ایرانداکی کرونا؛ صحیه ناظری یوخسول اینسانلارین عصیانی‌نین مومکون اولدوغونو آچیقلادی
کرونانین اؤلکه‌نین 21 ایالتینده، او جومله‌‌‌دن تهرانداکی وضعيتی کریتیکدیر و تهرانداکی کرونا ایله موباریزه اوزره قرارگاهین یئتکیلیلری مؤوجود وضعيتین داوام ائتمه‌سی حالدا دورومو کونترول آلتیندا ساخلاماقین چتین اولاجاغینی بیلدیریرلر.
عینی حالدا، صحیه ناظری، تهرانداکی کرونا آجیل اوتوروموندا خالقدان و آدلارینی چکمک ایسته‌مه‌دیگی بیر عیدّه مقاملاردان اؤز ناراحاتچیلیغینی بیلدیردی. نمکی ناظرلیگین کرونا ایله موبارزه ائتمه‌یه حاضیر اولدوغونو ادعا ائده‌رک، علاوه ائتدی ناظرلیگین گؤروی توپلومون ساغلیغینی قوروماقدیر آما اوندان خالقین دولانیشیغینی دوشونمه‌سینی ایسته‌میشلر. «سعید نمکی» امنییتی مسئلهنین جدّی اولدوغونو و آج اینسانلارین عصیان ائده بیله‌جه‌یینی ده سؤیله‌دی.
ناظرلیک طرفیندن کرونا ایله موباریزه پلانینا توخونان صحیه ناظری مؤوجود وضعيتین و کرونا دالغاسی‌نین گئری قاییتماسی‌نین باشقالاری‌نین سهلاًکارلیغی ایله علاقه دار اولدوغونو سؤیله‌دی: «ایستر خالق اولسون، ایسترسه ده دؤولت سئکتورلاریندا وظیفه‌‌‌لرده اوتوران دوستلار.»
او، ایرانین 7 بهمن 1398-جی ایلده اوچوشلاری دایاندیران دونیادا ایلک اؤلکه اولدوغونو و دونیادا کرونا تست کیتلری اورتیلمه‌دن اوّل «پی‌سی‌آر» اوصولونو حاضرلادیغینی ادعا ائتدی.
کرونا تقویمی آلتیندا بورادا گئده یازلاری اوخودوقدان سونرا بعضاً بو ادعالارین یالان اولدوغو آیدین اولور.
نمکی، حسن روحانینی دولایی یوللا تنقید ائده‌رک، ایسلام جومهورییتی لیدری علی خامنه‌ای‌یه آچیق شکیلده یالتاقلیق ائتدی. او آرتیردی کی، جمهور باشقانینا سن اوزولمه و خسته‌لیگین پئشینده اول دئمه‌لری یئرینه اونو ساغلیق و اقتصاد ایکیلیمی آراسیندا قویدولار و او دا ساغلیغا اؤنم وئرن تک قورومو اقتصادا و خالقین دولانیشیغینا اؤنم وئرمه‌سینی ایسته‌دی.
صحیه ناظری علاوه ائتدی کی، روحانی، نئجه باغلایاق یئرینه پرسنلدن نئجه آچیلاجاغینا دایر بیر پروتوکول یازماغی ایسته‌مه‌لییدی.
لاکین بلکه ده نمکی‌نین چیخیشی‌نین ان اؤنملی یئری خالق عصیانی‌نین مومکون اولدوغویدو. صحیه ناظری امنییتی معلوماتلارا دایاناراق اینسانلارین یوخسوللوقدان عصیانا کئچه بیله‌جه‌یینی سؤیله‌دی. نمکی امنییتی مسئلهنین جدّی اولدوغونو و جمهور باشقانی‌نین و امنییتی قوّه‌لری‌نین اینسانلارین دولانیشیغینی و بونون عصیان یاراداجاغینی بیلمه‌مه‌لری و بونون حاقیندا دوشونمه‌لرینی لازیم اولدوغونو سؤیله‌دی.
