ایرانداکی کرونا؛ صحیه ناظری‌نین معاونی: اؤلکه‌نین بوتون ایالتلری قیرمیزی و یا خبردارلیق وضعيتینده‌دیر
صحیه ناظری‌نین معاونینین سؤزلرینه گؤره، 25 میلیون ایرانلی‌نین کرونایا یولوخماسی سرولوژی تستلرین اساسیندا آپاریلان آراشدیرمانین نتیجه‌سیدیر، لاکین بو، ایراندا سورو سیاستی‌نین حیاتا کئچیریلمه‌سی دئمک دئییل. خوزستان، کوردستان و هرمزگانداکی کرونانین وضعيتی ثابتلشیر و آزالیر، لاکین فارس، مازانداران، گونئی خوراساندا خسته‌لیک آرتیر و قالان ایالتلر خبردارلیق وضعيتینده‌دیرلر.
حسن روحانی‌نین، صحیه ناظرلیگیندن آلینان ایستاتیستیکایا اساساً، 25 میلیون ایرانلیین کرونایا یولوخدوغونا دایر صؤحبتینی سند‌لشدیریلدی و کرونا میلی قرارگاهی‌نین بیر عضوو بونو اینکار ائتمه‌دی و سورو توخونولمازلیق سیاستی‌نین حیاتا کئچیریلمه‌سی‌نین علامتی اولدوغونو بیلدیردی. صحیه ناظرلیگی‌نین مسووللاری‌نین بو صؤحبتلری تأثیرسیز گؤسترمک اوچون آچیقلامالاری داوام ائدیر.
صحیه ناظرلیگی‌نین ساغلیق اوزره معاونی «علیرضا رئیسی»، 25 میلیون ایرانلی‌نین کرونایا یولوخدوغو باره‌ده گئدن صؤحبتلره گؤره دئدی؛ تخمینی اولاراق دئییلن بو 25 میلیون رقمی سرولوژی تستلرینه دایانان بیر آراشدیرمانین نتیجه‌سینده اورتایا چیخمیش، لاکین سرولوژی تستین خسته‌لیگین تشخیصی اوچون اهميتی یوخدور و نه عوموم‌دونیا صحیه تشکیلاتی، نه ده دونیانین هر هانسی بیر اؤلکه‌سینده بو تست ایله بیر کرونا تشخیصی قویولاماز. بو تست یالنیز بیر بؤلگه‌ده خسته‌لیک وضعيتی‌نین نه اولدوغونو یوخلاماقدیر و سونرا ریاضی مودل‌لشدیرمه ایله نئچه اینسانین یولوخدوغونو تخمین ائده بیلریک.
«علیرضا رئیسی»، خسته‌لیکله چوخ چاتیشما یاشایان و هله ده بو چاتیشمایا دوام ائدن خوزستان ایالتینده گونده‌لیک خسته‌خانایا یئر‌لشدیرمه سایی‌نین آزالدیغینی سؤیله‌دی. خسته‌لیکله چوخ چاتیشان کوردستاندا نیسبی ساکیتلییه دوغرو گئدیر و خوزستانا بنزر بیر وضعيتده‌دیر. هرمزگان ایالتینده وضعيتین یاخین هفته‌لرده یاخشیلاشاجاغینا اومید ائدیریک. فارس ایالتینده و شیراز شهرینده اؤلوم نیسبتی خسته‌خانایا یئر‌لشدیرمه سويه‌‌سینه گؤره آزدیر و بو همکارلاریمیزین چابالارینی گؤستریر. مازانداران و رضوی خوراسان ایالتلرینده ده یئنیدن خسته‌لرین سایی آرتماقدادیر. بوشهرده وضعيت یئنه ده قیرمیزیدیر. دکتر رئیسی‌نین سؤزلرینه گؤره، دیگر ایالتلر ده خبردارلیق وضعيتده‌دیر.
کرونا دؤورونده اینسانلارین پروبلئملریندن بیری کؤچورولمه و یاشاییش یئرینی ديَیشدیرمک مسئله‌‌سیدیر. ایرانین یول و شهرجیلیک ناظری «محمد اسلامی»، محکمه اورقانلارینا و املاکچیلار بیرلیگی‌نین رئیسینه گؤندردیگی مکتوبدا؛ یاشاییش املاکی‌نین ایجاره موقاویله‌لری، طرفلر آراسیندا فیکیر آیریلیغی و کیراجی‌نین ایستیی حالیندا، صحیه ناظرلیگی‌نین کرونانین یاییلماسی و تعجیلی وضعيتین سونا چاتماسی باره‌ده رسمی اعلانیندان سونرا اوچ آیادک اوزادیلاجاغینی و کیرایه‌‌‌چی، املاک ساتیلمادیقجا بوشالتماق مجبوریتینده اولمادیغینی قئید ائتدی.
