ایرانداکی کرونا؛ حسن روحانی و کرونا دؤنه‌مینده‌کی پارلاقلیق
صحیه ناظرلیگی و حسن روحانی حؤکومتی‌نین مقاملاری سون ایکی آیدا دفعه‌‌لرله ایراندا ایکینجی کرونا دالغاسی‌نین باش وئرمه‌سینی اینکار ائتسه‌لر ده، مؤوجود وضعیتی کرونانین ایلک دالغاسی‌نین داوامی اولاراق آدلاندیریرلار. حسن روحانی بوگون دئدی ایران هر ایکی کرونا دالغاسیندا اونا قارشی پارلاق بیر موباریزه آپاردی.
دیگر طرفدن، صحیه ناظری بئش گون اؤنجه بیر نئچه ایران کرونا واکسنی‌نین اینسان تستلریندن کئچدیگینی و تئزلیکله کلینیک سیناقلارا گیره‌جه‌یینی ادعا ائدرکن، ایران پاستور انستیتوسونون اپیدمیولوژی و بیو ایستاتیستیکا شؤبه‌سی‌نین رئیسی اورتمک اوچون سعیلر گؤستریلدیگینی و ایران واکسنی‌نین حیوان آراشدیرمالاری‌نین سون مرحله‌‌‌سینده اولدوغونو و اینسان آراشدیرماسی مرحله‌‌‌سینه هله چاتمادیغینی سؤیله‌دی.
***
حسن روحانی رادیو و تلویزیونون باش مودورلری ایله گؤروشده ایراندا کرونا یاییلماسینا توخوناراق دئدی: «شوبهه‌سیز کی، ایران ایسلام جمهوریییتی رژیمی و ایران خالقی بو حادثه‌‌‌ده و بو واجیب و هرطرفلی بین الخلق مسئله‌‌ده پاریلدادی.»
روحانی‌نین سؤزلرینه گؤره، ایران بعضی حاللاردا کرونایا قارشی دیگر اؤلکلردن داها یاخشی ایشلر گؤرموش و هئچ بیر حالدا دیگر اؤلکلردن داها پیس چیخیش ائتمه‌میشدیر.
ایراندا 1398-جی ایلین بهمن آیینین سونو و 1399-جی ایل خرداد آیینین سونوندا باش وئرن ایکینجی کرونا دالغاسینا توخونان ایران جمهورباشقانی، ایراندا ایکینجی دالغانین یاییلماسیندا دئدی «خاریجی مئدیا» یئنیدن آچیلیشلارین ایکینجی دالغایا سبب اولدوغونو تبلیغ ائدیردی آما بونا باخمایاراق، هر ایکی کرونا دالغاسی دیگر اؤلکلرده ده گؤرونموشدو. قئید ائدک کی، سون آیلاردا ایران صحیه ناظرلیگی‌نین مقاملاری تئز بیر زاماندا یئنیدن آچیلماسینی تنقید ائتمیشلر.
روحانی 3 اسفند 1398-جی ایل تاریخینده کرونا ایله موباریزه اوزره میلی قرارگاهین یارانماسینا دا توخوناراق، ایرانین بو قرارگاه چرچیوه‌سینده ائتدیگی حرکتی اؤلکه‌نین حوقوقی قورولوشونون، قضا و پروبلئم گونونده اورتایا چیخا بیله‌جک بیر قورولوش اولدوغونو گؤستردیگینی سؤیله‌دی.
کرونا ایله موباریزه قرارگاهی‌نین رئیسی ده بؤحران زامانی ایرانین 23 مین ، 25 مین و یا 30مین یاتاغین کرونا اوچون آییرماغی باجاردیغینی بیلدیره‌رک، آی‌سی‌یو یاتاقلاری‌نین اؤلکه‌دکی توتومونون نه ایلک دالغادا، نه ده ایکینجی دالغادا آز اولمادیغینی ادعا ائتدی. ایرانین طبّی سیستملر تشکیلاتی‌نین معاونینین آچیقلاماسی داخیل اولماقلا سون آلتی آیدا یاییملانان خبرلرله باغلی بو ادعالار شوبهه آلتینا آلینمالیدیر.
