اعدام حؤکملری‌نین ایجراسی‌نین داوام ائتدیریلمه‌سی؛ گنبدکاووس حبس‌خاناسیندا بیر محبوس اعدام ائدیلیب
ایراندان آلینان خبرلره گؤره، ایران ایسلام جمهورییتی‌نین عدليه اورقانلاری سرحد آلایی‌نین مامورونو قتله یئتیرمک اتهامی ایله “مهدی بخشنده” آدلی تورکمن محبوسو وکیل حوقوقو اولمادان اعدام ائدیب.
تورکمن حوقوق مودافیه‌چیلری “مهدی بخشنده‌نین اعدام حؤکمونون اؤتن گون ۲۴ آبان‌دا سحر ساعتلاریندا گنبدکاووس حبس‌خاناسیندا ایجرا اولوندوغونو” اعلان ائدیبلر.
یئرلی قایناقلارین وئردیگی بیلگیلره گؤره، سرحد آلایی‌نین مامورو نبی‌الله خطیری‌نی چای‌خانادا ضابیطلرله داوا زامانی اؤلدورن مهدی بخشنده سرحدده یئرلشن کرند شهریندن اولان تورکمن وطنداشیدیر. بو داوا زامانی ایکی عسگر ده یارالانیب. قئید ائدک کی، محکمه سورجینده او وکیل توتماق حوقوقوندان محروم ائدیلیب.
ایران اینسان حاقلاری تشکیلاتی‌نین ایستاتیستیکاسینا گؤره، ۲۰۲۳-جو ایلین باشیندان بری ۵ نفری اعتراضچی و ۱۴ نفری قادین اولماقلا، ۶۵۲ نفر اعدام ائدیلیب. بو سایی اؤتن ایلین عینی دؤورو ایله موقایسه‌‌ده یوزده ۲۵ آرتیم گؤستریر.
