ایرانداکی کرونا؛ مکتبلرین یئنیدن آچیلماسی ایله باغلی تنقیدلر داوام ائدیر
بیر مکتب مسوولو اؤیرنجیلره دانیشیر، بیردن بیر اؤیرنجی بیر نئچه آددیمدان سونرا یئره ییخیلیر. بو فاجعه‌‌‌لی حادثه‌‌‌نین ویدئوسو بازار ائرته‌سی سوسیال شبکده پایلاشیلدی؛ اؤیرنجیلرین وضعیتی ایله باغلی ناراحاتلیقلار بو بیر نئچه ثانیه ایله ایکی قات آرتمیشدیر. بو آرادا تحصیل ناظری مجلیسه چاغریلدی و سون هفته‌لرده مکتبلرده اؤیرنجیلرین اولماسی‌نین مجبوری اولمادیغینی وورغولایاراق داها اؤنجه‌کی سؤزلریندن گئری آدیم آتدی.
«مسیح دانشوری»، خسته‌خاناسی‌نین یولوخوجو خسته‌لیکلر شؤبه‌سی‌نین مودورو «پیام طبرسی»، ۱۸ شهریور ۱۳۹۹-جی ایل چارشنبه آخشامی گونو مکتبلرین آچیلماسی و بعضی اؤیرنجیلرین صینیفلرده اولماسی باره‌ده دئدی: «قریپ کیمی ویروسی خسته‌لیکلرین یاییلماسی هر زامان مکتبلرده باشلاییر، کرونا خسته‌لیگی و دیگر ویروس خسته‌لیکلرینده ده بونون دیشیندا دئییل، بو سببدن اوشاقلاردا بو ویروسون باشقالارینا یاییلماسی اوچون مکتبلرده سیخلیق اولمامالیدیر.»
طبرسی آچیق شکیلده مکتبلر آچیلدیقدان سونرا تخمینلره گؤره کرونا ویروسو آرتاجاغینی بیلدیردی. اساس مسئله اوشاقلارین خسته‌لنمه‌سی دئییل، بلکه داشیییجیلاری اولدوغونو ایفاده ائده‌رک دئدی: «موعلیملر، والیدئینلر، قارداش باجیلار و اوشاق باخیجیلاری‌نین هامیسی ریسک آلتیندادیر. مکتبلر تنظیمله‌مه‌لره اویغون اولاراق آچیلارسا و قایدالار عمل اولونسا دا، هله ده تهلوکه اِحتیمالی وار، چونکی قایدالارین تام اولاراق رعایت اولوندوغو خسته‌خانالاردا طبّ باجیلاری و حکیملر بئله هله ده ویروسا یولوخورلار. البتده کی، طبّ چالیشانلاری‌نین باشقا بیر یولو یوخدور، چونکی بو اونلارین ایشیدیر، آنجاق اوشاقلار مسئله‌‌سینده باشقا تدبیرلر گؤرولمه‌لیدیر.»
طبرسی، چوخ سایدا اوشاغین خسته‌خانایا یئر‌لشدیریلمه‌سینه احتیاج اولسایدی، اونلار اوچون باش وئره‌جک بو دورومدا یاتاق چاتمایاجاغینی سؤیله‌دی.
حؤکومت سؤزچوسو علی ربیعی‌ده ۱۸ شهریور چارشنبه آخشامی گونو بیر مطبوعات کنفرانسیندا رسمی اولاراق اعلان ائتدی: «کرونا ایله موباریزه اوزره قورولان میلی قرارگاه و حؤکومتین مکتبلرین یئنیدن آچیلماسی باره‌ده موذاکیره‌لری سونراسی مکتبه داوامیتین مجبوری اولمادیغی قراری وئریلدی آما حؤکومت تحصیل وئرمه‌یه مجبوردور.»
دؤولت مقاملاری‌نین کئچیریلمه‌سینی وورغولادیقلاری دیگر تدبیرلر آراسیندا «ایسلامی شورا مجلیسی» سئچکیلری‌نین ایکینجی تورو دا وار. ۲۱ شهریور جوما گونونه تعیین ائدیلمیش سئچکی اؤنجه ۲۰ فروردین اولاراق تعیین ائدیلمیشدی، لاکین کرونا ویروسونون باش وئرمه‌سی سببیندن تاخیره آلیندی. ۱۳۹۸-جی ایلین اسفند آییندا ۲۰۸ سئچکی دایره‌سینده ۲۹۰ مجلیس عضوونه سس وئرمک اوچون عومومی سئچکیلر کئچیریلدی، لاکین ۱۱ دایره‌ده ملت وکیللری‌نین دورومو بللی اولمادی. بو سئچکیلر ۹ ایالتده و ۲۴ شهرده کئچیریله‌جک. سئچکیلرین ایلک توروندان بیر گون اؤنجه اؤلکه‌ده کرونا ویروسونون یاییلدیغی اعلان ائدیلدی.
سون هفته‌لرده اربعین مراسیمی‌نین کئچیریلمه‌یه‌جیی باره‌ده معلوماتلار یاییلمیشدی و عراق حؤکومتی هر هفته دفعه‌‌لرله ایران حؤکومتینه مؤوقئیینی تکرارلادی. سون ایللرده اربعین گونونده (اوچونجو شیعه ایمامین اؤلوم ایلدؤنومونون ۴۰-جی گونو) ایسلام جمهوریییتی شیعه‌‌‌لری زیارته کربلایا گؤندرمک اوچون بیر کارناوال تشکیل ائدیردی. چارشنبه آخشامی، ایراق صحیه ناظرلیگی‌نین سؤزچوسو «سیف البدر»، کرونا ایله موباریزه مرکزی قرارگاهی‌نین وئردیگی بیر فرمانا اساساً، اربعینده خاریجی زوارین اؤلکه‌یه گیرمه‌سینه ایجازه وئریلمه‌یه‌جه‌یینی و دیگر اؤلکلردن گلن زوارلارا سرحدلرین آچیلماسی ایله باغلی یئنی بیر قرار وئریلمه‌دیگینی وورغولادی.
