اورمیه‌ده گوجلو کولک سونوجوندا ۹ نفر یارالانیب
اورمیه فرمانداری بو گون سحر و گونورتا ساعتلاریندا گوجلو کوله‌یه ایشاره ائده‌رک دئییب: بو طبیعی قضا سونوجوندا ۹ نفر یارالانیب کی، اونلاردان ۸ نفر آیاق اوسته درمان ائدیلیب.
او آرتیردی: ۱۴ یاشلی یئنی‌یئتمه بینانین جبهه‌سی‌نین اوچماسی سببیندن آغیر قضا کئچیریب و او، حاضردا خسته‌خانادا حکیملرین نظارتی آلتیندادیر.
اورمیه فرمانداری آرتیردی: بو شهرده بو گون، بازار ائرته‌سی گوجلو کوله‌یین سرعتی ساعتده ۶۵ کیلومتر ایدی و سونوجدا ۲۰ رئکلام بنری دوشوب و ۴ بینانین اؤن جبهه‌سی اوچوب.
عماری اورمیه شهرینده گوجلو کولک سونوجوندا ۵۰ آغاجین قیریلدیغینی بیلدیریب و دئییب: حاضردا دوروم یاخشیلاشیب، کوله‌یین سرعتی آزالیب.
بو گون، بازار ائرته‌سی اورمیه‌ده گوجلو کولک سونوجوندا اورمیه شهری‌نین بعضی بؤلگه‌لرینده الکتریک، تلویزیون و اینترنت سیقناللاری کسیلیب.
