ایرانداکی کرونا؛ علی خامنه‌ای‌نین ایللیک یاس مراسیمی بو ایل کئچیریلمه‌یه‌جک
محرم آیینین دینی و یاس مراسیملری کرونا ایله موباریزه اوزره میلی قرارگاهین تؤوصیه‌‌‌لرینین عکسینه اؤنجه‌کی ایللر کیمی آپاریلارکن، ایسلام جمهوریییتی‌نین رهبری، «علی خامنه‌ای»نین اوفیسی، 3 شهریور 1399دا بیر بیاناتلا ایمام خمینی حسینیهسینین ایللیک مراسیمی‌نین لغو ائدیلدیگینی آچیقلادی.
اعلانین متنینده دئییلیر: «ساغلاملیق تعلیماتلارینا و کرونا ایله موباریزه اوزره میلی قرارگاهی‌نین اعلان ائتدیگی معیارلارا گؤره بو ایل ایمام خمینی حسینیهسینده یاس مراسیمی کوتلوی شکیلده کئچیریلمه‌یه‌جیی بیلدیریلیر. ایسلام اینقیلابی رهبری‌نین ایشتیراکی ایله حاضرلانمیش اطرافلی ماتم پروقراملاری تلویزیونون بیرینجی کانالیندان یاییملاناجاق.»
حسینیه‌نین ایللیک مراسیمی ائله بیر حالدا لغو ائدیلدی کی، بعضی مقاملار، ساغلاملیق پروتکللارینا دایر تؤوصیه‌‌‌لره باخمایاراق، دینی و ماتم مراسیملری‌نین کئچیریلمه‌سینده تاکید ائدیلر. اؤلکه‌نین پولیس رئیسی حسین اشتری بو باره‌ده دئییب «بو ایلین یاسینی ویجدانیمیزلا، سوسیال مسافه‌‌لری رعایت ائده‌رک پروتکللارا دقت یئتیرمکله بوتون دونیایا اؤزوموزو نومونه اولاراق گؤسترمه‌لی‌ییک.»
صحیه ناظرلیگی‌نین سؤزچوسو سیما سادات‌لاری طرفیندن گونده‌لیک اولاراق آچیقلانان ایستاتیستیکایا گؤره، 3 شهریور 1399-جی ایله قدر اولان سون 24 ساعت عرضینده اؤلکه‌ده 133 نفر کرونا ویروسو سببییله اؤلدو. بئله‌لیکله، اؤلکه‌ده کرونا خسته‌لیگی‌نین باشلاماسیندان بری اؤلنلرین عومومی سایی 20 مین 776 نفره چاتدی: «دونندن بو گونه، 3 شهریور 1399 -جی ایله قدر، قطعی تشخیص معیارلارا اساساً، اؤلکه‌ده کووید-19 اولان 2 مین 245 یئنی خسته معین ائدیلدی، اونلاردان 1،132 نفری خسته‌خانایا یئر‌لشدیریلدی.»
آیریجا کرونا خسته‌لیگی اولان 3 مین 847 خسته‌نین خسته‌خانایا یئر‌لشدیریلدیگی و وضعيّتی‌نین پیس اولدوغو بیلدیریلدی.
شهریورین ایلک ایکی گونو اولدوغو کیمی، بو آیین اوچونجو گونونده‌ده مازانداران، تهران، قوم، گولوستان، قوزئی خوراسان، اردبیل، اصفهان، البورز، رضوی خوراسان، کرمان، سیمنان، دوغو آذربایجان، مرکزی، یزد و گیلان قیرمیزی دورومدا و فارس، ایلام، لورستان، هرمزگان، زنگان، قزوین، باتی آذربایجان، بوشهر، همدان، چهارمحال و بختیاری و کهگیلویه‌و بویراحمد ایالت‌لری خبردارلیق وضعيتده‌دیرلر.
سون آیلاردا خسته‌لیگین یاییلماسی‌نین قایغیلی اولدوغو خوزیستان ایالتینده گونده‌لیک اولاراق خسته‌خانادان بوراخیلانلارین سایی قبول ائدیلنلرین ساییندان چوخ اولدوغو بیلدیریلیر. خوزیستان والیسی غلامرضا شریعتی بو خبری آچیقلایاراق دئدی: «حال-حاضردا بوتون خوزیستاندا کووید-19 اولان 180 ایله 190 خسته وار. مین نفردن چوخ بیر ساییدان بو رقمه یئتیشمیشیک.»
