اشکان سعادت مهر اورمیه مرکزی حبس‌خاناسیندان سربست بوراخیلیب
تورک مدنی فعال اشکان سعادت مهر ۱ میلیارد تومنلیک گیروو قارشیلیغیندا محکمه‌یه قدر اورمیه مرکزی حبس‌خاناسیندان سربست بوراخیلیب.
بو تورک فعالین محکمه سورجی‌نین ایلکین مرحله‌‌‌سینده اتهامی “ایسلام جمهوریتینه قارشی تبلیغات و موقدسلری تحقیر ائتمک” اولاراق بیلدیریلمیشدی.
اشکان سعادت مهر ۲۹ شهریور ۱۴۰۲-جی ایل چارشنبه گونو ایش یئرینده گوونلیک گوجلری طرفیندن حبس ائدیلمیش و ۴ مهرده اطلاعات ایداره‌سی‌نین تجرید‌خاناسیندان اورمیه مرکزی حبس‌خاناسینا کؤچورولموشدور.
کئچن هفته جناب سعادت مهرین یاخینلاری‌نین وئردیگی بیلگیلره گؤره، پرونده‌نین موستنطیقی محکمه‌یه قدر کئچیجی سربست بوراخیلما قراری وئرمکدن امتناع ائدیردی.
قئید ائتمک لازیمدیر کی، بوندان اؤنجه ده اشکان سعادت مهر ۲ مهر ۱۴۰۱-ده عومومی اعتراضلار ایله عینی واختدا حبس ائدیلمیش و ۴ مهرده کئچیجی اولاراق سربست بوراخیلمیشدیر.
