جیی ایله باغلی قرار میلی کرونا قرارگاهیندادیر. هئچ کیم گیریش ایمتاهانی اوچون شهرلرینی ترک ائتمه‌یه‌جکدیر. بیلیم ناظرلیگی ایله گؤروش زامانی بیز ده 1،2 متر مسافه‌‌نین تطبیق اولونماسینی ایسته‌دیک. بیلیم ناظرلیگی‌نین آدایلار آراسینداکی مسافه‌‌نی1،8 ایله 2 متر آراسینداکی اولاجاغینی و شوبهه‌لی شخصلر آیری بیر یئرده، خسته‌لر ایسه خسته‌خانادا و یا احتیاج دویولان یئرده ایمتاهانا گیره‌جکلر.
صحیه ناظرلیگی‌نین خالقلا علاقه‌‌‌لر اوزره معاونی کیانوش جهانپور، سانال دونیاداکی توییتلری و چین سفیرینه ائتدیگی چاغیریشین، صحیه ناظرلیگی‌نین سؤزچوسو وظیفه‌‌‌سیندن عزل ائدیلمه‌سینه نه‌دن اولا بیله‌جه‌یینی سؤیله‌دی و آرتیردی کی 5 گون بو اولایدان سونرا چین اؤلنلرین سایینی دوزلتدی و ووهاندا اؤلنلرین سایینی 50فایز و توپلام اؤلنلرین سایینی 35فایز آرتیردی.
کرونا میلی قرارگاهی‌نین علمی کومیته‌سی‌نین عضوو «مینو محرز»، تهرانداکی حاضیرکی وضعیتین یاخشی اولمادیغینی و بیلیم‌یوردونا گیریش ایمتاهانی‌نین تاخیره سالینمالی اولدوغونو سؤیله‌دی. محرز، هر ییغینجاغین اولدوغو یئرده، ماتم، توی، رستوران و یا هر هانسی باشقا بیر مراسیمین اورتادان قالدیریلمالی اولدوغونو وورغولادی، چونکی دهشتلی شکیلده خسته‌لیگین یاییلماسی حدیندن آرتیق یوکسکدیر و هامینی تئز بیر زاماندا یولوخدورور.
صحیه ناظری‌نین موشاویری «محمداسماعیل مطلق»، یاس مجلیسلرینی آپارانلارین محرملیک مراسیمی‌نین ساغلیق قایدالارینا نظارت ائتمک اوچون مسوولیت داشیاجاغینی سؤیله‌یه‌رک مراسیمین ساغلاملیق پروتکلونون ترتیب اولوندوغونو بیلدیردی. اونون سؤزلرینه گؤره، محرملیک یاس مراسیملری‌نین کئچیریلمه‌سینده اؤنجه‌لیکلی اولاراق آچیق مکان و مسافه‌‌نی ساخلاماقدیر و «ایسلام تبلیغات تشکیلاتی، ماتمچیلرین قاپالی مکاندان مسجیدین یاخینلیغینداکی خیابانا کؤچمه‌لرینی تشویق ائتمک اوچون نوماینده هئیتلری‌نین مسووللاری ایله مصلحتلشمه‌لر آپاریر.» تامامیله محرم مجلیسلرینده هر بیر اینسانین مسافه‌‌سی 2 متر اولمالیدیر و آغ وضعیتده اولان شهرلرده مراسیملرین کئچیریلمه‌سینه ساغلاملیق قایدالارینا اویغون اولاراق ایجازه وئریلیر، قیرمیزی و ساری وضعیتده‌کی شهرلرده مراسیملرین کئچیریلمه‌سی قاداغاندیر.
صحیه ناظرلیگی‌نین سؤزچوسو گونده‌لیک آچیقلاماسیندا، اؤلکه‌نین 25 ایالتی‌نین قیرمیزی و یا خبردارلیق وضعیتینه گلدیگینه توخوناراق، مثلا، قیرمیزی وضعیتینده‌کی البرز ایالتی ایله تهران ایالتی آراسیندا بو گونده 300-400 مین آدامین سیاحت ائتدیگینی و سون بیر آیدا بو ایالتده خسته‌لیگین یاییلماسی‌نین 60 فایز آرتدیغینی و کرج، نظرآباد و فردیس شهرلرینده خسته‌لیگین یاییلماسی‌نین دیک اولادوغونو سؤیله‌دی.
