اورمیه گؤلو جانلانمازسا بوتون اؤلکه فلاکته سوروکلنه‌جک
اورمیه گؤلو جانلانما قرارگاهی‌نین خالق کومیته‌سی‌نین کئچمیش رئیسی محمد حسین حسن‌زاده اورمیه گؤلونون قورماسی‌نین اؤلکه‌نی فلاکته آپاراجاغینی و داها بؤیوک فاجعه‌‌‌لره یول آچاجاغی باره‌ده خبردارلیق ائدیب.
حسن‌زاده اورمیه گؤلونون جانلانماماسی تقدیرده یالنیز آذربایجان ایالتلری دئییل، بوتون ایرانین بو اکولوژی بؤحرانا گؤره قارانلیغا سوروکلنه‌جه‌یینی دئییب.
او پروبلئمین حلینه مانع اولان بوتون بهانه‌لری اساسسیز آدلاندیریب و گؤلون جانلانماسی اوچون بیر سیرا اکینچیلیک پروزه‌لری‌نین دایاندیریلماسی‌نین اؤنمینی وورغولاییب.
او، بؤلگه‌ده صنایع‌نین گلیشمه‌مه‌سی و بؤلگه ساکینلری‌نین حیاتی‌نین یالنیز اکینچیلیکدن آسیلی ائدیلمه‌سینی بؤیوک صحو حساب ائدیب و بونون دا بو پروبلئمین مئیدانا گلمه‌سینده اؤنملی رول اوینادیغینی قئید ائدیب.
چئوره ساحه‌‌‌سینده اوزمانلارین فیکرینجه، اورمیه گؤلونون قوروماسی بو اراضی‌نین ۱۴ میلیوندان چوخ ساکینی‌نین حیاتینی تهلوکه آلتینا قویوب و بو اراضی ساکینلری‌نین مجبوری کؤچونه سبب اولاجاق. اکولوژی اوزمانلارین فیکرینجه، اورمیه گؤلو اطرافیندا توز و آکتیو دوز فیرتینالاری ۵۰۰ کیلومتره قدر مسافه‌‌نی قت ائده بیلر.
سانال اورتامدا بیر چوخ قوللانیجی اورمیه گؤلونون دیرچلدیلمه‌سی مسئله‌‌سینی تکجه چئوره‌نی قورتارماق اوچون دئییل، هم ده آذربایجان ملتی‌نین اؤلوم-دیریم مسئله‌‌سی اولدوغونو بیلدیریبلر.
سون آیلاردا بیر چوخ مدنی فعالین حؤکومتین اورمیه گؤلونون دورومونا اؤنم وئرمه‌دیگی اوچون ائتدیکلری اعتراضلار حبس و ایشگنجلر ایله قارشیلیق آلیب
