اوشاق حوقوقلاری ساوونوجوسو فاطمه موسوی‌نین محکمه‌‌سی کئچیریلیب
الده ائتدیگیمیز بیلگیلره گؤره، مدنی فعال و اوشاق حوقوقلاری ساوونوجوسو “فاطمه موسوی”یه قارشی ایره‌لی سورولن اتهاملار اوزره محکمه اوتورومو ۹ دی ۱۴۰۲-جی ایل، شنبه گونو کهریزکین عومومی محکمه‌‌سی‌نین ۱۰۳ سایلی شؤبه‌سینده کئچیریلیب.
بو بیلگیلره اساساً، خانیم موسوی “رژیمه قارشی تبلیغات”، “توپبلشماق و میلی گوونلیگه قارشی ال بیر اولماق”، “رهبری تحقیر ائتمک” و “عومومی اموالی یاندیرماق و محو ائتمک” کیمی اتهاملارلا اوزلشیب.
۳۲ یاشلی و ایکی آزیاشلی اوشاق آناسی فاطمه موسوی ۱۴۰۲-جی ایلین تیر آییندا حبس ائدیلدی و بیر آیدان چوخ اوین حبس‌خاناسیندا قالدی. او، شهرری ساکینیدیر.
اوچ میلیارد تومنلیک گیروو تعیین ائدیلمه‌سی، او زامان کؤرپه اوشاغی اولان بو آنانین ایکی هفته مدتینه گیروو قارشیلیغیندا کئچیجی آزادلیغا چیخما حوقوقوندان محروم ائدیلمه‌سینه سبب اولدو.
نهایت، عائله‌‌‌سی بیر آیدان چوخ چابادان سونرا بو محبوس آنانی اوین حبس‌خاناسیندان آزاد ائده بیلدی.
کئچمیش بیر سیاسی محبوس بیر مدت اؤنجه ایران‌وایره موصاحیبه‌سینده خانیم موسوی ده داخیل اولماقلا مدنی و سیاسی فعاللار اوچون آغیر گیروولارین وئریلمه‌سی ایله باغلی دئمیشدی کی، گیروو وئریله بیلمه‌مه‌سی سیاسی و ویجدان محبوسلار آراسیندا چوخ یایغیندیر و آسانلیقلا و تئز بیر زاماندا آزادلیغا چیخا بیلنلرین سایی چوخ آزدیر.
او، آیریجا وورغولامیشدی: چوخ واخت بوش و يئرسیز اولان سیاسی اتهاملارا گؤره، مثلا، سوسیال شبکه‌لرده‌کی فعالیتلره گؤره محکمه سیستمی بیر نئچه یوز میلیوندان بیر نئچه میلیاردا قدر گیروو تعیین ائدیر و بو، تعمین اولونمایانا قدر آشاغی دوشمور”.
