ایرانداکی اینسان حوقوقلاری کامپانییاسی: بلوچیستانداکی اعتراض آکسییالاریندا ان آزی ۲۳ نفر اؤلدو
ایرانداکی اینسان حاقلاری کامپانییاسی قایناقلارینا ایستناداً سیستان و بلوچیستان ایالتینده کئچن هفته کئچیریلن اعتراض آکسییالاریندا ان آز ۲۳ نفرین اؤلدویونو بیلدیردی.
کامپانییا، بعضی حاللاردا چوخ جدی اولان اعتراض آکسییالاری زامانی چوخ سایدا اینسانین آغیر یارالاندیغینی دا بیلدیردی.
ایران اینسان حاقلاری کامپانییاسی‌نین مودیری “هادی قائمی” دئدی: “ایران ایسلام جمهوریییتی مقاملاری اعتراضچیلارین اؤلدورولمه‌سی‌نی موخالیفلری سوسدورماغین بیر یولو اولدوغونا اینانیرلار.”
ایرانداکی اینسان حاقلاری کامپانییاسی‌نین مودیری علاوه ائتدی: “اولوسلاراراسی توپلوم ایران مقاملارینا اعتراضچیلارا قارشی داواملی گوج تطبیق ائدیلمه‌سی‌نین قبول‌ائدیلمز اولدوغونو آچیق شکیلده خبردار ائتمه‌لیدیر.”
ایرانداکی اینسان حاقلاری کامپانییاسی، ایسلام اینقیلابی کئشیکچیلرینی سیستان و بلوجیستانین اقتصادياتی و گوونلیگی‌نین قاریشماسیندا بؤیوک و تأثیرلی بیر اورقان اولاراق تانیدیب کی، یاناجاق داشیییانلاری اؤلدوره‌رک سون حادثه‌‌‌لرین ده اساس قوروجوسودور.
بو کامپانییا، اینقیلاب کئشیکچیلری‌نین، ۴ اسفند ۱۳۹۹ بازار ائرته‌سی گونو سراواندا آسکان سرحدینده بلوچ یاناجاق داشییانلارا بیرباشا آتش ائتمه‌سی و ان آزی 10 نفرین اؤلومو و بیر چوخ اینسانین یارالانماسی ایله سونوجلانان آتیشیندان بحث ائدیر.
ایرانداکی اینسان حاقلاری کامپانییاسی، اعتراضلارین آرتماسیندان سونرا سیستان و بلوچیستان ایالتینده اینتِرنِتین کسیلمه‌سیندن ناراحاتلیغینی ایفاده ائده‌رک، بونلاری سؤیله‌دی: “حؤکومت خالقین اعتراضلاری ایله قارشیلاشدیغی هر آن، هم خالقا قارشی شدتلی باسقی ائدیلمه‌سینی داوام ائتدیرمک، هم ده اعتراضچیلارین ایله‌تیشیم قورماسی و تشکیلاتلانماسینی مومکونسوز ائتمک اوچون اینتِرنِته ال چاتماغی انگلله‌ییر.”
بوندان اؤنجه «آرتیکل ۱۹»، «اکسس ناو»، « اولوسلاراراسی عفو» و «اورتادوغو قروپو»، ایران مقاملاریندان اینتِرنِتدن اینسان حاقلاری پوزونتولارینی جدی اولاراق اؤرت باسدیر ائتمک اوچون بیر آراج اولاراق ایستیفاده ائتدیگینی سؤیله‌دی.
iranwire
