اهواز حبس‌خاناسینداکی فروردین اعتراضلاریندا ۵ نفر اؤلوب
خوزستان ایالتینده‌کی باوی ایلچه‌سی اینقیلاب محکمه‌‌سی‌نین بیرینجی شؤبه‌سی، اهواز مرکزی حبس‌خانادا اعتراضلار زامانی ۵ نفرین اؤلدویونو تصدیقله‌دی.
محکمه‌‌نین بو شؤبه‌سی طرفیندن حاضرلانان داوادا اؤلن بئش محبوسون دیگر محبوسلار طرفیندن اؤلدورولدویو آچیقلانیب.
ایران حبس‌خانالاری‌نین اطلسی‌نین وئردیگی معلوماتا گؤره، شیبان و سپیدار حبس‌خانالارینداکی اعتراضلاردا اؤلنلرین سایی سککیز نفردیر.
آیریجا بو داوادا ۳۰ محبوسا قارشی «عومومی قایدانی پوزماق»، «واندالیزم و عومومی ماللارین قصداً یاندیریلماسی» و «عومومی آسایشی پوزماق»، اتهاملاری ایره‌لی سورولور.
بو ایلین ۱۱ و ۱۲ فروردین تاریخلرینده کرونا ویروسونون یاییلماسی و محبوسلارین خسته‌لیگه یولوخما قورخوسوندان سونرا اهوازداکی شیبان و سِپیدار حبس‌خانالاریندا اعتراضلار باش وئردی و نتیجه‌ده تهلوکه‌‌‌سیزلیک قوه‌لری طرفیندن باستیریلدی.