بیر هفته‌دن چوخدور قیرمیزی وضعيتینده اولان تهراندا خمینی خسته‌خاناسی‌نین یولوخوجو شؤبه‌سی‌نین مودیری «حمید عمادی»، خسته‌لرین سایی‌نین آرتماسینا توخوناراق دئدی؛ 1398-جی ایلین اسفندی و بو ایلین فروردین آیلاریندا خسته‌خانالارین هر شؤبه‌سی کرونا خسته‌لرینه خیدمت وئریردی آنجاق او آیلاردان فرقلی اولاراق ایندی هر خسته‌خانا قئیری کرونا خسته‌لرینه‌ده خیدمت وئرمکده‌دیر. طبّ مرکزلری‌نین آی‌سی‌یولاری‌نین بیر حیصه‌‌‌سی ده همین خسته‌لره آیریلمیش و بو سببدن کرونا خسته‌لری‌نین قبول قابیلیتی چوخ آشاغی اولموشدور. بونا گؤره، بیزده کرونا خسته‌لرینه خیدمت قابیلیتی یوخدور و کرونا خسته‌سی اولان بیریسینه خیدمت ائده‌جک یئریمیز یوخدور و ایندی ده ایمکانلاریمیزدان داها چوخ خسته‌میز واردیر.
تخمیناً ایکی هفته‌دیر کی، قیرمیزی وضعيتده اولان دوغو آذربایجان ایالتینده تبریز طبّ علملری بیلیم‌یوردونون موعالیجه ایشلری اوزره معاونی «عباس‌علی درستی» ، سون آیلاردا ایالتده 1500 طبّ چالیشانی‌نین کرونایا یولوخدوغونا دقت چکرک بیلدیردی کی، کروناداکی آغیر خسته‌لرین سایی آرتیب و حاضیردا دوغو آذربایجان‌دا کروناسی اولان خسته‌لرین دؤردده بیری اؤزل باخیم شؤبه‌سینه قبول اولونور. «روزبه رجایی»نین سؤزلرینه گؤره، دوننه قدر ایالتین خسته‌خانالاریندا تخمیناً 850 نفر کرونا خسته‌لیگی ایله خسته‌خانایا یئر‌لشدیریلمیشدی و اونلاردان 200 نفری اؤزل باخیم شؤبه‌سینه یئرلشدیریلمیشدیر.
اهواز جندی شاپور طبّ علملری بیلیم‌یوردونون رئیسی، سون بیر نئچه گونده خوزستاندا خسته‌خانایا یاتیریلما دوشوشونه توخوناراق دئدی کی، ایالتده بئله داوام ائدرسه و تعلیماتلارا عمل اولونارسا، ایکی آیدیر قیرمیزی وضعيتده اولان خوزستان، یاخین بیر نئچه گونده قیرمیزی وضعيتیندن چیخاجاق، چونکی ایالت اهالیسینین هر 100 مین نفریندن اوچ نفردن آزی خسته‌خانایا یئر‌لشدیریلیر و بو 14 گون داوام ائدرسه ایالت قیرمیزی وضعيتدن چیخیر.
قیرمیزی وضعیتده اولان ایرانین بعضی بؤلگه‌لرینده اجتماعی توپلانتیلار باغلانیب. دینی مرکزلرده باغلانان یئرلر آراسیندادیر، باخمایاراق کی بو مرکزلر کرونانین یاییلماسیندا اؤنملی رول اویناییرلار، لاکین بعضی ایالتلرده دین آداملاری و مرجع‌لرین موخالیفتی سببیندن آسانلیقلا باغلانا بیلمزلر. زنگان ایالتی‌نین اوقاف و خیريه ایشلری مودورو، هر هانسی بیر توپلانتی‌نین کئچیریلمه‌سی‌نین ویروسون یاییلماسیندا بیر یول اولدوغونو و کرونا قرارگاهی‌نین توپلاما یئرلرینی باغلاماق قرارینا گلدیگینی اعلان ائتدی. ایالتده 16 تیردن بو یانا باغلانان مسجیدلر، توربه‌لر، تکیه‌لر و حسینیه‌لر ده داخیل اولماقلا مقدس مکانلارین فعالیتی‌نین دوردورولماسی کرونا قرارگاهی‌نین یئنی قراری اعلان ائدیلنه قدر داوام ائده‌جه‌یینی آچیقلادی.