بعضی ایالتلرین صحیه چالیشانلاری کرونا یاتاقلاری‌نین تاماملاندیغینی و یا آی‌سی‌یولارین دولدورولدوغونو اعلان ائدرکن، صحیه ناظری‌نین معاونی «قاسم جان بابایی»، کرونا خسته‌لری‌نین حاضیرکی وضعيتی‌نین 98-جی ایلینین اسفند آیینا گؤره پیسلشمه‌دیگینی سؤیله‌دی. او، گرکن ایمکاناتلاری ایالتلره وئریلدیگینی و خسته‌خانا یاتاقلاری‌نین حاضیرکی وضعيتی‌نین کرونا خسته‌لرینی قبول ائتمک اوچون یئترلی اولدوغونو و سيّار خسته‌خانالارین یئنیدن آچیلماسینا احتیاج اولمادیغینی ادعا ائتدی.
بونونلا بیرلیکده، اهواز طبّ علملری بیلیم‌یوردونون رئیسی، خوزستاندا آی‌سی‌یو یاتاقلاریندا یئترسیزلیک اولمادیغینی و عینی زاماندا بوش یاتاغیندا اولمادیغینی دئییر، بو دا آغیر خسته‌لرین سایی‌نین آرتماسی ایله خوصوصی یاتاقلارین اولمایاجاغینی گؤستریر.
موعالیجه ساحه‌‌‌سینده آلت یاپیلاری‌نین اولماماسی‌نین، خوزستان ایالتی‌نین کئچمیشدن قالما پروبلئملردن بیری اولدوغونو وورغولایان فرهاد ابول‌نژادیان، دئدی بعضی خسته‌خانالار اوچون صحیه ناظرلیگی بیر اکسیژن ژنراتورو تامین ائتدی، دیگرلری اوچون ده تامین ائتمه‌یه چالیشیریق و بلیرتمک گره‌کیر کی، هر بیر جیهازین قیمتی ایکی میلیارد 40 میلیون تومندیر.
اهواز طبّ علملری بیلیم یوردونون صحیه اوزره معاوینی ده خوزستانین کرونا باخیمیندان قیرمیزی ایالت اولاراق یئددینجی هفته‌سینی کئچیردیگینی وورغولایاراق، بو ایالتین کرونانین ان تهلوکه‌‌‌لی بؤلگه‌لریندن بیری اولدوغونو خبردار ائتدی. سید محمد علوی، سون ایکی-اوچ گونده خوزستاندا یئنی کروناویروسا یولوخانلارین سایی‌نین بیر قدر آزالماسینا باخمایاراق بونون مووقّتی آزالما اولدوغونو سؤیله‌دی.
تهراندا دا بعضی صحیه مسووللاری‌نین جدّی خبردارلیقلارینا باخمایاراق وضعيت کریتیک حالا گلیبدیر. ایران‌وایرین اؤزل ایستاتیستیکاسینا دایاناراق، سون اوچ گونده بو بؤیوک شهیرده گونده‌لیک اؤلنلرین سایی 70 نفره چاتیب و توپلام 220 جسد بهشت زاهرایا تحویل وئریلیبدی. عینی ایستاتیستیکایا گؤره، اسفندین 1-دن بو یانا تهراندا توپلام 6.243 نفر کرونادان اؤلموشدور.
بو چرچیوه‌ده، تهرانین کرونا ایله موباریزه اوزره قرارگاهی‌نین فرماندهی علیرضا زالی، بیلیم‌یوردلاریندا حضوری ایمتاهانلارین لغو ائدیلمه‌سینی و ماليه عملیاتلاری‌نین سويه‌‌سی‌نین آرتیریلماسینی، ایش واختی‌نین آزالدیلماسینی و دولت چالیشانلاری‌نین 50 فایز‌نین ایستیفاده‌سینی طلب ائتدی.
زالی‌نین سؤزلرینه گؤره، سون 48 ساعت عرضینده تهرانین ساغلاملیق مرکزلرینده کووید-19 خسته‌لیگی علامتلری اولان خسته‌لرین سایی ان یوکسک سويه‌‌یه چاتمیشدیر. ایندی تهراندا چوخ کؤورک بیر وضعيت وار. سون 10 گون عرضینده خسته‌لرین و اؤلوملرین سایی آرتماقدادیر.
