اورمونون ساری مارالی -ابراهیم ساوالان

گؤلوموزو قوروتمالاری بس دئییلدی، اورمونون ساری مارالینی دا کیرمانا آپارماق ایسته‌ییرلر؛ فرقه ییخیلاندان سونرا فداییلری اورا سورگون آپاردیقلاری کیمی. هله بیر زامانلار آذربایجانین یئرآلتی دفینه‌لرینی چیخاریب، آپاریب کیرماندا قویلادیلار. سونرا اؤنملی بیر کشف ائتمیشلر کیمی اونلاری تورپاقدان چیخاریب، اؤز آدلارینا ووردولار. قاراداغین میس و قیزیلینی اورا داشیدیقلاری کیمی، ایندی ده اورمونون ساری مارالینی اسیر آپاریرلار.

کئشگه شاعیرلریمیز، یازارلاریمیز و موسیقیچی‌لریمیز اورمونون ساری مارالی حاقدا یازیب، «اورمونون ساری مارالی، اورمونون سورگون مارالی» آدلی ادبی- هنری یاریشمالار یاراتسینلار.

یقین ساری مارال بو سفره مجبوری گئده‌جک و اونا اورمونون دوزلو چؤلونده اؤلمک، کیرمان جیزلاماسیندا یاشاماقدان اوستوندور:
من گؤلومو آتمامیشام
بو یانیق یوردو ساتمامیشام
بوگونو اؤزوم سئچمه‌میشم
یاشاسین اورمییه‌م منیم.

ساری مارال گئدنده داغ- داش اونون حالینا آغلایاجاق، گؤیده اولدوز سؤنوب، گونش اوتاندیغیندان داغ آردیندا گیزله‌نه‌جک. هر آدادان بیر یانیقلی نئی سسی اوجالاجاق. آما اونلار نئی سسی دئییل، یارالانمیش تورپاغین ناله‌سی و مارالین قاچیب کول دیبینده گیزلنمیش بالاسی‌نین اینیلتی‌سیدیر.

گئدن ساری ماراللارین، اؤلنده قبیرلری داشسیز قالماسین دئیه، بوینوزلارینا آغ داش آساجاغیق:
اورییمی وئریم سنه
بیر داشینی قوی سینه‌مه
سینا صداقتده منی
غریبلیکده گل سیناما.

و ساری مارال یاشلی گؤزلرله بیزه باخیب، اوموب کوسه‌جک. قوللارینی آچیب اورمونو سون دفه باغرینا باسماق ایسته‌یه‌جک:
قوجاقلاماق ایسته‌دیلر سون دفه اورمییه‌نی
بو ایسته‌یه، آرزویا قویمادیلار اونلاری
یئتیشمه‌دی قوللاری.

———-
@ibrahimsavalan