زنگان‌دا، ایالتین طبّ باجیلاری ایداره‌سی‌نین موتخصیصی «ناهید کامکار»، ایالتین هر خسته‌خاناسیندا طبّ باجیلاری‌نین تخمیناً 10-12 فایزینین کرونا خسته‌لیگی کئچیردیگینی سؤیله‌یه‌رک، بو گون زنجان ایالتی‌نین طبّ باجیلاری چاتیشمازلیغی ایله اوزلشدیگینه توخوندو.
بو گون خبردارلیق وضعيتینه گلدیگی اعلان ائدیلن مرکزی ایالتینده، والی «سیدعلی آقازاده» اراک‌دا وضعيتین قیرمیزییا چئوریلمه‌سینه توخوناراق، وضعيتی نظارت آلتینا آلماق اوچون بو شهرده و ایالتین دیگر مومکون قیرمیزی شهرلرینده محدودیتلرین تطبیق ائدیله‌جه‌یینی سؤیله‌دی. او ایالتین قیرمیزی شهرلرینده 10نفردن چوخ اینسانین توپلاشماسی‌نین قاداغا اولا بیله‌جیینی آچیقلادی. والی‌نین سؤزلرینه گؤره، اراک‌داکی امیرالمومنین خسته‌خاناسی‌نین گوجو سون ایکی گونده تامدیر و اونلار کرونا خسته‌لرینی آیت الله خوانساری خسته‌خاناسینا قبول ائتمک مجبوریتینده قالیبلار. آنجاق ایالتین خسته‌خانا یاتاقلاری‌نین توتومونون آشاغی اولماسی سببیندن وضعيت پیسلشرسه، ایالتین پروبلئملرله اوزلشه‌جه‌یینی دئدی.
فارس ایالتینده وضعيت بیر نئچه گوندور کی، قیرمیزییا چئوریلیب. والی «عنایت‌الله رحیمی»، سون اوچ هفته‌ده کرونا خسته‌لیگی‌نین کسکین آرتماسینا و ایالتده‌کی 36 شهردن 21-نین قیرمیزی اولدوغونا توخوناراق، دئدی کی، حاضیردا نورمال خسته‌خانا یاتاقلاری‌نین 91 فاییزی و ایالت خسته‌خانالارینداکی آی‌سی‌یو یاتاقلاری‌نین 93 فاییزی کرونا خسته‌لیگی اولان خسته‌لر طرفیندن ایشغال ائدیلیب.
صحیه ناظرلیگی‌نین سؤزچوسو بو گون وضعيتی‌نین قیرمیزی اولدوغونو آچیقلادیغی کرمان ایالتینده، کرمان طبّ علملری بیلیم‌یوردونون معاونی «مرتضی هاشمیان»، کئچن ایلین اسفندینده و بو ایلین فروردین آیینین اولینده کرمان ایالتینده کرونانین ایلک زیروه‌سینده اؤزل بیر پروبلئم اولمادیغینی و خسته‌لرین سایی‌نین ایداره ائدیله بیله‌جه‌یینه دقت چکرک دئدی کی، خسته‌لرین شدتی بیر آی اؤنجه‌دن بری آرتیب و ایندی ایالتده‌کی بوتون خسته‌خانالار بو خسته‌لیکدن تأثیرله‌نیب. دکتر هاشمیانین سؤزلرینه گؤره، حاضیردا کرمان ایالتینده یوکسک اِحتیمال ایله کرونا خسته‌سی اولان 700 شوبهه‌لی خسته‌خانایا یئرلشدیریلمیشدیر.
اردبیل ایالتینده اردبیل طبّ علملری بیلیم‌یوردونون مودورو شهرام حبیب‌زاده سون بیر نئچه گونده اردبیل، مشگین‌شهر، پارساباد و خالخال شهرلرینده ان چوخ خسته‌نین اولدوغونو و بو دؤرد شهرین قیرمیزی وضعيتده اولدوغونو سؤیله‌دی. او علاوه ائتدی تکجه سون 24 ساعت عرضینده 71 یئنی خسته قبول ائدیلدی، اونلاردان 50 نفری آغیر خسته ایدی و 11 نفرده حیاتینی ایتیردی.
