اردبیل‌ده بالیقلی چای تامامیله قورویوب
ساوالان داغی‌نین گونئی یاماجلاری‌نین و بۆزگۆش داغی سیلسیله‌سی‌نین قوزئی-باتی یاماجلاری‌نین بولاقلاری و قارلاریندان قایناقلانان بالیقلی چای سویون اولماماسی و ایالت یئتکیلیلری و مودیرلری‌نین وئریملی ایداره ائدیلمه‌مه‌سی سببیندن تامامیله قورویوب.
اردبیللی چئوره فعاللاری و وطنداشلارین سوسیال شبکه‌لرده یاییلان شکیل و ویدئولارا ایستناداً وئردیگی بیلگیلره گؤره، بالیقلی چای سون عصرده ایلک دفعه تامامیله قورویوب.
او، بالیق بوللوغو ایله مشهور ایدی، ایندی ایسه بالیقلاردان ایز یوخدور.
آیریجا بو چایین قوروماسی بو چایین طبیعی حیاتینی ابدی اولاراق محو ائتمکله یاناشی، هم ده بو چایین یاتاغی‌نین بو ایالتده میکرو توز مرکزینه چئوریلمه‌سینه و گله‌جکده اینسانلار اوچون گئنیش اکولوژی سورونلارا سبب اولا بیلر.
اردبیلده‌کی بالیقلی چای اردبیلده‌کی قاراسو چایی‌نین اساس قوللاریندان بیریدیر و یامچی بندینی سو ایله تعمین ائدیر.
اورمیه گؤلونون قصداً قورودولماسی ایله عینی واختدا چئوره اوزمانلاری‌نین آذربایجانین بو اینجیسی‌نین فلاکتلی اکولوژی سورونلاری باره‌ده خبردارلیغینا باخمایاراق، آذربایجانین باشقا شهرلری‌نین چای و گؤللری ده تام قورولوقلا اوز اوزه‌دیر.