2 شهریور 1399 بازار گونو، کولتورل میراث و توریزم ناظری علی‌اصغر مونسان کرونا ایله موباریزه اوزره میلی قرارگاهین بیلدیریسینه اعتراض ائده‌رک «سیاحتین کرونا ویروسونون یاییلماسینا ان آز تأثیر گؤستردیگینی» اعلان ائتدی. ایندی ایسه بیر گون سونرا «من کرونا قرارگاهی‌نین طلبینه اعتراض ائتمه‌دیم» دئییر.
مونسان بیر رادیو پروقرامیندا کرونا ایله موباریزه اوزره میلی قرارگاهین اعلانینا تئبکی اولاراق سؤیله‌دی «کرونا دونیا توریزمینه آغیر ضربه ووردو کی بو ایران توریزمینی ده نصیب‌سیز قویمادی.» او دئدی البته کی، خرداد آییندا میلی قرارگاهدان ایجازه آلدیق و فعالیته تام شکیلده باشلادیق و خوشبختلیکدن داخیلی توریزم تئز بیر زاماندا تلافی ائده بیله‌جک گوجه صاحب ایدی، آما تأسف کی، کرونا ویروسونون زیروه‌سی ایله سیاحته مانع اولماق اوچون خوصوصی محدودیتلر قویولدو و تأسف کی «توریزم یاخشی دورومدا دئییل.»
بو ایل اؤنجه‌کی ایللردن فرقلی اولاراق مهر آیینین قوخوسو والیدینلرین بورونونا داها آز چاتدی و مکتبه‌قدر مکتبلرده قئیدیات نیسبتی چوخ آزالدی. بیر میثال اولاراق، کرمانشاه تحصیل ایداره‌سی‌نین ابتدائی تحصیل معاونی «ناهید فضلی»، ایالتده‌کی مکتبه‌قدر اؤیرنجیلرین یالنیز 10 فایزی‌نین والیدینلری‌نین اوشاقلارینی قئیدیاتا آلدیغینی سؤیله‌دی.
دیگر طرفدن، مکتبلرین مهر آییندان مجازی اولاراق فعالیته باشلاماسی بللی دئییل و یا اؤیرنجیلرین مکتب چانتالارینی گؤتوروب صینیف اوتاقلارینا گئدیب گئتمه‌مه‌سیده هله معلوم دئییل. بونونلا بیرلیکده، اؤلکه داخیلینده‌کی بوتون اؤیرنجیلرین مجازی درسلرده ایشتیراک ائتمک اوچون اساس واسطه‌‌‌لری یوخدور.
تحصیل ناظرلیگی‌نین ابتدائی تحصیل معاونی «رضوان حکیم‌زاده»، بازار ائرته‌سی تهرانین کرونا ایله موباریزه اوزره قرارگاهین مکتبلرین یئنیدن آچیلماسینا اعتراض ائتمه‌سینه جاواب اولاراق دئدی «هر حالدا، شاگیردلرین ساغلاملیغی بیزیم اوچون بیرینجی سیرادادیر». طبیعی کی، طلبه‌‌‌لرین ساغلاملیغینا تهلوکه یاراندیقدا، تحصیل اوچون مجازی اورتام و دیگر پلاتفورمالاردان ایستیفاده ائده‌جییک. طبیعی کی، اوز-اوزه مشق داها ائتکیلیدیر، لاکین بو سئچیم دئییل، مجبوری شرطدیر.»
مکتب اؤیرنجیلرین یولوخماسینا و کرونا ویروسونو داشییان یگانه موحیط دئییل. هرمزگان طبّ علملری بیلیم‌یوردونون رئیسی حسین فرشیدی «مکتبلرین یئنیدن آچیلماسی ایله باغلی قایغیلار مکتبلردن چوخ اؤیرنجیلری داشییان واسطه‌‌‌لرده‌دیر.» دئدی.
مکتب مؤوسومونون اولینده کرونا و تحصیل قرارگاهلاری‌نین اؤیرنجیلر اوچون هانسی پلانلاری‌نین اولاجاغی هله آچیقلانمیش بیر قونو دئییل.
