اوین حبس‌خاناسیندا حبسده اولان سیاسی محبوس مهدی حسنی بیر ایلدیر بلیرسیز دورومدا ساخلانیلیر
مدنی فعالی و کئچمیش سیاسی محبوس ساسان چمن‌آرا حبسده اولان “مهدی حسنی” آدلی وطنداشین ۱ ایللیک بلیرسیز دورومو ایله باغلی بیلگی وئریب.
جناب حسنی‌نین کئچمیش هم‌بندی چمن‌آرا ۱۹ شهریور ۱۴۰۲-جی ایل بازار گونو اؤز ایکس حسابیندا (کئچمیش توییتر) قیسا یازی یازاراق بو وطنداشین حبس اولوناراق اوین زیندانیندا بیر ایل اوچ گون مدتینه اطلاعات ناظرلیگی‌نین چئشیدلی تجرید‌خانالاریندا حبس ائدیلدیگینی و روحی تضیییق گؤردویونو یازیب.
اونون سؤزلرینه گؤره، جناب حسنی ۷ آیدان چوخ تک آداملیق هوجره‌ده یاتیب.
بو خبره گؤره، اونون پرونده‌سی‌نین شؤبه‌سی بیر نئچه دفعه ديیشدیریلیب و جناب حسنی اوین حبس‌خاناسیندان قیسا بیر زنگله بیلدیریب کی، او، بازار ائرته‌سی، ۲۰ شهریور گونو موحاکیمه اولونماق اوچون تهران اینقیلاب محکمه‌‌سی‌نین ۲۶-جی شؤبه‌سینه گؤندریله‌جک.
چمن‌آرا اونو دا وورغولاییب کی، اونو قامو اویونا تقدیم ائدیلمه‌سی اوچون هئچ بیر شکلی بئله یوخدور.
اؤتن ایللرده سیاسی و ویجدان محبوسلارین، اؤزللیکله ده تانینمایان سیاسی محبوسلارین ایستینطاق سورجینده پوزولمالارا یول وئریلدیگی باره‌ده چوخلو بیلگیلر وار.
شریف تکنولوژی بیلیم‌یوردونون ایکی گؤرکملی اؤیرنجیسی اولان «امیرحسین مرادی» و «علی یونسی»، اؤزلرینه قارشی اعتراف ائتمک اوچون اوین حبس‌خاناسی‌نین “قاپالی” هوجرلرینده ۲ ایلدن آرتیقدیر بلیرسیز دورومدا ساخلانیلیبلار.
حوقوق ساوونوجولاری دئییرلر کی، بو پوزونتولار سیاسی و ویجدان محبوسلارا گوونلیک مامورلاری طرفیندن ایره‌لی سورولن اتهاملاری قبول ائتمه‌لری اوچون اونلارا داها چوخ تضییق گؤسترمک مقصدی داشیییر.