تهرانداکی کریتیک وضعيته گؤره صحیه ناظری‌نین معاونینی تهران، ایران و بهشتی طبّ علملری بیلیم یوردلاریندان، تهرانداکی بوتون طبّ مرکزلرینه و خسته‌خانالارا، کروناویروس شوبهه‌سی اولان خسته‌لری علاوه خبردارلیغا قدر قبول ائتمه‌لرینی ابلاغ ائتدی.
بخشنامه‌یه گؤره، خسته‌خانادا بوش یاتاق یوخدورسا، هدایت قرارگاهیندان قبول آلاراق بیلیم‌یوردونا باغلی خسته‌خانالارینا موراجعت ائتمک لازیمدیر.
تهران والیسی انوشیروان محسنی بند‌پی ده تهران اوچون خبردارلیق وضعيتینی قیرمیزی وضعییت کیمی اولدوغونو اعتراف ائده‌رک، تهرانین اؤزل دورومونا گؤره، پایتختین دورومو قیرمیزییا چاتسا، وضعيته نظارت ائتمک چتین اولاجاق دئدی.
تهران شهر شوراسی‌نین سؤزچوسو علی اعطا، توییترده‌کی بیر یازیسیندا، پایتختده‌کی کرونانین یاییلماسی حاقیندا یازدی؛ شهرده‌کی وضعيت «چوخ آجیناجاقلی» و قیرمیزی وضعيتده و خسته‌لرین سایی‌نین هیزلا آرتماسی حیرت وئریجیدیر و کرونا قرارگاهی هئچ بیر سهلاًکارلیق ائتمه‌دن ان جدّی محدودیّتلری تصدیقله‌مه‌لی و تطبیق ائتمه‌لیدیر.
مجلیسده صحیه کمیسیونون عضوو ده بعضی گونلرده ایراندا کروناویروسدان 300 نفرین اؤلدویونو سؤیله‌دی.
محمدعلی محسنی‌بند‌پی، صحیه ناظرلیگی‌نین آچیقلادیغی رقملری خسته‌خانایا یئر‌لشدیریلن و اورادا اؤلن اینسانلارین سایینی گؤستردیگینه گؤره داها آشاغی اولدوغونو سؤیله‌دی. آنجاق ائوده و یا خسته‌خانایا آپاریلارکن دونیاسینی دگیشنلر بو ایستاتیستیکالاردا یئر آلمیر.
صحیه ناظری‌نین معاونی سون اوچ هفته عرضینده خوزستان، بوشهر، هرمزگان، کوردستان، کرمانشاه، دوغو آذربایجان و باتی آذربایجان ایالتلرینده ده کروناویروسا یولوخانلارین سایی‌نین آرتدیغینی سؤیله‌دی.
مشهد بؤیوک‌شهیر بؤلگه‌سینده داها چوخ محدودیّت تطبیق ائدیلمه‌سی‌نین مومکون اولاجاغینا توخونان قاسم جان‌بابایی، محدودیّتلرین یئنیدن گتیریلمه‌سی ایله خسته‌لیگین آزالدیلاجاغینی گؤزله‌دیگینی سؤیله‌دی، آنجاق سرت محدودیّتلرین قویولماسی ایله باغلی کرونا میلّی قرارگاهی قرار وئرمه‌لیدیر دئدی.
ایراندا کرونانین یاییلماسی‌نین ایلک دالغاسیندا ان چوخ اؤلوملرین یاشاندیغی اوچ ایالتدن بیری اولان مازانداراندا حال حاضردا 700 کرونا خسته‌سی خسته‌خانایا یئر‌لشدیریلیب و سون بیر هفته‌ده بو خسته‌لرین سایی 50% آرتیب.
صحیه ناظری‌نین معاونی ایرج حریرچی، مازانداران ایالتینده کرونا خستهلیگینین آرتدیغینی و اینسانلارین بو ایالته سیاحت ائتمکدن چکینمه‌لرینی ایسته‌دی.