صحیه ناظری بئش گون اؤنجه بیر نئچه ایران کرونا واکسنی‌نین اینسان تستلریندن کئچدیگینی و تئزلیکله کلینیک سیناقلارا گیره‌جه‌یینی ادعا ائدرکن، ایران پاستور انستیتوسونون اپیدمیولوژی و بیو ایستاتیستیکا شؤبه‌سی‌نین رئیسی اورتمک اوچون سعی گؤستریلدیگینی و ایران واکسنی‌نین حیوان آراشدیرمالاری‌نین سون مرحله‌‌‌سینده اولدوغونو و اینسان آراشدیرماسی مرحله‌‌‌سینه هله چاتمادیغینی سؤیله‌دی.
«احسان مصطفوی»نین، سؤزلرینه گؤره، بو واکسنلر لابراتوار مرحله‌‌‌لرینی اوغورلا کئچدی و چالیشمالاردان بیری و یا ایکیسی بو مرحله‌‌‌نی مووفقیتله کئچدی و حیوان آراشدیرمالاری مرحله‌‌‌سینده‌دیر و بو فازدا سون مرحله‌‌‌لرینی کئچیریرلر.
مصطفوی علاوه ائتدی کی، نؤوبتی مرحله بیر، ایکی و اوچ فازلاری اؤزونده جمع‌لشدیرن اینسان آراشدیرمالاریدیر. بئله‌لیکله، صحیه ناظری‌نین بئش گون اؤنجه‌کی ادعاسینین نَیه اساسلاندیغی معلوم دئییل.
عینی زاماندا، واکسینلرین و کووید-19 اوچون اؤزل موعالیجه‌‌‌نین اولماماسی مکتبلرین آچیلماسینا دا مانع تؤرتدی. تحصیل ناظری‌نین معاونی شاپور محمدزاده مکتبلرین حاضرکی دورومو ایله باغلی ناراحاتلیقلارا توخوناراق قارشیدان گلن تدریس ایلی اوچون اوچ سناریونون تعیین اولوندوغونو سؤیله‌دی.
اونون سؤزلرینه گؤره، آغ وضعیتده اولان بؤلگه‌لرده صینیفلار اوز اوزه اولاجاقدیر. ساری وضعیته صاحب و خبردارلیق وضعیتده اولان بؤلگه‌لرده 50فایز «شاد» آنلاین تحصیل شبکسی شکلینده و 50فایز اوز اوزه شکلینده اولاجاق و اؤیرنجیلر ایکی حیصه‌‌‌یه بؤلونه‌جک و توپلام اوچ گون مکتبده اولاجاقلار. قیرمیزی وضعیتده اولان ایالتلرده درسلر تام و قیابی اولاراق «تلویزیون» و «شاد»، شبکسی واسطه‌‌‌سیله اولاجاقدیر.
ایرانین تعجیلی یاردیم تشکیلاتی‌نین رئیسی مطبوعات کنفرانسیندا، کرونا ویروسونون ایرانا گلیشی‌نین ایلک گونلریندن اعتباراً ویروسلا موباریزه اوچون دقتلی بیر پلانین ایزلندیگینی سؤیله‌دی. ایکی ایل اؤنجه کرونا و دیگر فؤوقلاده حاللاری موذاکیره ائتمک اوچون ایستیفاده ائدیلن خوصوصی عملیات قروپونون ایشه باشلاماسینا توخونان «پیرحسین کولیوند»، کرونا زامانی اؤلکه‌نین تعجیلی خیدمتلرینه ائدیلن چاغیریشلارین دؤرد قات آرتدیغینی آچیقلادی.
کرونا بؤحرانیندا تعجیلی طبّی خیدمت گؤستریلمه‌سینده هر هانسی بیر فاصیله‌نین اولمادیغینی وورغولایان کولیواند، ویروسون ایرانا گلیشیندن آلتی آی سونرا تعجیلی یاردیم چالیشانلاری‌نین هله ده گؤزله‌مه وضعیتینده اولدوغونو و بوتون مرخصی‌لرین لغو ائدیلدیگینی سؤیله‌دی.
