اورمیه-سویوق‌بولاق یولوندا باش وئرن قضادا ایکی نفر حیاتینی ایتیریب
باتی آذربایجان قیزیل آی جمعيتی‌نین باش مودیری دئییب:
اورمیه-سویوق‌بولاق یولوندا باش وئرن قضادا ایکی نفر حیاتینی ایتیریب و ایکی نفر ده یارالانیب.
حمید محبوبی بونونلا باغلی دئییب: پژو ۴۰۵ مارکالی اتومبیل ایله بنز مارکالی یوک ماشینی‌نین توققوشماسی سونوجوندا ۲ نفر اؤلوب و ایکی نفر ایسه یارالانیب.
محبوبی یارالیلارین ساغلیق مرکزینه گؤتورولدویونو بیلدیریب.
ایران دونیادا یول قضالاری‌نین ان چوخ باش وئردیگی اؤلکه‌لردن بیریدیر. اتومبیللر و قئیری-استاندارت یوللار بو قضالارین اساس سببلریندن بیریدیر.
ایران یول پولیس‌نین رئیسی بو ایلین باشیندان آبان آیی‌نین سونونا قدر باش وئرن یول قضالاریندا ۱۲ مین ۵۰۰ نفرین اؤلدویونو، ۲۶۰ نفرین یارالاندیغینی آچیقلاییب.
کمال هادیانفر دئییب: حاضردا یول پولیسی‌نین ایستاتیستیکاسینا گؤره، ایراندا ۴۰ میلیونا یاخین اتومبیل وار.
او، داها سونرا یول-نقليات حادثه‌‌‌لری سونوجوندا اؤلنلرین سایینا توخوناراق دئدی: هر ایل اورتالاما قضالاردا ۲۰ مینه یاخین اینسان اؤلور و ۳۰۰ مین اینسان ایسه یارالانیر.
