اقلم ده‌ییشیکلییی‌نین فلاکتلی تاثیرلری ایله مبارزه آپارماق اوچون هارالار قورونمالی‌دیر؟
یل اونیوئرسیته‌سی‌نین آراشدیرماچی‌لارینین فیکرینجه اقلیم ده‌ییشیکلییی‌نین فلاکتلی تاثیراتی‌نین قارشیسینی آلماق اوچون کؤهنه مئشه‌لر، تورف (peatlands) یا لوش‌لار (Mire)، و مانقروولار باشقا یئرلردن داها یاخشی قورونمالی‌دیر.
چینارین «یل اینوایرونمنت ۳۶۰» درگیسی‌نین وئردییی معلوماتا استنادا، بو ساحه‌لر دونیانین فقط ۱۰۰-ده اوچونو قابساسالار دا، داها چوخ کربون اودا بیلیرلر. آنجاق بو ساحه‌لر یوخ ائدیلسه‌لر بیر داها گئری آلینا بیلمزلر.
آراشدیرماچی‌لاردان بیری اولان «جان راکستروم»ون دئدییینه گؤره: بو اراضی‌لرده نسیل‌لر بویو ساخلانیلان کربون بوراخیلماسی‌نین تاثیری داوام ائده‌جک و هر کسین اقلم ده‌يیشیکلییینی طبیعت و انسانلار اوچون چوخ تهلوکهلی شکیلده ثابتلشدیرمک سعی‌لرینی سارسیداجاق.
۲۰۲۰-جی ایلدن باشلانان بو تحقیقات «اؤده‌نیلمز کربون» آنلاییشینی آراشدیریر و باتاقلیق‌لارین، چمنلیک‌لرین، مانقروولارین و کؤهنه مئشه‌لرین مئیدانا گلمه‌سی‌نین ایللر و عصرلر طلب ائتدییینه دقت چکیر. بو اکوسیستم‌لر آرادان گئتسه‌لر، انسانلارین کوره‌سل ایستی‌لشمه ایله مبارزه آپارماغی پلانلادیقلاری اون ایللر بویونجا بئله اونلاردان بوراخیلاجاق کربون گئری دؤنوشدوره بیلمه‌یه‌جک‌دیر.
بیلیم آداملاری بو اکوسیستم‌لرده توپلانان کربونون ۲۰۲۰-جی ایله قدر قالیق (فسیلی) یاناجاقلاردان آیریلان عمومی کربوندان ۱۵ قات چوخ اولدوغونو سؤیله‌ییرلر.
دونیاداکی اؤده‌نیلمز کربونون یاریسیندان چوخو اداره اولونمور و قورونمور، رسمی‌لر ایسه ۲۰۳۰-جو ایله قدر اؤلکه‌لرین مالکتینده اولان تورپاقلارین ۱۰۰-ده اوتوزونو قوروماغی عؤهده‌‌لرینه گؤتوروبلر.
بو آراشدیرمایا گؤره، خصوصی دقت یئتیریلمه‌لی و قورونمالی ان یاخشی اراضی‌لر آمازون، کونقو و اندونزی تروپیک (استوایی) مئشه‌لری ایله یاناشی، روسیه، کانادانین قوزئی و ساکت اوکئانین (اقیانوس آرام) شمال غربینده‌کی ملایم (معتدل) مئشه‌لردیر.
دونیانین ان یوکسک اؤده‌نیلمز کربونو بریتانیا آدالاری دا داخیل اولماقلا مانقروولاردا، باتاقلیق‌لاردا و چمنلیک‌لرده ساخلانیلیر. آنجاق سون اون ایللیک‌ده بو اراضی‌لرین چوخو کند ائولری و اوتلاق ساحهلری تیکمک اوچون داغیدیلیب.
