اورمیه حبس‌خاناسینداکی ساغلاملیق وضعيتی‌نین پیس اولدوغو باره‌ده بیر محبوسون راپورو
اورمیه حبس‌خاناسینداکی محبوس حامد قره‌اوغلانی، اؤزونده کووید۱۹ خسته‌لیگی‌نین علامتلرینی اولدوغونو و اورمیه حبس‌خاناسی مسووللاری طرفیندن ائتکیلی ایشلرین آپاریلمادیغینی اعلان ائدن بیر سس سندی یاییملادی.
بو تورک (آذربایجانلی) مدنی فعالین عائله‌‌‌سینه یاخین بیر منبع‌نین وئردیگی معلوماتا گؤره، او، بو ایل ۷ تیرده تهلوکه‌‌‌سیزلیک قوه‌لری طرفیندن توتولوب و ۲۰ گونلوک سورغودان سونرا اورمیه حبس‌خاناسینا کؤچورولوب.
حامد قره‌اوغلانی یاییملادیغی سس سندینده محبوسلارین ساخلانما شرایطینی و اورمیه حبس‌خاناسی‌نین ساغلاملیق وضعيتینی «آجیناجاقلی و دهشتلی» اولاراق دئییب.
قره‌اوغلانی بو سس سندینده داواملی اؤسکورک سببییله جومله‌‌‌لری چتین سؤیله‌یه بیلیر. آنجاق او دئییر «حبس‌خانادا محکوملار اوچون یاخشی شرطلر یوخدور و ساغلاملیق وضعيتی چوخ پیسدیر و حبس‌خانانین توتومو حبس‌خاناداکی محبوسلارا گؤره قات قات آزدیر.»
بو سس سندینین داوامیندا حامد قره‌اوغلانی، حبس‌خانا حکیمینه گئتدیگینی و کووید۱۹-ون شوبهه‌لی سیمپتوملاری حاقیندا معلومات وئردیگینی آنجاق سونوندا اورمیه حبس‌خاناسیندا لازیمی طبّی یاردیم گؤستریلمه‌مه‌سی سببییله دئدی: «منله عینی بندیده قالان یولداشلاریمدان دا قایغیلانیرام، اونلار بو تورپاقین اؤولادلاریدیر و توپلوما قاییداجاقلار. خواهش ائدیرم بونلاری اونوتمایین.»
قره‌اوغلانی‌نین عائله‌‌‌سینه یاخین بیر منبع اؤنجه‌لر ایران‌وایره اونون حبسی‌نین سببلری باره‌ده دئمیشدی کی: «اونو کامئرا قورماسی بهانه‌سی ایله بیر یئره چاغریلدیغی زامان توتوقلادیلار.»
منبع قره‌اوغلانی‌نین «خالقین موجاهیدلری ایله علاقه قورما و موقدس ديرلره ایهانت ائتمک» اتهامی ایله محکوم اولدوغونو و «چوخ تضییق ائدیلدیگینی و کیمسه‌یه معلومات وئررسه، آناسی‌نین اؤلدوروله‌جیی ایله تهدید ائدیلدیگینی» سؤیله‌دی.
