اسماعیل احمدی اهر حبس‌خاناسیندان مرخصی‌یه گؤندریلیب
تورک مدنی فعال اسماعیل احمدی بکرآباد ۲۷ خرداد ۱۴۰۳-ده قوربان بایرایم موناسیبتی ایله اهر حبس‌خاناسیندان ۱۰ گونلوک مرخصی‌یه گؤندریلیب.
۳۱ فروردین ۱۴۰۳–جو ایلده بو آذربایجانلی فعال ۹ آیلیق حبس جزاسینی چکمک اوچون اهر حبس‌خاناسینا گؤندریلمیشدی.
بوندان اؤنجه اسماعیل احمدی شخصی اینستاگرام صفحه‌‌‌سینده دوغو آذربایجان ایالتی‌نین تئمییز محکمه‌‌سی‌نین ۳۲-جی شؤبه‌سی طرفیندن ۹ آی حبس و ۷۰ شاللاق ضربه‌‌‌سی جزاسی‌نین تصدیق ائدیلدیگینی آچیقلاییب.
بو مدنی فعال “ایسلامی موقدسلیکلری تحقیر ائتمک، اینسانلاری داخیلی/خاریجی گوونلیگه قارشی جینایتلر تؤرتمه‌یه تحریک ائتمک، دوشمن شبکه‌لری ایله ایلیشگی و یالان یایماق و ایران ایسلام جمهورییتینه قارشی تبلیغات” ایله اتهام ائدیلیب.
بوندان اؤنجه، اسماعیل احمدی ۸ مهرده ورزقان شهری‌نین عومومی و اینقیلاب ساوجیلیغی‌نین بیرینجی شؤبه‌سینده ایره‌لی سورولن اتهاملاری ساوونماق اوچون چیخیش ائدیب.
اسماعیل احمدی بکرآباد ۲ شهریور ۱۴۰۲-ده اهر شهری‌نین مرکزی زیندانیندان ۴۰۰ میلیون تومن گیروو ایله سربست قالمیشدی.
اؤنجه‌لر سونگون میس معدنی ایشچیلری‌نین دورومونا اعتراض ائتدیگی اوچون حبس ائدیلن جناب احمدی یاخینلاری‌نین بیلدیردیگینه گؤره، ۳۰ مرداد ۱۴۰۲-ده ورزقاندا گوونلیک گوجلری طرفیندن حبس ائدیلمیشدی.
