اویندن ۶ سیاسی محبوسون مکتوبو: اعدام بالتاسی اؤلکه‌نین کؤکونو کسیر
اوین حبس‌خاناسیندا حبسده اولان ۶ سیاسی محبوس ایران ایسلام جمهورییتی حؤکومتی‌نین اعدام حؤکملری‌نین ایجراسینی پیسله‌ین مکتوب یایاراق بیلدیریبلر کی، بو حؤکومتین حرکتی اؤلکه‌نین بوتون میلی ثروتلرینی محو ائدیر و بوندا هئچ بیر توپلومسال خئییر یوخدور.
بو سیاسی محبوسلار مکتوبلاریندا یازیبلار: اعدام ائله بیر سؤزدور کی، حوقوقی یوکوندن آسیلی اولمایاراق، اؤزلویونده منفی و اییرنج یوک داشیییر و یالنیز اینسانی ماهیتی اولمایانلار هر دفعه اعدام خبرینی ائشیدنده ایکراه حیسّی کئچیره بیلمز.
«مصطفی تاجزاده»، «امیرسالار داودی»، «حسین رزاق»، «رضا شهابی»، «سعید مدنی» و «کیوان مهتدی»، بو مکتوبو یازان آلتی سیاسی محبوسدور.
بو سیاسی محبوسلارین فیکرینجه، ایسلام جمهورییتی گوونلیک یاناشمالارینا اویغون اولاراق اعدام حؤکموندن باسقی آلتی کیمی ایستیفاده ائدیر و داها چوخ اعدامین اؤلکه‌ده بو گونلرین سیاسی، اقتصادی و سوسیال چاغیریشلاری و بؤحرانلارینی اؤرت-باسدیر ائتمک اولدوغونو دوشونور و بو سببدن، اؤزللیکله اعتراض ائدن وطنداشلارا قارشی تله‌سیک اعداملار حیاتا کئچیریر.
اونلار وورغولاییبلار کی، قامو اویو هئچ واخت بو اعداملاری عدالته اویغون حساب ائتمیر: حؤکومتین همیشه یانلیش حسابلامالاری‌نین عکسینه اولاراق، اعدام سونوجوندا یارانان قورخو اینسانلارین اؤز موقدراتلارینی ایداره ائتمک اوچون جهد و موباریزه آپارماسینا مانع اولمایاجاق.
بو سیاسی محبوسلار حؤکمدارلارا، اؤزللیکله ده گوونلیک و محکمه قوروملارینا خبردارلیق ائدیبلر: ایسته‌نیلن زوراکیلیغین، اؤزللیکله اعدامین داوام ائتدیریلمه‌سی و گوجلندیریلمه‌سی توپلومو داها چوخ زوراکیلیغا آپاراجاق و بو ایشده اساس قوربان ایران خالقی‌نین اینسان گوونلیگی اولاجاق.
اوین حبس‌خاناسیندا محبوس اولان ۶ سیاسی محبوس قتل و تروردان توتموش اعدام و باسقییا و حؤکومت زوراکیلیغینا قدر هر جور زوراکیلیغی پیسله‌یه‌رک وورغولاییبلار، اعدام اؤلکه‌نین بوتون میلّی ثروتلری‌نین کؤکونه هر زامان اولدوغوندان داها چوخ ضربه وورور و اوندا هئچ بیر توپلومسال خئییر یوخدور.
