احمدرضا جلالی حبس‌خانادا دورومونون پیسلشمه‌سیندن سونرا آجلیق آکسییاسینا سون قویوب
ایکیلی ایران-ایسوئچ وطنداشلیغی اولان محبوس احمدرضا جلالی “اؤنجه‌کی آکسیالاردان سونرا یارانان جدی معده پروبلئملری”، “جدی فیزیکی ضعیفلیک” و “اورک دؤیونتوسو و آشاغی قان تضییقی” سببیندن آکسیاسینی دایاندیریب.
احمدرضا جلالی‌نین حیات یولداشی ۹ تیر ۱۴۰۳-ده ایکس سوسیال شبکه‌سینده‌کی حسابیندا یازیب: احمدرضانین فیزیکی دورومو چوخ، چوخ ضعیفدیر و آجلیق آکسییاسی‌نین دؤردونجو گونونه گیردیگی اوچون حیاتی جدی تهلوکه آلتیندادیر.
سککیز ایل اؤنجه ایراندا حبسده اولان و اعدام جزاسینا محکوم ائدیلن احمدرضا جلالی‌نین حیات یولداشی ویدا مهران‌نیا رادیو فردایا وئردیگی موصاحیبه‌سینده حیات یولداشی‌نین آجلیق آکسییاسینا سون وئردیگینی تصدیقله‌ییب.
بو یاخینلاردا ایسوئچ حؤکومتی مینلرله سیاسی شخصین اعدامیندا ایشتیراک ائتدیگینه گؤره ایسوئچده ۱۳۶۰-جی ایللرینده‌کی اعداملارا گؤره عومورلوک حبس جزاسینا محکوم ائدیلمیش گوهردشت حبس‌خاناسی‌نین کئچمیش ساوجی یاردیمجیسی حمید نوری‌نین آزادلیغا بوراخیلماسی موقابیلینده ایراندا حبسده اولان ایکی ایسوئچ وطنداشینی آزاد ائده بیلدی.
نوری آزاد ائدیلدیکدن سونرا احمدرضا جلالی‌نین ایسوئچین باش ناظرینه اعتراض ائتدیگی سس فایلی درج ائدیلیب.
جناب جلالی حیات یولداشی ایله بو تلفون دانیشیغیندا ایسوئچین باش ناظری اولف کریسترسونا موراجعت ائده‌رک دئدی: “اعدام ریسکینه باخمایاراق، منی بوراخماغا قرار وئردینیز.”
