ایرانداکی کرونا؛ حسن روحانی‌نین رسمی ایستاتیستیکاسی: ۲۵ میلیون ایرانلی کرونایا یولوخوب
تیر (۱۸ جولای)
تهراندا محدودیتلرین باشلاماسی ایله عینی واختدا، حسن روحانی، صحیه ناظرلیگی‌نین راپورونا ایستناداً سون بئش آیدا تخمیناً ۲۵ میلیون ایرانلی‌نین کرونا ویروسونا یولوخدوغونو و 35 میلیوندان چوخ اینسانین ریسک آلتیندا اولدوغونو سؤیله‌دی؛ بو همان صحیه ناظرلیگی‌نین راپورودور کی، ایستاتیستیکالار اوزرینده اوینایاراق تست ائدیلمه‌میش خسته‌لری کسکین نفس دارلیغی سیندرومو اولاراق گؤستریر.
صحیه ناظرلیگی‌نین راپورونا توخونان حسن روحانی، کرونا ایله موباریزه اوزره قورولان قرارگاهین ایجلاسیندا، تخمیناً ۲۵ میلیون ایرانلی‌نین کرونا ویروسونا یولوخدوغونو و بو گونه قدر داها 30-35 میلیونون ریسک آلتیندا اولدوغونو سؤیله‌دی. ۲۰۰ میندن چوخ اینسان خسته‌خانایا یئر‌لشدیریلدی، لاکین گلن ایل داها بیر نئچه میلیون اینسانین خسته‌خانایا قالدیریلما اِحتیمالی وار.
ایران جمهورباشقانی‌نین سؤزلرینه گؤره، ایراندا کرونا اپیدمیسی، قوم و گیلاندا باشلامیش و چینین ووهان شهریندن توریستلرین همچینین طلبه‌‌‌‌لرین گلمه‌سی ده بو ویروسون ایراندا یاییلماسینا سبب اولموشدور. روحانی، خسته‌لیگین ایلک دالغاسی‌نین آرتیق کئچدیگینی، آنجاق ایکینجی دالغانین اساساً اینسانلارین خسته‌لیگه دقت ائتمه‌مه‌لری و یاس، توی و ضیافت عادت و عنعنه‌‌لرینی یئرینه گتیردیکلرینه باغلی اولدوغونو سؤیله‌دی.
ایران جمهورباشقانلیغی خبرلشمه شؤبه‌سی‌نین معاونی «علیرضا معزی»، صحیه ناظرلیگی‌نین راپورونون تخمینی اولدوغونو قئید ائده‌رک، کرونا ویروسونا یولوخموش 25 میلیون ایرانلی‌نین ویروسا قارشی تام توخونولمازلیق قازاندیغینی و بیر مدت داها بو خسته‌لیگه معروض قالمایاجاغینی ادعا ائتدی. آنجاق ویروسوا یولوخموش شخصلرین تامامیله توخونولماز اولوب اولمایاجاغی هله علمی اولاراق تایید اولمامیش. خاطیرلاتماسی گره‌کیر کی، دونن کوردستان طبّ علملری بیلیم‌یوردونون معاونی چوخ سایدا اینسانین بو ایالتده ایکینجی کرونا دالغاسیندا ایکینجی دفعه کرونایا یولوخدوغونو آچیقلادی.
آنجاق بو سؤزلره جاواب اولاراق صحیه ناظرلیگی‌نین تدقیقات و تکنولوژی معاونی «رضا ملک‌زاده»، ادعا ائتدی؛ ایندییه قدر بیلینن بودور کی، کرونا خسته‌لیگی داواملی توخونولمازلیغا سبب اولور و بو توخونولمازلیغین قالیجی اولوب اولمادیغی معلوم دگیل و یئنیدن کرونایا یولوخان دئییلن اینسانلارین چوخوندا، خسته‌لیگین مدتی‌نین اوزادیغی و استثنا حاللاردا حتی خسته‌لیک ۶۰ گونه قدر داوام ائدیر.
عینی زاماندا، روحانی‌نین خسته‌لر اوچون آچیقلادیغی رقمله صحیه ناظرلیگی‌نین گونده‌لیک اعلان ائتدیگی رقم آراسینداکی بؤیوک فرقی نظره آلاراق، کرونا قرارگاهی‌نین علمی کومیته‌سی‌نین کاتیبی «مصطفی قانعی»، خسته‌لیگه گؤره اؤنجه‌دن ائشیتمه‌دیگیمیز یئنی و قریبه بیر تعریف وئردی. روحانی‌نین چیخیشیندا ۲۵ میلیون اینسانین کرونایا یولوخوب دئدیگی رقه‌مینه توخونان دکتر قانعی بو ایستاتیستیکانین خسته‌لرین سایینی دئییل، بلکه خسته‌لرین دقیق سایی خسته‌خانایا یئر‌لشدیریلن و یا خسته‌لیک تشخیصی قویولانلارلا علاقه‌‌‌لی اولدوغونو سؤیله‌دی.
