اصفهاندا سئچیلمیش 24 ناهی منکره بیر ائو باغیشلاناجاق

 اصفهان والیسی، بو ایالتده سئچیلمیش 24 امر به معروف و نهی عن منکر ائدنه بیر ائو وئرمک نيتینده اولدوغونو آچیقلادی.

اصفهانین والیسی «عباس رضایی»، بو خبری اصفهان ایالتینده‌کی  امری به معروف و نهی عن منکر شورا ایجلاسیندا اعلان ائتدی.

رضایی، «گلن ایله قدر ان یاخشی امر به معروف و نهی عن منکر ائدن 24 نفره بیر ائو وئریله‌جک« دئدی.

او علاوه‌‌ ائتدی کی، بو ائولر یالنیز ائوی اولمایانلارا باغیشلاناجاق.

امر به معروف و نهی عن منکر اوزون ایللردیر ایران توپلوموندا گرگینلیک یارادن بیر حادثه‌‌‌یه چئوریلیب.

امر به معروف و نهی عن منکر چوخ واخت توپلومسال ساحه‌‌‌ده، اینسانلارین اؤرتویونه، داورانیشلارینا و حتی دانیشیقلارینا موداخیله ائدن بسیج بازالاری‌نین عضولریدیر.

سون ایللرده بو اینسانلارلا توققوشان اینسانلارین چوخ‌سایلی ویدئو و معلوماتلاری یاییملانیب.