تخمیناً ایکی هفته‌دیر کی، تهرانداکی وضعیت صحیه ناظرلیگی‌نین استاندارتلارینا اویغون اولاراق قیرمیزی اولدوغو حالدا، صحیه ناظرلیگی سؤزچوسونون آچیقلاماسیندا، تهرانداکی وضعیتین خبردارلیق وضعیتنده اولدوغونون تکرارلانماسی آیدین دئییل؟
صحیه ناظرلیگی‌نین سؤزچوسو «سیما سادات سالاری»، وئردیگی راپوردا کئچن گونلر کیمی، لرستان، البرز، دوغو آذربایجان ، باتی آذربایجان، ایلام، بوشهر، رضوی خوراسان، خوزستان، زنگان، گلستان، مازاندران، کرمان و فارس ایالتلرینین قیرمیزی وضعیتده و تهران، اصفهان، بوشهر، هرمزگان، قزوین، مرکزی، قوزئی خوراسان، گونئی خوراسان، سمنان، اردبیل، سیستان‌و‌بلوچیستان، همدان، اردبیل و کهگیلویه‌وبویراحمد ایالتلرینین ده خبردارلیق وضعیتینده اولدوغونو بیلدیردی.
سون گونلرده وورغولادیغیمیز کیمی صحیه ناظرلیگی‌نین و بیلیم‌یوردلاری‌نین یایدیغی معلومات و استانداردلارا اساساً، تهران، گونئی خوراسان، سیستان و بلوچیستان، قزوین، اردبیل، همدان، بوشهر، هرمزگان، اصفهان و مرکزی ایالتلری خبردارلیق دئییل بلکه قیرمیزی وضعیتده و کرمانشاه، ، کوردستان، قوم و یزد ایالتلری ده خبردارلیق وضعیتده‌دیر.
صحیه ناظرلیگی‌نین سؤزچوسونون 4 مرداد دا آچیقلادیغی ایستاتیستیکا، بو مدتده 2434 نفره کرونا تشخیصی قویولدوغونو، اونلاردان 1436 نفری‌نین خسته‌خانایا یئر‌لشدیریلدیگینی و توپلام اولاراق دا 293 مین 606 نفرین یولوخدوغونو سؤیله‌دی. عینی زاماندا دیگر 212 خسته اؤلدو و ایراندا کرونادان قایناقلانان اؤلوم ساییسی‌نین توپلامی 15 مین 912 نفره چاتدی.
صحیه ناظرلیگی‌نین سؤزچوسو، همچینین صحیه ناظرلیگی‌نین تؤوصیه‌‌‌لرینه باخمایاراق اؤلکه‌ده یاس و توی مراسیملری ایله باغلی معلوماتلارین اولدوغونو، بو مراسیملرین کئچیریلمه‌سی‌نین چوخ تهلوکه‌‌‌لی بیر ایش اولدوغونو و حدیندن آرتیق اولماسی سببیندن کرونا خسته‌لیگی ریسکینی آرتیردیغینی سؤیله‌دی. آنجاق سؤزچو، صحیه ناظرلیگی‌نین بو بیلیکله محرم مراسیمی‌نین کئچیرمه قرارینا نییه قارشی اولمادیغینی دئمه‌دی.
ایرنانین معلوماتینا گؤره، بو گونلرده مازانداران ایالتی‌نین قیرمیزی شهرلرینده ایالتین 30-دان چوخ دؤولت خسته‌خاناسی کرونا اولمایان خسته‌لری، حتی عملیات کئچیرمه‌یه راندئووسو اولانلاری‌دا قبول ائتمکدن ایمتینا ائدیر. خسته‌لرین 90فایزدن چوخو خسته‌خانایا یئر‌لشدیریلمیر و موعالیجه‌‌‌لرینی بو طب مرکزلرینده داوام ائتدیرمه شانسلای یوخدور. مازانداران طبّ علملری بیلیم‌یوردونون سؤزچوسو «سیمین بابایی»ده میلی کرونا قرارگاهی‌نین قرارینا اساساً مازانداران دؤولت خسته‌خانالاریندا لازیمی عملیاتلارین ائدیلمه‌دیگینی تصدیقله‌دی. حال حاضیردا مازانداران ایالتینده دؤولت و اؤزل خسته‌خانا یاتاقلاری‌نین عومومی توتومونون 44 فایزی کرونا خسته‌لیگی اولان خسته‌لر طرفیندن ایشغال ائدیلمیشدیر.