بو ديَیشیک تعریفه گؤره! خسته‌لیک تشخیصی قویولمایان کیمسه‌لر، خسته دئییللر. قانعی، صحیه ناظرلیگی‌نین 25 میلیون اینسانین و یا ایران اهالیسی‌نین تخمیناً ۲۰ فایزینین کروناویروس اولدوغونو آچیقلادیغیندا قصدینین یونگول انفکسیون کئچیرنلر اولدوغونو بیلدیردی. اونا گؤره یعنی خسته‌لرین پروبلئمی حکیمه گؤرونه‌جک قدر جدی دگیلدی. خسته‌لیگه یولوخانلارین و اؤلنلرین سایی، صحیه ناظرلیگی طرفیندن گونده‌لیک اعلان اولوندوغو کیمیدیر.
داخیلی ایشلر ناظرلیگی‌نین تهلوکه‌‌‌سیزلیک و اینتیظام ایشلری اوزره معاونی «حسین ذوالفقاری»، خسته‌لیگین اؤلکه‌ده یاییلماسی‌نین قارشیسینی آلماق اوچون، والیلره و ایالتده‌کی کرونا قرارگاهلارینا گؤندردیگی بیر بیلدیریشده اؤلکه‌ده کرونا خسته‌لیگی‌نین یئنیدن باشلاماسینا و بعضی محدودیتلرین تطبیق اولونماسینا توخوناراق، وطنداشلارین ساغلاملیغینی قوروماق، یاییلما و خسته‌لیگی آزالتماق اوچون اؤلکه‌ده هر هانسی بیر کنفرانس، سمینار و توپلانتی کئچیرمه‌یین قاداغان اولدوغونو بیلدیردی.
صحیه ناظری سعید نمکی، حسن روحانی‌نین والیلرله اولان ویدئوکنفرانسیندا کهگیلویه و بویراحمدین، خوزستان کیمی، کرونانین زیروه‌سیندن کئچمه‌دیگینی و یاخین گونلرده چتین شرطلرله قارشیلاشا بیله‌جه‌یینی سؤیله‌دی.
مازاندارانداکی وضعیت هله ده کریتیکدیر و خسته‌خانایا یئر‌لشدیریلن خسته‌لرین سایی سرعتله آرتیر. مازانداراندا گنج و اورتا یاشلی اینسانلارین کرونایا یولوخدوغونا توخونان صحیه ناظری‌نین معاونی، «قاسم جان‌بابایی» عائله‌‌‌لرین ساغلیق نؤقطه‌‌‌لرینی رعایت ائتمه‌مه‌سینی خسته‌لیگین آرتاماسی‌نین سببینی اولاراق آچیقلادی.
پایتختده محدودیتلرین باشلاماسی ایله بیرلیکده، تهران تهلوکه‌‌‌سیزلیک پولیسی‌نین معاونی «نادر مرادی»، کنفرانس و توپلانتیلارین کئچیریلمه‌سی‌نین قاداغان اولدوغونو و ایدمان کلوبلاری‌نین، کافه‌لرین فعالیتلری‌نین بو گوندن اعتباراً باغلاناجاغینی بیلدیردی. بو مرکزلر قایدالارا عمل ائتمزسه، خبردارلیق ائدیله‌جک و داها سونرا باغلاناجاق.
بو، دئمک اولار کی، بوتون ایالتلرده قیرمیزی و خبردارلیق مرحله‌‌‌سینده گؤروله بیله‌جک بیر وضعیتدیر. بو محدودیتلر ایالتلرین بوتون شهرلرینده تطبیق اولونوب و چهارمحال‌و‌بختیاری کیمی بعضی ایالتلرده بو محدودیتلرین تطبیقی بیر نئچه هفته‌دیر داوام ائدیر.
«شیراز طبّ علملری بیلیم‌یوردو» اعلان ائتدی کی، دؤولت خسته‌خانالاری‌نین یاتاقلاری‌نین دولماسی ایله، شنبه گونوندن اعتباراً شیرازین اؤزل خسته‌خانالاریندا کرونا خسته‌لیگی اولان خسته‌لرین قبولونا باشلانیلاجاق. حال حاضیردا شیرازداکی «علی‌اصغر»، «چمران»، «فقیهی»، «نمازی»، «بعثت»، «دنا»، «کوثر»، «بهشتی» و «مرکزی» خسته‌خانالاریندا کرونا خسته‌لیگی اولان خسته‌لره خیدمتلر وئریلیر و «دوران» خسته‌خاناسی‌نین ایمکانلاریندان ایستیفاده ائتمک اوچون ده تدبیرلر گؤرولور.
