اورمیه گؤلو یئنیدن تامامیله قورودو؛ میلیونلارلا اینسانین ساغلاملیغی تهلوکه آلتیندادیر
“اعتماد” قزئتی بیر خبرده بو ایلین یازیندا اورمیه گؤلونون تامامیله قوروماسیندان خبر وئریب و یازیب بو حادثه بؤلگه‌نین اکولوژی بؤحرانینی کسکین‌لشدیرمکله یاناشی، بو گؤلون اطرافینداکی اراضیلرده یاشایان بئش میلیونا یاخین اینسانین ساغلاملیغی اوچون جدی تهلوکه یارادیر.
۲۸ شهریور چارشنبه گونو یاییلان بو راپورا گؤره، اؤتن یاز و قیش آیلاریندا تخمیناً بیر میلیارد متر مکعب سو ایله مؤوسومی اولاراق قورویان اورمیه گؤلو بو ایلین شهریور آییندا تامامیله قورویوب.
داها اؤنجه اورمیه گؤلونون رنگی‌نین ديیشمه‌سی ایله باغلی خبرلر یاییلمیشدی، لاکین باتی آذربایجانین سو-باتاقلیقلارین قورونما‌‌‌سی و جانلاندیرماسی شؤبه‌سی‌نین مودیری لیدا شجاعی‌فر گؤلده یوکسک سیجاقلیق، یوکسک بوخارلانما و دوز سئون باکتریارین آکتیولیگی‌نین آرتدیغینی دیله گتیریب و بیلدیریب کی، سو رنگی‌نین دییشمه سببی نورمال و طبیعی بیر قضادیر.
چئوره قوروما تشکیلاتی‌نین سو-باتاقلیقلارین قورونما‌‌‌سی و جانلانماسی ایداره‌سی‌نین باش مودیری آرزو اشرفی‌زاده بو ایلین خرداد آییندا خبردارلیق ائدیب: اورمیه گؤلونون لازیمی شکیلده سو آلماسینا باخمایاراق، بو گؤلون دورومو هله ده کؤورک و قئیری-ثابتدیر”.
باتی آذربایجان سو و کانالیزاسیون شرکتی‌نین وئردیگی بیلگیلره گؤره، اورمیه گؤلونون سو سويه‌‌سی ۱۴۰۲-جی ایلین شهریورینده ۱۲۷۰ متردن آز اولماقلا تاریخی رکوردا چاتمیشدیر. بو میقدار ۱۳۷۴-جو ایلین اردیبهشت آییندا گؤلون ماکسیمال سويه‌‌سیندن سککیز مئتر آزدیر.
اورمیه گؤلونون قوروماسی اونون سو حؤوصه‌‌‌‌سی‌نین ساکینلرینه بیر چوخ تهلوکه‌‌‌لر گتیریب. توز فیرتینالاری بو بؤلگه‌نین بئش میلیونا یاخین ساکینی اوچون جدی تهلوکه‌‌‌دیر.
بو گئنیش ایقلیم ديیشیکلیگی و حؤکومتین بو قونودا دویارسیزلیغی اورمیه گؤلو حؤوصه‌‌‌‌سینده اکینچیلیک و توریسم صنعتینه بیرباشا ائتکی گؤسترمیشدیر.
