اردبیل ایالتی‌نین اصلاندوز شهرینده ۴۸ اؤیرنجی قیز زهرله‌نیب
اردبیل ایالتی‌نین اصلاندوز شهرینین راه زینب قیز مکتبی‌نین ۴۸ اؤیرنجیسی دونن جومه آخشامی، ۱۱ اسفند ۱۴۰۱-جی ایلده زهرله‌نیب.
اردبیل والیلیگی‌نین گوونلیک و آسایشین موحافیظه‌‌‌سی اوزره باش مودیری علی محبوبی‌پور بیلگی وئریب کی، اصلاندوزداکی راه زینب قیزلار اوخولوندا بو اوخولون اؤیرنجیلری و ایشچیلری کؤتو قوخو، بوغازدا یانما و حالسیزلیق حیسی ایله قارشیلاشیبلار.
اؤیرنجیلرین زهرلنمه‌سی قوم شهرینده ۹ آذر ۱۴۰۱-جی ایل چارشنبه گونو باشلاییب و همین گون نور صنعت اوخولونون ۱۸ اؤیرنجی قیز زهرله‌نیب و بوندان سونرا ایرانین دیگر شهرلریندن، او جومله‌‌‌دن بوروجرد و تهراندان خبرلر یاییملانیب.
آنجاق ۱۰ اسفند ۱۴۰۱-ده بو حادثه آذربایجاندا داها چوخ یاییلیب و اردبیل شهرینده ان آزی ۱۱ اوخولون اؤیرنجیلری‌نین زهرلندیگی باره‌ده بیلگی یاییلیب. سما، دین و دانش، طیبه، عفاف، خلبان ذاکر، بهاران، معراج شاهد، نامجو، چمران و دادمان اوخوللاری بو اوخوللار آراسیندادیر.