هرمزگان طب علملری بیلیم‌یوردونون خالق ایله علاقه‌‌‌لر اوزره مودورو «فاطمه نوروزیان» ، بیر گئجه‌ده هرمزگاندا ۱۰ خسته‌نین اؤلدویونو سؤیله‌دی و ایالتده رسمی اؤلنلرین سایی‌نین ۴۴۵ نفره یوکسلدیگینی بیلدیردی.
بو بیلیم‌یوردونون ساغلاملیق اوزره معاونی «محمود حسین‌پور»، هرمزگانداکی کرونا معاینه‌‌لرین سایی‌نین آزالماسی‌نین سببینی، خسته‌لیگین زیروه‌سینده اولدوغونو و خسته‌لیک علامتی اولان هر کسی خسته‌لیگه یولوخدوغونو وارساییریق دئدی.
هرمزگان والیسی «فریدون همتی»، محدودیتلرین بیر هفته‌لیک اوزادیلماسینا توخوناراق، هرمزگان طبّ علملری بیلیم‌یوردو ایله بیرلیکده آپاریلان تستلره گؤره، هرمزگان اهالیسی‌نین تخمیناً ۲۰ فایزینین کرونا تستی‌نین موثبت اولدوغونو سؤیله‌دی.
آنجاق بونلارین چوخو علامتسیزدیر. بئله‌لیکله، 1،8 میلیون اهالیسی اولان هرمزگاندا ۳۶۰ مین اینسان کرونایا یولوخموشدور.
کرمان طبّ علملری بیلیم‌یوردونون صحیه اوزره معاونی «وحید احمدی طباطبایی»، بو ایالتده کرونا خسته‌لری‌نین و بو خسته‌لیکدن اؤلنلرین سایی‌نین آرتماسینا توخوناراق کرمانین قیرمیزی وضعیتینه گیردیگینی سؤیله‌دی. او آرتیردی کی، کرمان ایالتینده‌کی اینسانلارین 15 ایله 20 فایزی کرونا خسته‌لیگینه یولوخموشلار. بئله‌لیکله، کرمان ایالتی‌نین 3 میلیون 200 مین اهالیسینی نظرده آلارساق، بو ایالتده 480 میندن 640 مین نفره قدر کرونایا یولوخموشدور.
صحیه ناظرلیگی‌نین سؤزچوسو «سیما سادات سالاری»، بو گون وئردیگی راپوردا، بوتون اؤلکه‌ده کرونا خسته‌لیگی اولان خسته‌لرین سایی‌نین آرتماسینا توخوناراق، سون گونلرده خوزستان و زنگان ایالتلرینده، خسته‌لرین ساییندا آزالمانین گؤرولدوگونو دئدی. صحیه ناظرلیگی‌نین سؤزچوسونون دئدیگینه گؤره، دوغو آذربایجان، ایلام، بوشهر، رضوی خوراسان، خوزستان، زنگان، گلستان، مازانداران، کرمان و فارس ایالتلری قیرمیزی وضعیتده‌دیر.
لاکین بو گون سؤزچو قیرمیزی ایالتلر حاقیندا صحو معلومات وئردی و دونن اولدوغو کیمی خبردارلیق وضعیتینده اولان ایالتلر حاقیندا سسسیز قالدی و هئچ بیر ایالتین آدینی چکمه‌دی.
صحیه ناظرلیگی‌نین و بیلیم‌یوردلاری‌نین یایدیغی معلومات و استانداردلارا اساساً، تهران، البرز، گونئی خوراسان و سیستان و بلوچیستان ایالتلری حاضیردا قیرمیزی وضعیتده و کرمانشاه، باتی آذربایجان، هرمزگان، کوردستان، قوم، اردبیل، اصفهان، کهگیلویه‌وبویراحمد، لرستان، همدان، یزد و قوزئی خوراسان دا خبردارلیق وضعیتده‌دیر.
سون اولاراق قئید ائتمک لازیمدیر کی، صحیه ناظرلیگی‌نین سؤزچوسو «سیما سادات‌لاری»، هر گون اولدوغو کیمی اوزرینده اوینانمیش ایستاتیستیکایی آچیقلادی او بو مدتده 2166 نفره کرونا تشخیصی قویولدوغونو، اونلاردان 1293 نفری‌نین خسته‌خانایا یئر‌لشدیریلدیگینی و توپلام اولاراق دا 271606 نفرین یولوخدوغونو سؤیله‌دی. عینی زاماندا دیگر 188 خسته اؤلدو و ایراندا کرونادان قایناقلانان اؤلوم ساییسی‌نین توپلامی 13 مین 979 نفره چاتدی.
