ابراهیم رشیدی اردبیل شهری‌نین اطلاعات ایداره‌سی‌نین تجرید‌خاناسینا کؤچورولوب
ایران‌وایره چاتان خبره گؤره ۹ دی گونو خیاودا (مشگین شهر) ساخلانیلان تورک مدنی فعال و ژورنالیست ابراهیم رشیدی (ساوالان) ۱۰ دی ۱۴۰۲-ده اردبیل شهری‌نین اطلاعات ایداره‌سی‌نین تجرید‌خاناسینا کؤچورولوب.
بو مدنی فعالین یاخینلاری بیلدیریبلر کی، اونون عائله‌‌‌سینه مشگین شهر ساوجیلیغینا گئتدیکدن سونرا بیلگی وئریلیب کی، جناب رشیدی اردبیل اطلاعات ایداره‌سی‌نین تجرید‌خاناسینا کؤچورولوب و ایلکین اتهام ایران ایسلام جمهورییتی رژیمینه قارشی تبلیغات اولاراق بیلدیریلب.
بو واختا قدر بو آذربایجانلی ژورنالیسته قارشی بو اتهاملارین ایره‌لی سورولمه‌سی‌نین نه‌دنلری باره‌ده بیلگی یوخدور.
جناب رشیدی ۹ دی گونو خیاو شهری‌نین میرکندی کندینده آتاسی‌نین ائوینده گوونلیک گوجلری طرفیندن حبس ائدیلیب.
ابراهیم رشیدی تانینمیش آراشدیرماجی، ژورنالیست و مدنی فعالیدیر. او، آیدا بیر یاییملانان بایرام و یاییملانماسی قاداغان اولونان نوید آذربایجان درگی‌لری‌نین یاییم هئیتی‌نین عضوو، بلاگ یازاری و اولدوز اؤیرنجی ژورنالی‌نین باش مودیری و بولوت اؤیرنجی درگی‌سی‌نین باش یازاری اولوب.
ابراهیم ساوالان سون ۲۰ ایلده مدنی فعالیتلرینه گؤره دفعه‌‌لرله توتولوب، حبس ائدیلیب و ایشگنجه‌لره معروض قالیب.