مازانداران و آمل طبّ علملری بیلیم‌یوردلاری‌نین راپورونا گؤره، ایالت خسته‌خانالارینا 385 یئنی خسته قبول ائدیلدی و بو ایالتده قبول ائدیلن کرونا خسته‌لری‌نین عومومی سایی آرتیق 1898 نفره چاتدی. 17 شهریور آمل خسته‌خاناسی‌نین رئیسی، بو شهرده کرونا خسته‌لرین قبولو و خسته‌خانایا یئر‌لشدیریلمه‌سی اوچون خسته‌خانا یاتاقلاری‌نین اولماماسینا توخوناراق، 17 شهریور آمل خسته‌خاناسی‌نین ایکی بؤلومونده توپلام 60 کرونا خسته‌سینه طبّی خیدمت وئریلدیگینی سؤیله‌دی.
چهارمحال و بختیاری طبّ علملری بیلیم‌یوردونون رئیسی، سون هفته‌لرده‌کی کرونا ویروسونون زیروه‌سینه و بو ایالتده کرونا ویروسونون آرتان مئیلی‌نین باشلانغیجیندان بری داوام ائدن یاییلماسی‌نین ان شدتلی زیروه‌سینه توخوناراق، ویروسون یاراتدیغی محدودیتلرین داها بیر هفته اوزادیلدیغینی سؤیله‌دی. تحصیل مرکزلری، کیتاب‌خانالار، مسجیدلر، موزه‌لر، ایلنجه مرکزلری و سینمالار هله ده باغلیدیر.
زنگان طبّ علملری بیلیم‌یوردونون موعالیجه ایشلری اوزره معاونی «علی‌رضا آرمانی‌کیان»، سون بیر نئچه گونده ایالتین خسته‌خانالاریندا خسته سایی‌نین و خسته‌خانایا یئر‌لشدیریلمه سایی‌نین آزالدیغینا ایشاره ائده‌رک، زنگان ایالتینده اؤلوم نیسبتی‌نین آرتدیغینی خبردار ائتدی و چابالارا باخمایاراق یئنه ده اوکسیژن گئنئراتورونون اولماماسی، قاباقجیل طبّی ایمکانلاری‌نین، اینسانی و ماليه ایمکانلاری‌نین اولماماسی بو ایالتی پروبلم ایله اوز‌لشدیره‌جکدیر.
خوزستاندا، 8 هفته‌لیک کرونانین پیک چکیشمه‌دن سونرا وضعیت ثابتلشمیش گؤرونور و اهواز طبّ علملری بیلیم‌یوردونون صحیه اوزره معاونی ایندی خوزستانین کرونا خسته‌لیگی‌نین ان اوزون پیک مدتینی کئچیردیگینی و یاخین گونلرده قیرمیزی وضعیتدن چیخاجاغینی اومود ائتدی. او آرتیردی کی، ایستاتیستیکالار کؤورکدیر و داها اؤنجه‌کی کیمی بیر دالغانین گئری دؤنمه اِحتیمالی داها یوکسکدیر. خوزیستان ایالتی‌نین بو صحیه مقامینا گؤره، ماتمچیلر کرونانین قارشیسینی آلماق اوچون ایستی و روطوبتلی بیر یئرده بیربیرلریندن تخمیناً 4 متر مسافه‌‌ده اولمالیدیرلار.
بو واخت، اهوازدان سونرا خوزستاندا ان یوکسک خسته‌لنمه و اؤلوم نیسبتینه صاحب اولان دزفول طبّ علملری بیلیم‌یوردونون رئیسی «یوسف پریدار»، محرم آیی مراسیملری‌نین مسووللارا گؤره کئچیریلمه‌لی اولدوغونو و بیلیم‌یوردونون ایداره‌سینده‌کی اراضیده 900 ماتم هئیتی اولدوغونو بیلدیردی. او، ایکی هفته اؤنجه اینسانلارین 92 فایزی‌نین ماسکه‌دن ایستیفاده ائتدیگینی، لاکین سون گونلرده ماسکه‌لرین ایستیفاده‌سی‌نین 50فایزه چاتدیغینی و بو وضعیتین داوام ائده‌جیی تقدیرده خسته‌لرین سایی‌نین یئنیدن آرتاجاغینی سؤیله‌دی.
