اردبیلده کرونانین کؤورک وضعيتی داوام ائدیر؛ کرونانین باشلانغیجیندان بری ایالتده ۱۹۰۰ نفر حیاتینی ایتیردی
آچیقلانان سون بیلگیلره گؤره اردبیل ایالتی خسته‌خانالاریندا ۱۸ اردیبهشته قدر ۴۵۸ خسته یاتماقدادیر و ۵ باشقا کرونا خسته‌سی‌نین اؤلومو ایله اردبیلده توپلام اؤلوم سایی ۱۹۰۰ نفره چاتیب.
اردبیل طب علملری بیلیم‌یوردونون رئیسی شهرام حبیب‌زاده، اردبیل ایالتی‌نین بیر نئچه گوندور قیرمیزی وضعيتدن چیخدیغینی بیلدیردی و دئدی: حال حاضردا اردبیلده کرونا خسته‌لیگی‌نین وضعيتی کؤورکدیر و بیر سهلاًکارلیق ایله ایالتده یئنی بیر کرونا دالغاسینا باشلاماق اِحتیمالی وار.
اردبیل طب علملری بیلیم‌یوردونون رئیسی، اردبیل ایالتینده سون ۲۴ ساعتدا ۵ یئنی خسته‌نین اؤلدویونو آچیقلادی و دئدی: حاضردا اردبیل ایالتینده اؤلومجول کرونا گونلری یاشانیر، بئله‌لیکله ۷۹ نفر ایالت خسته‌خانالاری‌نین اؤزل باخیم شؤبه‌سینده یاتیر و عومومی وضعيتلری‌نین آغیر اولدوغو بیلدیریلیر.
حبیب‌زاده آرتیردی: حال حاضردا اردبیل، پارس آباد، مشگین شهر، گرمی و خلخال شهرلری نارینجی، بیله سوار، نیر، نمین، سرعین، کوثر و اصلاندوز شهرلری کرونا باخیمیندان ساری وضعيتینده‌دیر.
iranwire