دکتر حبیب‌زاده‌نین سؤزلرینه گؤره، اردبیل ایالتینده خسته‌خانایا یئر‌لشدیریلمیش کرونا خسته‌لری‌نین توپلام سایی 382 نفره چاتیب، خسته‌خانالار قیرمیزی و کریتیک وضعيتده‌دیر و خسته‌لرین سایی گونو گوندن آرتیر.
گیلانین طبّ علملری بیلیم‌یوردونون صحیه اوزره معاونی «آبتین حیدرزاده» قئید ائتدی کی، ایالتده کرونا خسته‌لری‌نین 30 فایزی سیاحت ائدنلر و اونلارلا علاقه قورآن اینسانلاردیر. او ایالتده کرونا خسته‌لیگی‌نین آرتدیغینی و حاضیردا 300 نفردن چوخ اینسانین خسته‌خانایا یئر‌لشدیریلدیگینی، تخمیناً 30 نفرین وضعيتی‌نین آغیر اولدوغونو و آی‌سی‌یو شؤبه‌لرینده سونی تنفّوس وئریلدیگینی سؤیله‌دی.
قیرمیزی وضعيتده اولان مازانداراندا، مازانداران طبّ علملری بیلیم‌یوردونون سؤزچوسو «سیمین بابایی»، مازانداران طبّ علملری بیلیم‌یوردونون حمایه‌‌‌سی آلتیندا کرونایا قارشی موباریزه ائدن صحیه چالیشانلاریندان مین نفری کرونایا یولوخاراق خیدمت دؤنگوسوندن خاریج اولموشلار و کرونانین ایکینجی دالغاسیندا دیگر چالیشانلارین ایشی زورلاشمیشدیر دئدی.
صحیه ناظرلیگی‌نین بیلدیردیگینه گؤره قیرمیزی وضعيتده اولان بوشهر ایالتینده، ایالتین کرونا ایله موباریزه اوزره قورولان قرارگاهی‌نین کاتیبی «سعید کشمیری» دونن گئجه بوشهر ایالتی‌نین خسته‌خانالاریندا 56 یئنی کرونار خسته‌نین قبولونا توخوناراق دئدی کی، حال حاضیردا ایالتین خسته‌خانالاری‌نین کرونا شؤبه‌لرینده توپلام 346 خسته خسته‌خانایا یئرلشدیریلمیشدیر و اونلاردان 55 نفری اؤزل باخیم شؤبه‌سینده موعالیجه اولونور.
صحیه ناظرلیگی‌نین سؤزچوسو «سیما سادات سالاری»، اؤلکه‌ده 2 میلیون 200 مین کرونا تستینین آلیندیغینی وورغولادی. او بو گون وئردیگی راپوردا، لرستان، البرز، دوغو آذربایجان ، باتی آذربایجان، ایلام، بوشهر، رضوی خوراسان، خوزستان، زنگان، گلستان، مازاندران، کرمان و فارس ایالتلرینین قیرمیزی وضعیتده و تهران، اصفهان، بوشهر، هرمزگان، قزوین، مرکزی، قوزئی خوراسان، گونئی خوراسان، سمنان، اردبیل، سیستان‌و‌بلوچیستان، همدان، اردبیل و کهگیلویه‌وبویراحمد ایالتلرینین ده خبردارلیق وضعیتینده اولدوغونو بیلدیردی.
اوزرینده اوینانمامیش و گرچک ایستاتیستیکایا گؤره و صحیه ناظرلیگی‌نین و بیلیم‌یوردلاری‌نین یایدیغی معلومات و استانداردلارا اساساً، تهران، گونئی خوراسان، سیستان و بلوچیستان و کرمانشاه ایالتلری حاضیردا قیرمیزی وضعیتده و هرمزگان، کوردستان، قوم و یزد ایالتلری ده خبردارلیق وضعیتده‌دیر.
سون اولاراق قئید ائتمک لازیمدیر کی، صحیه ناظرلیگی‌نین سؤزچوسو «سیما سادات‌لاری»، هر گون اولدوغو کیمی اوزرینده اوینانمیش ایستاتیستیکایی آچیقلادی او بو مدتده 2625 نفره کرونا تشخیصی قویولدوغونو، اونلاردان 1977 نفری‌نین خسته‌خانایا یئر‌لشدیریلدیگینی و توپلام اولاراق دا 278 مین 827 نفرین یولوخدوغونو سؤیله‌دی. عینی زاماندا دیگر 229 خسته اؤلدو و ایراندا کرونادان قایناقلانان اؤلوم ساییسی‌نین توپلامی 14 مین 634 نفره چاتدی.