ایرانین بغدادداکی سفیرلیگیندن بیر هئیت ده کربلا والیسی «نصیف جاسم الخطابی»، زیارت ائتدی و هر ایکی طرف بو موضونو موذاکیره ائتدی. کربلا والیسی ده بو ایجلاسدا دئدی: «بو مسئله کیفایت قدر آیدیندیر و عراق حؤکومتی کرونا شرطلری و مومکون نتیجه‌لرینی نظره آلاراق اربعینده زیارتجی قبول ائتمه‌یه حاضر دئییل و خاریجی زوارلاری قبول ائتمه‌یه‌جک.»
کرونا ویروسو واکسنینین روس منشأ‌لی بیر وئرسیونو گلن هفته ساتیشا تقدیم ائدیله‌جیی بیلدیریلسه ده، ایران دا واکسن اوزرینده چالیشدیغینی ادعا ائدیر. ایرانین پاستور انستیتوسونون رییسی «علیرضا بیگلری»، ایران کرونا واکسنی حاقیندا، ایرانداکی بیر نئچه شرکتین هر واکسن اوچون طلب اولونان حئیوان مرحله‌‌‌سیندن کئچدیگینی و بو نتیجه‌لرین آراشدیریلدیغینی سؤیله‌دی: «بیرینجی مرحله‌‌‌ده آز سایدا اینسانین ایشتیراکی ایله یالنیز تهلوکه‌‌‌سیزلیک و نیسبی ثمره‌‌لیلیک نظره آلینیر. ایکینجی مرحله‌‌‌ده داها چوخ، تخمیناً یوز ایله ۲۰۰ نفر آراسیندا بیر آراشدیرما آپاریلیر. اوچونجو مرحله‌‌‌ده تخمیناً ۳۰-۴۰ مین اینسان تست ائدیله بیلر. بو اینسانلار کؤنوللو اولورلار و واکسنین تهلوکه‌‌‌سیزلیگی و تأثیری‌نین نتیجه‌سی یوخلانیلیر.»
بونونلا بیرلیکده، ایراندا کرونا واکسنینین حاضرلانماسینا هله چوخ یول وار و صحیه ناظرلیگی‌نین سؤزچوسو سیما سادات لاری‌نین آچیقلادیغی سون ایستاتیستیکادا ویروس قوربانلاری‌نین سایی ۲۲ مین ۵۴۲ نفره چاتیب.
لاری چارشنبه آخشامی گونورتا ساعتلاریندا ایراندا سون ۲۴ ساعت عرضینده ۱۳۲ نفرین کرونا ویروسوندان اؤلدویونو و ۳ مین ۷۱۳ ایرانلیین آغیر وضعیتده خسته‌خانایا یئر‌لشدیریلدیگینی آچیقلادی: «دونندن بو گونه قدر، ۱۸ شهریور ۱۳۹۹-جی ایله قدر، قطعی تشخیص معیارلارینا گؤره اؤلکه‌ده کووید ۱۹ اولان ایکی مین ۳۰۲ یئنی خسته‌نی بلیرلندی، بونلاردان مین ۲۲۶ نفری خسته‌خانایا یئر‌لشدیریلدی.»
سون معلوماتلارا گؤره، اؤنجه‌کی گونلرله عینی وضعیتده، تهران، مازانداران، گیلان، قوم، اصفهان، رضوی خوراسان، دوغو آذربایجان، کرمان، قوزئی خوراسان، سیمنان، یزد، زنگان و قزوین ایالتلری قیرمیزی و باتی آذربایجان، البورز، فارس، لورستان، هرمزگان، اردبیل، بوشهر، کرمانشاه، کهگیلویه‌وبویراحمد، گونئی خوراسان، مرکزی، ایلام، چهارمحال‌وبختیاری، گولیستان و خوزیستان ساری و یا خبردارلیق و ضعیتنیده‌دیرلر.
تبریز طبّ علملری بیلیم‌یوردونون رییسی «محمدحسین صومی»، ایالتدن خبر وئریر کی، دوغو آذربایجاندا بیر یاریم آی یاشانان کرونانین ایکینجی دالغاسیندان سونرا ایندی یئنیدن یوخاری مئیل یاشاییر. او، آذربایجاندا آپاریلان تستلرین ۴۰ فایزی‌نین موثبت اولدوغونو سؤیله‌دی: «۱۳ شهریوره قدر دوغو آذربایجاندا وضعیت کرونا خسته‌لیگی باخیمیندان نورمال ایدی، آما ایندی بو گئدیشات تدریجاً آرتیر. دوغو آذربایجان قادینلاری آراسیندا کرونا اؤلوملری ارککلرین اؤلوم ساییسینا یاخینلاشیر، حال‌بوکی اؤنجه‌لر ارککلر آراسیندا اؤلوم نیسبتی قادینلاردان ایکی قات چوخ ایدی.»
حاضردا ایالتین خسته‌خانالاریندا کرونا خسته‌لیگی اولان ۷۰۰ خسته وار.