اؤلکه تعجیلی یاردیم تشکیلاتی‌نین رئیسی‌نین سؤزلرینه گؤره، سون آلتی آیدا 1900 تعجیلی یاردیم چالیشانی کرونا خسته‌لیگینه یولوخوب و نتیجه‌ده 4 نفر اؤلوب.
او اؤلکه‌نین تعجیلی یاردیم تشکیلاتی‌نین محرم یاسلاریندا ایشتیراک ائتمه‌لرینی گؤسترمک اوچون تعجیلی یاردیم ماشینلارینا ایشاره‌لر قویاجاغینا ایشاره ائده‌رک، محرم ماتم مراسیملرینده ساغلاملیق پروتکللارینا اویغون حرکت ائده‌جکلرینی سؤیله‌دی.
مئدیالارین وئردیگی معلوماتا گؤره، میلی سندلر و کیتاب‌خانا تشکیلاتی، بیر آچیقلاما یایاراق کرونا قیرمیزی وضعیتی‌نین داوام ائتمه‌سی اوچون کرونا قرارگاهی‌نین تصدیقلرینه اویغون حرکت ائتمک و کرونا یاییلماسی‌نین قارشیسینی آلماق اوچون، تهراندا، ایران میلی کیتاب‌خاناسی‌نین سالونلاریندا صاباح، چارشنبه آخشامی، 28 مرداددان اعتباراً باغلاناجاغینی و بو قرارگاه طرفیندن یئنی وضعیتین بیلدیریلمه‌سینه قدر داوام ائده‌جه‌یینی بیلدیردی.
بو آچیقلامایا گؤره، میلی کیتاب‌خانانین سالونلاری بو مدت عرضینده هئچ بیر شخصی خیدمت گؤسترمه‌یه‌جک و سالونلارین باغلانماسی‌نین داوام ائتمه‌سی کرونا قرارگاهی طرفیندن وضعیتین اعلان ائدیلمه‌سینه باغلی اولاجاق.
خاتیرلاداق کی، میلی کیتاب‌خانا ایراندا کرونا ویروسونون رسمی تانینماسیندان بو یانا کئچن آلتی آی عرضینده ان آزی ایکی دفعه مووقتی اولاراق باغلانمیشدیر.
صحیه ناظرلیگی‌نین سؤزچوسو سیما سادات‌سالاری‌نین بوگونکو آچیقلاماسینا گؤره سون 24 ساعت عرضینده 27 مرداد 1399 بازار ائرته‌سی گون‌اورتاسینا قدر، اؤلکه‌ده 2 مین 247 یئنی کرونا خسته‌سی تثبیت ائدیلدی و اونلاردان مین 255 نفری خسته‌خانایا یئرلشدیریلدی و خسته‌لرین توپلام سایی 345 مین 255 نفره چاتدی. عینی واختدا 165 خسته خسته‌لیکلری‌نین آغیرلاشماسی سببییله حیاتینی ایتیردی و ایراندا کرونادان اؤلنلرین رسمی سایی 19 مین 804 نفره چاتدی.
«سیما سادات‌لاری»نین، وئردیگی معلوماتا گؤره، اؤنجه‌کی گونلرده اولدوغو کیمی مازانداران، تهران، گلستان، قوزئی خوراسان ، اردبیل، اصفهان، البرز، رضوی خوراسان، کرمان، سمنان، دوغو آذربایجان، قوم، مرکزی، یزد و گیلان اولماق اوزره 15 ایالت قیرمیزی وضعیتده و فارس، ایلام، لرستان، هرمزگان، زنگان، قزوین، باتی آذربایجان، بوشهر، همدان، چهارمحال و بختیاری و کهگیلویه و بویراحمد اولماق اوزره 11 ایالت ده خبردارلیق وضعیتده‌دیرلر.
صحیه ناظرلیگی‌نین سؤزچوسونون دئدیگینه گؤره، دونیادا اورتالاما «کرونا اؤلومو نیسبتی» 5،1 فایزه چاتمیش و آزالماقدا داوام ائدرکن، ایراندا کرونادا اؤلوم نیسبتی 6.2 فایز اولاراق یئنه ده قلوبال نیسبتدن یوکسکدیر.