کرمان طبّ علملری بیلیم‌یوردونون سؤزچوسونه گؤره، سون بیر گونده کرمان ایالتینده کرونا ویروسو سببییله 10 نفر اؤلدو و ایالتده رسمی کرونا اؤلوملری‌نین سایی 400 نفره چاتدی. سون بیر گونده 49 یئنی یولوخان همین ایالتده خسته‌خانایا یئر‌لشدیریلدی وکرمان ایالتینده‌کی خسته‌خانالارا قبول ائدیلن خسته‌لرین توپلام سایینی 353 نفره چاتدیردی.
البرز طبّ علملری بیلیم‌یوردونو رئیسی، ایالتده کرونانین ایکینجی دالغاسی‌نین باشلاماسیندان بیر هفته‌دن چوخ واخت کئچدیگینی قئید ائده‌رک، کئچن هفته ایالتده‌کی بیر سیرا طبّ چالیشانلاری‌نین کرونا خسته‌لیگیندن اؤلدویونو و بو گونه قدر توپلام 662 نفرین کسین کرونا خسته‌لیگیندن و 887 نفرین کرونا شوبهه‌لیسی اولاراق اؤلدویونو سؤیله‌دی. ایالتده حاضیردا 626 کرونا خسته‌سی خسته‌خانایا یئر‌لشدیریلیب، اونلاردان 119 نفری اؤزل باخیم شؤبه‌لرینه یئر‌لشدیریلمیشلر.
نورمال خسته‌خانا یاتاقلاریندا بوش یئره توخونان کرمان طبّ علملری بیلیم‌یوردونون موعالیجه ایشلری اوزره معاونی، حاضیردا ایالتده دئمک اولار کی، بوتون خسته‌خانالارین کرونا خسته‌لری ایله مشغول اولدوقلارینی و ایالتین خسته‌خانالارینداکی آی‌سی‌یو یاتاقلاری‌نین دئمک اولار کی، دولو اولدوغونو و دونن کرماندا سون 5 آیدا ان چوخ کرونا خسته‌سی‌نین خسته‌خانایا یئر‌لشدیرمه رئکوردونون قیریلدیغینی سؤیله‌دی. «مرتضی هاشمی»، 750-دن چوخ یاتاقین بیرباشا کرونا خسته‌لرینه آیریلدیغینی و ایالت خسته‌خانالاری‌نین ایمکانات باخیمیندان یاخشی وضعیتده اولمادیغینی و بعضی خسته‌خانالارداکی اکسیژن گئنئراتورلاری‌نین سایی‌نین خسته‌لرین سایینا اویغون اولمادیغینی قئید ائتدی.
صحیه ناظرلیگی، بو ناظرلیک طرفیندن تصدیق ائدیلمیش و سئچیلمیش مرکزلرده کرونا تئستی‌نین کئچیریلمه‌سینی و کناردا ائولرده و نومونه‌لرین گؤتورولمه‌سینی «ویروسون اؤتورولمه‌سی زنجیری‌نین آشکارلانماسی و ایداره ائدیلمه پلانینی پوزماسی»، اوچون قاداغان ائتدی.
مجلیسین صحیه کمیسیونونون باشقانی حسینعلی شهریاری جومهورباشقانینا یازدیغی مکتوبدا تعجیلی قرارلار قبول ائتمک اوچون ایالتلره داها چوخ صلاحیت وئریلمه‌سینی ایسته‌دی و بیلیم‌یوردلارینا گیریش ایمتاهانلاری‌نین باشقا بیر واختدا کئچیریلمه‌سینی ایسته‌دی. بو مکتوبدا، حسن روحانی‌یه، کووید-19 خسته‌لیگی سببییله اؤلوم حاللاری‌نین آرتماسینی نظره آلاراق خسته‌لیگین بوتون اؤلکه‌ده تامامیله نظارت آلتینا آلیندیغی زامان بوتون بیلیم‌یوردلارینا گیریش ایمتاهانلاری‌نین کئچیریلمه‌سینی امر ائتمه‌سینی ایسته‌دی. بلکه بئله‌لیکله داها یوکسک اؤلومله داها آغیر اپیدمیلر ریسکینی آرادان قالدیرماق اولور.
«پارلاق یئتنکلر میلی مرکزی‌نین رئیسی» «فاطمه مهاجرانی»، یوکسک زکالیلار تستی 9 و 10 مرداددا میلی کرونا قرارگاهی‌نین ایجازه‌سی ایله و 2804 ایمتاهان بؤلگه‌سینده 330.000 اؤیرنجی‌نین ایشتیراکی ایله کئچیریله‌جک دئدی و ایشتیراکچیلاردان ماسکه تاخمالاری طلب اولونور.
