ابراهیم عوض زاده تبریز مرکزی حبس‌خاناسیندان سربست بوراخیلیب
اردبیللی تورک مدنی فعال ابراهیم عوض زاده محکمه‌‌‌یه قدر گیروو بوراخیلدیقدان سونرا دونن ۹ آذر ۱۴۰۲-جی ایلده تبریز مرکزی حبس‌خاناسیندان آزاد ائدیلیب.
بو آنا قدر بو آذربایجانلی فعالین حبسی‌نین سببلری و اونا قارشی ایره‌لی سورولن اتهاملار باره‌ده آیرینتیلی بیلگی یوخدور.
بو مدنی فعال ۹ مهر ۱۴۰۲-ده سیویل پولیسلر طرفیندن باجیسی‌نین ائوینده حبس ائدیلیشدی
بو آذربایجانلی فعالین باجیسی قارداشی‌نین حبس اولونماسی باره‌ده بیلگی یاییب و اونون دورومونون ایزله‌نیلمه‌سی‌نین اؤنمینی ایسته‌‌یه‌رک دئمیشدی: بو بازار گونو سحر ساعت ۷-ده قاپی آچیق اولارکن عائله حیاتینا حؤرمت ائتمه‌دن ۸ سیویل پولیس زوراکیلیقلا ائوه گیریب و محکمه قراری تقدیم ائتمه‌دن قارداشیمی یوخودا حبس ائدیبلر.
حسین آزادی، مرتضی نورمحمدی، مهرداد قادری امیرحسین آقایی، ابراهیم عوض پور و حامد یگانه پورون سربست بوراخیلماسیندان سونرا، حبسده اولان باشقا تورک مدنی فعاللار، یعنی یوروش(آیت) مهرعلی بیگلو، داود شیری، علی بابایی، ناصر رزمجو، آراز ابراهیم نژاد، جواد سودبر، میلاد جلیلی و سیدمحمدرضا موحد تبریز اطلاعات ایداره‌سی‌نین تجرید‌خاناسیندا ساخلانیلیر و اونلارین پرونده‌سی‌نین گئدیشی باره‌ده آیرینتیلی بیلگی یوخدور.
بو محبوسلارین بعضیلری، او جومله‌‌‌دن علی بابایی ۲ آیا یاخیندیر کی، عائله‌‌‌‌سی ایله ایبه‌تیشیم قورا بیلمه‌ییب.
