اولوسلار آراسی عفو تشکیلاتی: اعتراضلاردا حیاتینی ایتیرن ۲۰-دن چوخ اینسانین مزاری ۱۷ شهرده داغیدیلیب
اولوسلار آراسی عفو تشکیلاتی ایسلام جمهوریتینه قارشی اینقیلابی قیام قوربانلاری‌نین عائله عضولری‌نین تعقیب و اؤزباشینا ساخلانماسی ایله باغلی آراشدیرما راپورو درج ائده‌رک، سند‌لشدیریلمیش گؤرونتولره اساساً، سون آیلاردا ۲۰-دن چوخ قوربانین مزاری‌نین داغیلدیغینی آچیقلاییب.
بازار ائرته‌سی، ۳۰ مرداددا بو اینسان حاقلاری تشکیلاتی بو راپوروندا یازیب کی، بو مزارلارین داغیدیلماسی قیر، بویا و یا اود پوسکورتولمکله حیاتا کئچیریلیب و یا مزار داشلاری سیندیریلیب.
بو راپورا گؤره، عومومی عصیان قوربانلاری‌نین مزار داشلاری اوزرینده اونلاری آزادلیق یولونون شهیدلری کیمی قله‌مه وئرن ایفاده‌لر تحریف ائدیله‌رک سیلینیب.
اولوسلار آراسی عفو تشکیلاتی یازیب کی، ایسلام جمهورییتی یئتکیلری بو داغینتیلارین شوبهه‌لیلری‌نین بللی ائدیلمه‌سی اوچون هئچ بیر آراشدیرما آپارماییب و داغینتیلارین داوام ائتمه‌مه‌سی اوچون اونلارین موحاکیمه اولونماسی اوچون هئچ بیر تدبیر گؤرمه‌ییب.
بو تشکیلات آرتیریب کی، حتی بعضی داغینتیلار عائله عضولری‌نین گؤزو قارشیسیندا گوونلیک گوجلری طرفیندن ائدیلیب.
آیریجا، اولوسلار آراسی عفو تشکیلاتی سون آراشدیرماسیندا اؤلکه‌نین ۱۰ ایالتیندن ایسلام جمهورییتینه قارشی عومومی قیام قوربانلاری‌نین سون آیلاردا اینسان حوقوقلاری‌نین پوزولماسینا معروض قالمیش ۳۵ عائله‌‌‌سی‌نین پرونده‌سینی سند‌لشدیریب.
بو عائله‌‌‌لره آکسییالار زامانی گوونلیک گوجلری طرفیندن قانونسوز اولاراق اؤلدورولن ۳۲ اعتراضچی‌نین عائله‌‌‌لری ده داخیلدیر.