رسمی رقملره گؤره، ایرانین 20 ایالتی‌نین ایندی قیرمیزی وضعییتده اولدوغونو نظره آلساق، ایالتلرده‌کی بعضی خبرلر چوخ اوخشاردیر؛ کرونا خستهلیگینین و اونا باغلی اولاراق اؤلوملرین یوکسلمه‌سی و ایالتلرده‌کی قیرمیزی شهرلرین سایی‌نین آرتماسیدیر.
بابل طبّ علملری بیلیم‌یوردونون سون ایستاتیستیکاسینا گؤره، بو شهرده یئنی خسته‌لرین سایی رکورد سويّه‌‌یه چاتدی و هله ده آرتیر و شهرده‌کی وضعيت بو هفته‌نین شنبه گونوندن بری قیرمیزی اولدو. بابل کرونا خستهلیگینین ایلک دالغاسیندا ایرانین ان چوخ ائتکیلنمیش بؤلگه‌لریندن بیری ایدی و ایکی آی عرضینده کریتیک بیر وضعيت یاشادی.
مازانداران طبّ علملری بیلیم‌یوردونون موعالیجه ایشلری اوزره معاونی تورج اسدی، سون بیر هفته‌ده ایالتده کسکین نفس دارلیغی پروبلئمی اولان کرونا خسته‌لری‌نین آرتدیغینی قئید ائتدی. او، ایالتین رئانیماسییا یاتاقلاری یئته‌سیزلیگی ایله اوزلشه بیله‌جه‌یینی خبردار ائتدی، چونکی ایالتده کرونا خسته‌لری‌نین سایی سون ایکی هفته‌ده ایکی قات آرتاراق تخمیناً 650 نفره چاتدی.
دوغو آذربایجان ساوجیسی محبوب علبلو، ایالتده کرونا خسته‌لیگی ایله موباریزه اوچون یاس مراسیملری و ائو‌لیلیکلرین قاداغان اولوندوغونو سؤیله‌دی و بئله مراسیملر کئچیریلمه‌سی تقدیرده مکانلار مؤهورلنه‌جکدیر دئدی.
او علاوه ائدیب کی، مراسیمده کیملرسه کرونایا یولوخورسا، یاس و یا توی صاحبی و مکان صاحبی عدلی و مدنی باخیمدان مسوولیّت داشییاجاقلار. بدنسل ضرر و یا قصداً آدام اؤلدورمه‌یه گؤره تضمینات اولاراق دییه اؤده‌مه‌یه و جزا چکمه‌یه محکوم اولاجاقدیر.
بیرجند طبّ علملری بیلیم‌یوردونون رئیسی محمود دهقانی، گونئی خوراسان ایالتی‌نین شهرلرینده یئنی محدودیّتلرین طلب اولوندوغونو آچیقلادی و دئدی ایالتده کسکین نفس دارلیغی سیمپتوملاری اولان خسته‌لرین سایی گون‌به‌گون آرتیر و اونجه‌کی دؤورله موقایسه‌‌ده 2،5 قات آرتمیش و ایالتده خسته‌خانایا یئر‌لشدیریلنلرین سایی 218 نفردن چوخ اولموشدور.
شیراز طبّ علملری بیلیم‌یوردونون صحیه ایشلری اوزره معاونی علیرضا میراحمدی‌زاده، فارس ایالتینده کرونا سببییله اؤلنلرین سایی‌نین بیر گونده 2 قات آرتماسینن و ایالت دورومون کؤتولشمه‌سی‌نین ناراحات ائدیجی اولدوغونو سؤیله‌دی.
گلستان طبّ علملری بیلیم‌یوردونون رئیسی عبدالرضا فاضل، بو ایالتده گرگان و آزادشهرین ده کرونانین یوکسک یاییلمیش شهرلره علاوه ائدیلمه‌سینه توخوناراق، بوتون ایالتین شرطلری‌نین قیرمیزی اولدوغونو سؤیله‌یه‌رک، ایالتین طبّ مرکزلرینده کرونادان اؤتورو خسته‌خانایا یئرلشنلرین سایی 750-دن چوخ اولدوغونو و ایالتین خسته‌خانایا یئر‌لشدیریلن خسته‌لری‌نین سایی ایسه 50 نفردن 100 نفره یوکسلدیگینی آچیقلادی.
