اوجامان اوجاق کندیم

قاراداغؽن حسن اوو ماحالؽنؽن اوجقار کندیلرینین بیری اوْلان اوْجاق کندینده یم.
آنامؽن قارنؽندا دوْققوز آی دوْلاندؽغؽم کند. اوْ دار دۆنیادان بو اوچماغا دوْغولدوغوم کند. گؤبه گیم کسیلدیگی کند. بلَکلندیگیم کند. ایمَکله دیگیم کند. ته تی – ته تی یئریدیگیم کند. بالا – بالا بؤیۆدۆگۆم کند. قوزو اوْتاردؽغؽم کند. بویروق قولو اوْلدوغوم کند. داوارلا ناخؽرا گئتدیگیم کند. داش دؽغؽرلاتدؽغؽم کند. داش آتدؽغؽم کند.
کیمین اوْنباسؽن سؽندؽردؽغؽم کند. کیمسه نین قاشؽن چاپدؽغؽم کند.
نؤرسه (یئنی‌یئتمه= نوجوان) اوْلان کیمین بوْراخؽب تبریزه کؤچدۆگۆم کند. ایندی کیچیک اوْندا بؤیۆک اوْلان کند. بئینیمده اؤرۆشلری بیر – بیر قازؽلان کند.
چوْخ یئرلری دوْلانمؽشام. هئچ بیری سنین قوْخونو وئرمه‌ییب، وئرمیر. بیلمم نییه؟ بلکه آنامؽن سۆد قوْخوسو هله سندن گلیر! بلکه آنامؽن لاؽلا سسین سندن ائشیدیرم! بلکه آتامؽن آلؽن تر اییین سندن اییله‌ییرم! بلکه آتا- آنامؽن اؤیۆدلرین سندن ائشیدیرم!
بلکه امیرعلی بابام غۆنچه نه‌نم له منی چاغؽرؽرلار! بلکه کاظؽم بابامؽن دیؽرمانؽ، عصمت نه‌نه‌مؽن کؤرپه لرینین سسلری گلیر! منی چاغؽرؽرلار! بلکه کؤرپه لیگه قایؽدؽرام! بلکه اوشاقلانؽرام!
هانسؽ ایستک؟، هانسؽ چکیجؽ منی سنه مفتون ائدیبدیر؟ بیلیرسن؛ سنی گؤرَنده اؤزۆمدن چؽخؽرام، کئفله‌نیرم.
یۆنگۆل‌لَشیرم، قوش کیمین اوْلورام، قاناتلانؽرام.
بیر گۆن اوْتای آذربایجانلؽ دوْستوملا آراز قؽراغؽندا ماشؽندا گئدیریک. باخیب قاراباغا آه چکیب سؤیله دؽ؛ نه اوْلاردؽ؟ اؤلمه دن اؤنجه دوْغولدوغوم کندی بیرده گؤره یدیم. من سؤز تاپمادان سؤیله دیم. تانرؽ ایستر گؤره رسن. اوْندا، اوْنون سؤزۆن بوْ گۆن کی قدر دۆشۆنمه میشدؽم.