اردبیل؛ اوشاق آدلاری‌نین سئچیلمه‌سینه قویولان قاداغالارا اعتراض
اردبیل مدنی فعاللاری، “حؤکومت طرفیندن والیدئینلرین اوشاغین آدینی سئچمک حوقوقوندان محروم ائدیلمه‌سینه و موداخیله‌سینه” اعتراض اولاراق اردبیلده گئنیش میقیاسلی دیوار یازماسی باشلاتدیلار.
اونلار سئچیلمیش آدین فارسجا اولمادیغینی بهانه ائده‌رک بو شهرین نوفوس ایداره‌سی‌نین اوشاقلارا کیملیک وئرمکدن ایمتینا ائتمه‌سینه اعتراض ائدیرلر.
“اوشاقلارین کیملیگینی قورویون” و “حؤکومتین اؤولادیما آد سئچمک حاقی یوخدور” کیمی ایفاده‌لردن ایستیفاده ائدن بو دیوار یازیلاری‌نین بعضیلری‌نین یانیندا “آییل” آدی دا گؤرونور.
آییل آدی، سجاد جولانی‌نین اعتراض ویدئوسونون یاییملانماسیندان سونرا مجازی شبکلرده ترند حالینا گلن مجازی قوللانیجیلارین اعتراض هشتگیندن گؤتورولموشدور. جولانی، اردبیلده یاشایان بیر تورک موغنی و صنعتچیدیر. بو یاخینلاردا شهر نوفوس ایداره‌سی‌نین قارشیسیندا بیر کیملیک وثیقه‌‌‌سی‌نین وئریلمه‌مه‌سینه و قیزی اوچون سئچدیگی آدین رد ائدیلمه‌سینه اعتراض اولاراق بیر ویدئو یاییملادی.
بو ویدئودا اردبیللی صنعتچی، حاقیندان ایمتینا ائتمه‌یه‌جه‌یینی آچیقلایاراق، تورک دیلینده “اویان” آنلامینی وئرن آییل آدینین معناسینا توخوناراق دئدی: “ساده‌جه بو آدین تورک اولدوغو اوچون دئییل، ایران حؤکومتی خالقین آییلماسینی ایستمیر و هر زامان بو مسئله‌‌دن قورخموش و آییل آدینین سئچیلمه‌سینه قارشی چیخمیشدیر.”
جولانی‌نین اعتراض ویدئوسونون یاییملانماسی مجازی اورتامدا گئنیش تبکیلره سبب اولدو. تورکلردن علاوه بعضی عرب، کورد، تورکمن و بلوج قوللانیجیلار دا توییترده آییل هشتگیندن ایستیفاده ائده‌رک اوخشار تجروبه‌لر پایلاشدیلار.
اوشاق حوقوقلاری فعالی و محبوس اوشاقلاری درنگی‌نین قوروجوسو حامد فرمند بو اولایا تبکی اولاراق توییترینده یازدی: “اوشاق حوقوقلاری کنوانسیونونون ۸-جی ماده‌‌سی‌نین ۱-جی بندی عائله‌‌‌لره آچیق شکیلده اوشاقلاری‌نین آدینی سئچمک حوقوقو وئریر و ایران دا داخیل اولماقلا کنوانسیونونون ایشتیراکچیسی اولان دؤولتلر بو حوقوقا سایقی گؤسترمه‌لی و موداخیله ائتمه‌مه‌لیدیرلر.”
حوقوق آراشدیرماجیسی ابراهیم نوری، نوفوس ایداره‌سی‌نین عائله‌‌‌یه کیملیک وثیقه‌‌‌سی وئرمه‌مه‌سینی سیاسی اینانج آزادلیغی‌نین، دینی داورانیشین، کولتورل قاتیلیمین و دؤولتین شخصی حیاتا موداخیله ائتمه‌مه‌سینین پوزولدوغو اولدوغونو ديَرلندیرن بیر متن یاییملادی.
ایران نوفوس مودورلوگو تصدیقلنمیش آدلارین لیستینی یاییملایاراق وطنداشلاردان بو آدلاری اوشاقلاری اوچون سئچمه‌لرینی ایسته‌ییر. سئچیلن آد نوفوس ایداره‌سی طرفیندن تکلیف اولونان لیستدن کناردا اولدوقدا، والیدئینلر طرفیندن سئچیلن آد آراشدیریلماق اوچون بو تشکیلاتدا یئرلشن بیر کومیته‌یه گؤندریله‌جک و تصدیق ائدیلمه‌دیگی تقدیرده قئیدیاتدان کئچمه‌لرینه مانع اولاجاق.
کیملیک وثیقه‌‌‌سی‌نین وئریلمه‌مه‌سی و نوفوس ایداره‌سی‌نین والیدئینلرین سئچدیگی آدا قارشی چیخماسی ایلک دفعه باش وئرمیر. ایللردیر بیر چوخ عائله‌‌‌لر اؤولادلاری اوچون ایسته‌دیکلری آدین سئچیلمه‌سینه محدودیّت قویولوب؛ عائله‌‌‌لر تعقیب ائتسه‌لر و ایصرار ائتسه‌لر، بعضاً محکمه طرفیندن محدودیّتلر قالدیریلیر، لاکین اکثر حاللاردا والیدئینلر اؤولادلاری اوچون ایسته‌دیکلری آدلاری سئچه بیلمیرلر.