مشهد طبّ علملری بیلیم‌یوردونون مودورلریندن بیری محمدحسن درخشان، مشهد طبّ علملری بیلیم‌یوردونون ساغلاملیق خیدمتلری مرکزلرینده هر گون تخمیناً 600 کرونا تستی‌نین آلیندیغینی و تستلرین نتیجه‌لری‌نین تقریباً 35-40 فایز‌نین موثبت اولدوغونو سؤیله‌دی. باشقا سؤزله، تکجه مشهدده هر گون تخمیناً 240 یئنی کرونا خسته‌سی تشخیصی قویولور.
کرمانشاه والیسی هوشنگ بازوند، ایالتینده کئچن هفته‌دن بری کرونایا یولوخانلارین ساییسینی ثابت بیر گئدیشاتدا اولدوغونو و بؤیومه‌نین دایاندیغینی، آنجاق قیرمیزی وضعيتین یئنه ده دوام ائتدیگینی و خسته‌خانالاردا ایندی 380 کرونا خستهسینین اولدوغونو و هر 150 دقیقه‌ده بیر کرونا خستهسینین اؤلدوغونو آچیقلادی.
اردبیل قیزیل آی‌پارا جمعيّتی‌نین مودورو رامین معبودی، کرونانین اؤلکه‌یه گلیشیندن بری ایالت اهالیسی‌نین تخمیناً 20 فایزی‌نین ویروسا یولوخدوغونو سؤیله‌دی. بئله‌لیکله، ایالتده یاشایان 1،3 میلیون اینساندان تخمیناً 260 مینینین کرونایا یولوخدوغونو سؤی‌له‌مک اولار.
سقزین اؤزل فرمانداری کامیل کریمیان، کرونانین شهرده یئنیدن مئیدانا چیخماسینا ایشاره ائده‌رک دئدی؛ ساغلیق ساحه‌‌‌سینده سرت تدبیرلر مؤوجوددور و اینسانلارین ساغلیغینی تهلوکه‌‌‌یه آتانلارا جدّی قارشیلیق وئریله‌جکدیر.
صحیه ناظرلیگی‌نین رسمی ایستاتیستیکاسینا گؤره، سقزده کرونا سببییله 70 نفر اؤلوبدور.
صحیه ناظرلیگی‌نین سؤزچوسو «سیما سادات‌لاری»، هر گون اولدوغو کیمی اوزرینده اوینانمیش ایستاتیستیکایی آچیقلادی او بو مدتده 2691 نفره کرونا تشخیصی قویولدوغونو، اونلاردان 1455 نفری‌نین خسته‌خانایا یئر‌لشدیریلدیگینی و توپلام اولاراق دا 248379 نفرین یولوخدوغونو سؤیله‌دی. عینی زاماندا دیگر 153 خسته اؤلدو و ایراندا کرونادان قایناقلانان اؤلوم ساییسی‌نین توپلامی 12 مین 84 نفره چاتدی.
صحیّه ناظرلیگی‌نین سؤزچوسونون وئردیگی معلوماتا گؤره، حال حاضیردا خوزستان، هرمزگان، بوشهر، دوغو آذربایجان، کوردستان، باتی آذربایجان، خوراسان رضوی و ایلام ایالتلری قیرمیزی و تهران، اصفهان، مازندران، گلستان، البرز، کرمان، یزد، همدان و اردبیل، سیستان و بلوچیستان خبردارلیق وضعییتده‌دیر و بو گونه قدر اؤلکه‌ده یالنیز 1.846.793 کووید-19 تستی آلینمیشدیر.
صحیه ناظرلیگی‌نین سؤزچوسو طرفیندن وئریلن معلوماتا گؤره، گلستان ایالتی خبردارلیق وضعيتینده‌دیر و بو معلوماتا باخمایاراق گلستان ایالتی‌نین طبّ علملری بیلیم‌یوردونون رئیسی بو ایالتین وضعيتی‌نین قیرمیزی اولدوغونو دئییر و بو دا صحیه ناظرلیگی سؤزچوسو طرفیندن وئریلن معلوماتین اعتبارسیز اولدوغونو گؤستریر.
