اوین حبس‌خاناسیندا ساخلانیلان تورک فعاللار طبی خیدمتدن محرومدور ۳۰ آذر
اوین حبس‌خاناسیندا ساخلانیلان آذربایجانلی فعاللارین فیزیکی دورومونون ال‌وئریشسیز اولماسینا باخمایاراق، فعاللار لازیمی طبی یاردیمدان و لازیم اولان درمانلاردان محرومدورلار.
آلینان بیلگیلره گؤره، «آیاز سیف‌خواه»، «بابک حاجی‌زاده» و «آراز امان»-ین شدتلی سویوق‌دیمه سببیندن فیزیکی دوروملاری‌نین پیس اولدوغو، حتی آراز امان‌ین قیزدیرماسی‌نین کسکین شکیلده یوکسلدیگی و احتیاجی اولان درمانلاری آلماقدان محروم اولدوغو بیلدیریلیر.
فعاللار بو دوروما اعتراض ائده‌رک یئتکیلیلردن ایسته‌ییبلرکی، هئچ اولماسا گیروو قارشیلیغیندا مووقتی آزادلیغا بوراخیلما ایمکانینی تعمین ائتسینلر کی، بو فعاللار لازیمی طبی موعالیجه آلا بیلسینلر.
پروستات خسته‌لیگیندن اذيت چکن، اونورغا، ال و دیزلرده پروبلئم یاشایان باشقا آذربایجانلی فعال “طاهیر نقوی” هله ده لازیمی موعالیجه‌‌‌دن محرومدور.
آیریجا، بئل دیسکی و ییرتیق خسته‌لیگیندن اذيت چکن “مرتضی پروین” حبس‌خانا یئتکیلیلری‌نین وعدلرینه باخمایاراق، هله ده لازیمی موعالیجه‌‌‌دن محرومدور و فیزیکی دورومونون آغیر اولدوغو بیلدیریلیر.
طبی یاردیما احتیاجی اولان بوتون محبوسلار لازیمی موعالیجه‌‌‌نی آلمالیدیرلار. محکوملارین طبی یاردیمدان محروم ائدیلمه‌سی اونلارین ساغلاملیق حوقوقلارینی پوزماقلا یاناشی، حیاتلارینی دا تهلوکه آلتینا قویور.
Iranwire
