اورمیه گؤلونون جانلاندیرما قرارگاهی‌نین عضوونون خبردارلیغی: گؤل گئری چکیلیرسه، چوخ ضرر گؤره‌جییک
اورمیه گؤلونون جانلاندیرما قرارگاهی‌نین پلانلاشدیرما اوفیسی‌نین مودیری مسعود تجریشی، اورمیه گؤلونون گئری چکیله‌جیی تقدیرده چوخ زیانا سبب اولاجاغینی و توز فیرتینالاری‌نین اؤلکه‌نین باتی کندلری‌نین بوشالماسینا سبب اولاجاغینی سؤیله‌دی.
اورمیه گؤلونون جانلاندیرما قرارگاهی، انرژی ناظرلیگی‌نین بو ایل اورمیه گؤلو اوچون پول اؤده‌مه‌دیگینی قئید ائده‌رک، بونلاری سؤیله‌دی: “بو ایل اورمیه گؤلونون سو ییغما ساحه‌‌‌سینده‌کی یاغیشلار یوزده ۲۰-۳۵ آزالیب و گؤلون سو پایی‌نین تخمیناً یوزده ۶۵ وئریلمه‌ییب“
اورمیه گؤلونون جانلاندیرما قرارگاهیندان وئریلن بیلگیلره گؤره، گؤلون ایندیکی سويه‌‌سی ۱۲۷۱ متر ۲۵ سانتیمتردیر.
اورمیه گؤلونون جانلانماسی، حسن روحانی‌نین جمهورباشقانلیغی سئچکیلرینده کامپانییا وعدلریندن بیری ایدی.
حسن روحانی حؤکومتی، گؤلو جانلاندیرماق و محو اولماسی‌نین قارشیسینی آلماق اوچون اورمیه گؤلونون جانلانماسی قرارگاهینی قوردو، لاکین ۱۳۹۲-جی ایلدن بری بو قرارگاهین یارادیلماسینا باخمایاراق اورمیه گؤلونون وضعيتی هر گون پیسلشدی.
ایران چئوره تهلوکه‌‌‌لری و داواملی گلیشمه درنگی‌نین عضوو حمیدرضا محبوب‌فر، ایرانین خبر آژانسلارینا قرارگاهین فعالیتینه گؤره : “سون ایللر اورمیه گؤلونون جانلانماسی داها چوخ مئدیانین های کویو ایدی، یاغیشین آزالماسی ایله گؤلون سویو دا آزالیب. “
اورمیه گؤلو ۱۳۵۴-جی ایلده دونیانین ان اؤنملی سولوق آلانلاریندان بیری کیمی قئیده آلینمیش و ۱۳۵۶-جی ایلده یونسکو طرفیندن قورونان اراضی‌لر لیستینه داخیل ائدیلمیشدیر.
اورمیه گؤلونون محو ائدیلمه‌سی و قوروماسی گئدیشاتی ۷۰-جی ایللرین سونلاریندا باشلادی و ۱۳۹۴-جو ایله قدر گؤل اراضیسی‌نین ۸۸ فایزینی ایتیردیگی نؤقطه‌‌‌یه چاتدی.
iranwire
