اصفهانین ویلاشهرینده بهائی جوتلویو توتوقلاندی

2 شهریور 1399 بازار گونو،«هوشمند طالبی» و «مژده اقترافی (طالبی)» آدلی بیر بهائی جوتلویو (ارکک-قادین)، اصفهانین نجف‌‌آباد شهرینده اطلاعات ناظرلیگی مامورلاری طرفیندن توتوقلاندیلار.

ایران‌وایرین آلدیغی معلوماتا گؤره، بازار گونو سحر ساعتلاریندا بو جوتلویو اؤنجه تلفونلا اشیالارینی نجف‌‌آباد اطلاعات ایداره‌سیندن اعاده آلمالاری ایسته‌نیلدی. تهلوکه‌‌‌سیزلیک قوه‌لری بیر نئچه ایل اؤنجه اصفهانین ویلاشهرینده بو شخصلرین ائولرینده آختاریش آپارارکن بو اشیالاری موصادیره‌‌ ائتمیشدیلر.

بهائی جوتلویو اطلاعات ایداره‌سینه گئتدیکدن سونرا مژده اقترافی (طالبی) توتوقلاندی و ماشینی موصادیره‌‌ ائدیلدی. سونرا بئش مامور هوشمند طالبی ایله جوتلویون ائوینه گئتدی و بوتون کیتابلاری، موبایللاری، کامپیوترلری، نوتبوکلاری و حتی اوشاقلاری‌نین موسیقی آلتلرینی، او جومله‌‌‌دن آکوستیک پیانونو موصادیره‌‌ ائده‌رک اطلاعات ایداره‌سینه آپاردیلار. مامورلار، هوشمند طالبی‌یه مخصوص بیر یوک ماشینی دا موصادیره ائتدیلر.

بهائی جوتلویونون عائله‌‌‌سینه توتوقلانان شخصلرین اصفهانداکی دستگرد حبس‌خاناسینا کؤچورولدویو بیلدیریلدی.