اسماعیل جمیلی ; شانلی ظفر
دای چرخ فلک ترسینه دوران ائده بیلمز
آزمیش دیغالار جننتی ویران ائده بیلمز
شنلنمه ده دیر اؤز ییه سیلن خاری بولبول
گلشنده دوغوزلار داها جولان ائده بیلمز
قولدورلارین آرتیق کوته لیب قانلی یاراغی
قونداقدا کی گول غونچه سی آل قان اولا بیلمز
تزویر و ریا نین حجابین سالدیق اوزوندن
زاهید گونشین نورونو پونهان ائده بیلمز
سولطان ساوالان شانلی شوشانین گؤزو آیدین
جننت وطنی یاد داها تالان ائده بیلمز
شانلی ظفرین بایرامیدی حقلی قازاندی
حقسیز داها اؤز دردینه درمان ائده بیلمز
تبریز باکی استانبول ائدیر فخریله شنلیک
بو بیرلیی ایللرده پریشان ائده بیلمز
