اردبیلده قوراقلیق ۴ مین میلیارد تومن زیان ووروب
اردبیل اکینچیلیک تشکیلاتی‌نین رئیسی دئدی: ایچینده اولدوغوموز اکین ایلینده‌کی قوراقلیق، اردبیل ایالتی‌نین اکینچیلرینه دؤرد مین میلیارد تومندن چوخ زیان ووردو.
خلیل نیکشاد بیلدیردی: قیشدا و یازدا یاغیشین آزالماسی و سون آیلاردا هاوا ایستیلیگینده گؤرونمه‌میش آرتیمین داوام ائتمه‌سی، اکینچیلره ان چوخ زیان ووردو و اکین ساحه‌‌‌لرینده و باغلاریندا محصول سویه‌‌سی کسکین آزالدی.
اردبیل اکینچیلیک تشکیلاتی‌نین رئیسی دئدی: قوراقلیق زیانی‌نین دقیق میقداری هله قیمتلندیریلمسه ده، گؤرولن ایلک تدبیرلرده و آراشدیرمالاردا، ایالتین اکینچیلیک، باغچیلیق و حئیواندارلیق ساحه‌‌‌لرینه دؤرد مین میلیارد تومن زیان وورولدوغو گؤرونور.
نیکشاد آرتیردی: بو ایلین فروردین آییندا کئچن ایله نیسبتاً یاغیشلاردا یوزده ۷۰ آزالما اولدو و سون اوچ آیدا ان آز یاغیش ایالتده قئیده آلیندی کی، بو دا هامیمیزین میثلی گؤرونمه‌میش قوراقلیق دؤورو ایله اوزلشدیگیمیزی گؤستریر و بیزیم ناراحاتلیغیمیز بو ایلین پاییز و قیش آیلاریندا بو وضعيتین داوامیدیر.
کئچن هفته‌ده اردبیل ایالتی‌نین هاوا بیلیمی ایداره‌سی‌نین باش مودیری دئمیشدی: حال-حاضردا اردبیل ایالتی‌نین موختلیف اراضیلریندن یوزده ۸۰ اورتا و شدتلی قوراقلیقدان ائتکیلنیب.
محمدی جاری ایلده یاغیش میقدارینی ۲۳۰ میلیمتر اولاراق آچیقلایاراق بیلدیرمیشدی: اوزون مدتلی و کئچن ایله نیسبتاً بو یاغیش میقداری یوزده ۲۴ آزالما گؤستریر.
iranwire
