ابوالفضل کندی‌نین داغیدیلماسینی ایفشا ائدن موخبیر توتوقلاندیقدان سونرا گیروو موقابیلینده سربست بوراخیلدی
مظلوملار وقفی طرفیندن ابوالفضل کندی‌نین داغیدیلماسی باره‌ده ایلک دفعه معلومات وئرن مهر خبر آژانسی‌نین موخبیری کوثر کریمی یئدی شهریویر ۱۳۹۹-جی ایل تاریخینده بیر ساعت ساخلانیلدی، سونرا گیروو موقابیلینده سربست بوراخیلدی.
اهوازلی بیر ژورنالیست بو حبس اولونما خبرینی توییترینده یاییملایاراق، خانیم کریمی‌نین «رژیمه قارشی تبلیغات» اتهامی ایله خوزیستان عدليه‌‌سی طرفیندن حبس اولوندوغونو یازدی.
اهوازدا یاشایان ژورنالیست کوثر کریمی ۳۰مرداد ۱۳۹۹-جی ایلده مهر خبر آژانسیندا یاییملانان بیر راپوردا، اهواز شهری‌نین اطرافینداکی ابوالفضل کندینده‌کی ۳۰۰عائله‌‌‌نین حدیندن آرتیق اقتصادی یوخسوللوق شرایطینده یاشادیغینی، لاکین ایندی مظلوملار وقفی‌نین ائولری‌نین سؤکولمه‌سینی طلب ائتدیگینی بیلدیردی.
بو راپورون درج ائدیلمه‌سی بیر چوخ تبکیلره سبب اولدو. راپوردا مظلوملار وقفی‌نین کندین صاحبی اولدوغونو ادعا ائتدیگی یازیلدی.
بو راپورو یازماق اوچون خانیم کریمی کند ساکینلری ایله، او جوملهدن ابوالفضل کندی‌نین مسجید ایمامی ایله صؤحبت ائتدی و پروبلئملرینی و ایستکلرینی یازدی.
آلتی شهریور ۱۳۹۹-جی ایل تاریخینده سوسیال شبکلرده بو کندده بیر قروپ اینسانین «مامور» آدلاندیریلان شخصلر طرفیندن دؤیولدویونو گؤسترن شکیللر یاییملاندی.
اهواز پولیس کوماندیری سرهنگ محسن دالوند ایرنایا وئردیگی موصاحیبه‌ده آتش آچمایی رد ائتدی و یاییملانان فوتولاری ساختا آدلاندیردی و مامورلارین حؤکمو ایجرا ائتمک اوچون کنده گئتدیکلرینی سؤیله‌دی.
خوزیستانلی بیر ژورنالیست «یاسر جلالی»، توییترینده، خانیم کریمی‌نین سربست بوراخیلماسیندان سونرا، بیر مقامین مهر خبر آژانسی‌نین ابوالفضل کندی‌نین داغیدیلماسینی آراشدیرماغا داوام ائدرسه آژانسی‌نین مودورونو محکمه‌‌یه وئرمکله تهدید ائتدیگینی یازدی: «مهر موخبیری گیروو موقابیلینده سربست بوراخیلدی. مقاملاردان بیری‌نین ده مهر آراشدیرمایا داوام ائدرسه، خبر آژانسی‌نین مودورونون چاغیریلماسینا امر وئره‌جکلری ایله تهدید ائدیلدیگینی ائشیتدیم. حکایه‌‌نین چوخ‌سایلی اؤلچولرینی درک ائده‌رک، مهرین گؤروی، خوزیستان خالقی‌نین دردلرینی یازماقدی او جوملهدن ابوالفضل کندی کی اؤلکه تقسیماتیندا بئله آدی یوخدو!»
لاکین خبر آژانسلاری اهوازدا یاشایان ژورنالیست کوثر کریمی‌نین حبس اولونما واختی و یا باشقا بیر تفروعات باره‌ده معلومات وئرمه‌ییبلر.
