ابراهیم ساوالان; آدی و یادی خاطیره‌لردن سیلینسه ده، محمد رضازاده (محمدلو عباسی) 1294
آدی و یادی خاطیره‌لردن سیلینسه ده، یازدیغی یازیلاری خلقیمیزین خاطیره‌سینده ابدی یاشایاجاقدیر. او میللی حکومت دؤورنده گنجلرین دوشونجه‌سینه ایمضا آتان یازارلاردان بیریدیر. محمد رضازاده (محمدلو عباسی) 1294.جو ایلده تبریزده آنادان اولموش و اوزون موددت درین مطالعه ائدیب علمی- اجتماعی تدقیقات آپارمیشدی.
رضاشاه قاچاندان سونرا، تبریزده تورکجه و فارسجا یاییملانان بوتون روزنامه و درگیلر او جومله‌دن آذربایجان، فریاد، خاورنو، یئنی‌شرق‌ده اونون یازیلارینا توش گلیریک. محمدلو عباسی 1324 ش…هریوریندن نشر اولونان ادبی- فرهنگی شفق درگی‌سینین یازارلار هئیت‌یندن اولموشدور. رضازاده‌نین شفق درگی‌سینده یازدیغی یازیلاری حاقدا قیساجا دانیشماق مومکون دئییل. او یازیلار تمامیله یاییملانیب اوخوجو کوتله‌سینه تقدیم اولمالیدیر.
محمدلو عباسی یئنی دونیا گؤروشلری آیدینلاریمیزا چاتدیرماق مقصدیله بیر سیرا علمی- فلسفی کیتابلار دا ترجمه و تالیف ائتمیشدی. اونون «خاطیره‌لریم» آدلی بیر حیکایه کیتابی دا واردیر. او میللی حکومتین اساس ماده‌سی اولان آنا دیلی ترویجینده، تورکجه درسلیک کیتابلاری‌نین سورعتله تالیف و انتشاریندا بؤیوک رول اوینامیشدیر.
1946 ژانویه‌سیندن باشلایاراق آیلیق اجتماعی، سیاسی و ادبی «آذربایجان» مصوّر مجموعه‌سینده ده محمدلونون یازیلارینی گؤروروک. نومره ایکی و اوچده یاییملانان «آذربایجان مطبوعات تاریخیندن» مقاله‌‌سی مخصوص اهمیته مالیکدیر. عباسی بو یازیدا آذربایجان نثر تاریخیندن اردبیللی شیخ صفی‌الدین قارامجموعه‌سینی و دده‌قورقود کیتابینی اوخوجولارا تانیتدیریب 1856 میلادیده تبریز دارالسلطنه‌سینده، حاجی احمداوغلو مشدی‌رضانین مطبعه‌سینده، چاپ اولموش اوچ تورکجه کیتاب حاقدا بیلگیلر وئریر. او کیتابلار دربندنامه، قاراباغ‌نامه و اخلاقی حیکایه‌لردیرلر.
دربندنامه‌ده دربند تاریخی 1664 میلادیدن 1800.جو ایللرین اووللرینه‌دک تحریر اولموشدور. قاراباغ‌نامه‌ده آغامحمدخان قاجار، فتحعلیشاه، گرگین‌خان و تزار پاول پطروویچ هابئله قاراباغ و گنجه خانلاریندان (سردار، ابراهیم‌خان و سلیم‌خان) دؤورونده قاراباغین باشینا گلن تاریخی سیاسی حادیثه‌لر درج ائدیلمیشدیر. عباسی‌نین یازدیغینا گؤره، قاراباغ نامه‌نین نثری اولدوقجا فصیح، گؤزل، بلیغ و شیریندیر و شمالی آذربایجانداکی قارداشلاریمیزین تزار حاکمیتی علیه‌ینه آپاردیقلاری قانلی مبارزه‌لری ترنم ائدن فصلی خصوصیله دقته شایاندیر. اخلاقی حیکایه‌لر مجموعه‌سیندن عبارت اولان افسانوی تمثیللر کتابی، فصیح و روان بیر نثرله یونان فابولیستی اِزوپ، فرانسیز و روس تمثیل‌نویسلری اولان لافونتن و گریلوف‌ون حئیوانات دیلیندن اخلاقی و اجتماعی نتیجه‌لر چیخاران جامع بیر کیتابدیر.
گؤردویونوز کیمی هله 170 ایل اؤنجه، تبریز دارالسلطنه‌سینده یونان، فرانسیز و روس کیتابلاری تورکجه‌یه ترجمه اولوب نشراولورموش و عباسی‌نین یازدیغینا گؤره بو کیتابلارین چوخو رضاشاه دؤورونده کیتابخانالاردان توپلانیب یاندیریلمیشدی. محمدلو عباسی همن مقاله ده اؤز گؤزویله گؤردویو خاطیره‌نی نقل ائدیرکی 15 ایل بوندان اول، دوقتور عمادالملک محسنی آذربایجاندا معارف رئیسی اولدوغو زامان، ائولردن، کیتابخانالاردان آنا دیلینده اولان مطبوعاتی دؤولت الیله توپلاییب تونقال قالاییب اود وورموشدولار.
